《當全世界都染上唔扑野就會死嘅怪病》: 24

呢種擔憂嘅心情一點點地藏係心入面，然後每日擔憂一啲，擔憂少少咁，就越煲越大。

因為近日Cherry明顯地開心咗好多，但呢種開心好似隱藏著一啲危機咁。

縱使出街難免會受到其他男人異樣嘅目光，比起之前嘅行為，呢啲目光就唔算得啲咩。

原來正常地拍拖係一件咁幸福嘅事，呢段過渡期暫時對我哋嚟講係最美好嘅時刻吧？

可以拖住Cherry出街唔洗擔驚受怕，可以正常咁食餐飯，可以正常睇下戲，變成咗一件難得嘅事。



睇嚟只要某啲事物變得罕有，先會有俾人珍惜嘅價值。

唔正常耐咗，先會覺得正常係寶貴嘅事。

呢段時期未完全恢復正常，其他人嘅威脅仲未出現，可能對我嚟講係件好事，依家建立穩定嘅感情基礎，我就唔洗怕同其他人鬥。

只不過⋯⋯

樂兒就好似一隻怨靈咁，纏繞係我身邊。不過我同佢青梅竹馬大，一時半刻又好難可以完全脫離關係。



只要係學校入面，就難免會撞到。

樂兒若無其事咁搵我，其實係邊個同我講女人面皮好薄？我一啲都唔覺得港女面皮薄。

後來我知道呢啲說話都係女權撚講嘅。

「今日一齊放學？」佢好似當咩事都無發生過咁。

「我同我女、朋、友放學。」至少呢一年我學識唔係所有人都來者不拒。



「我哋之前不嬲都一齊放㗎，你住我隔離橦，一定順路！」樂兒自信咁撥一撥頸後嘅頭髮。

「我想同我女、朋、友兩個一齊放。」我又再強調多次。

「我唔介意啊！」樂兒嘅熱情有啲恐怖。

「上次都試過3P啦，大家又唔係唔識。」樂兒呢句有啲衝擊到我⋯⋯

究竟我之前鍾意上一個咩人？

「你今日係咪點都想同我一齊放？」已經唔耐煩到一個點，我的確唔想撕爛塊面，話曬都識咗咁耐，又曾經愛過，可能今次同佢一齊放，係時候將所有嘢一炮過講清楚。

樂兒點點頭，用力地。

「好！我就陪埋你今次。」但我唔叫上Cherry。



放學嗰陣，我同Cherry今日有事要同樂兒傾，叫佢返去先。

然後Cherry突然拱到勁埋，唔知做咩乜。

一臉呷醋嘅樣望住我，補多句：「唔準曳曳㗎！」

好笑又甜蜜。

「我仲驚過你啊，依家出面都唔係話咁穩陣咋，你自己返去都要小心啲。」

「哼！男人都係信唔過嘅。」Cherry吐吐舌頭，可愛到睇唔厭，女人係咪天真就識呢啲技巧㗎？

講多一陣，Cherry就自己返咗去先，我留係班房度等樂兒。



無幾耐樂兒出現係班房門口，我哋又好似如常咁放學，但又好似唔再係以前咁。

「你做乜咁執著同我一齊放學呢？」行去搭車嗰陣，我直接切入重點，唔俾佢講自己啲嘢。

因為頭先落樓梯佢就係不停地講自己嘅嘢，但我今日放學係想講清講楚，所以我都係hea應佢。

其實佢咁熱情，好多男仔都招架不住。男仔太主動太熱情，就係狗公，而女仔主動投懷送抱，有個咁正嘅女仔咁樣做，實在搵唔到拒絕嘅理由。