我在補習社遇到一個令我難以忘懷的女生。: 五十六、解籤

「咁返屋企未啊？」我問Ellie。
 
Ellie提議:「不如去內街食個糖水先走好冇？啱啱你請咗我食野，依家我請返你喇。」
 
我調戲Ellie:「有免費宵夜邊個會唔食？不過你啱啱先食完，再食會唔會變肥婆㗎。」
 
「頂你！又話我肥，係咪想死啊？」佢今次用盡九牛二虎之力搣我，好似想攞我命咁。
 
喺掙扎嘅期間我同佢多咗身體接觸，我諗依一刻我可以確定自己係一個幸福男仔。
 


「啊！啊！今次真係痛啊！Mamma Mia！」我用力fing開佢隻手不果，所以決定放棄掙扎由佢搣。
 
佢見到我冇晒反應就即刻放開手:「嘻嘻，懲罰完畢唔玩喇！」
 
我哋去咗一間中式嘅糖水鋪，我就嗌咗碗陳皮紅豆沙，佢就嗌紫米露，今次我哋對住坐。
 
坐低咗一陣，我就問佢:「你好似有野未比我喎。」
 
Ellie扮唔知:「咩野未比啊？」
 


我視線望一望佢書包方向:「人人都有得我冇果啲野囉。」
 
講完之後個氣氛好好笑但又有啲尷尬。
 
Ellie繼續扮唔知:「姐係咩野啊？講得咁唔清楚但又想要。」
 
「食得嘅野呀！」我用手語扮放食物落口嘅動作。
 
侍應攞咗兩碗糖水行過嚟:「睇住，紅豆沙紫米露。」
 


「哦……原來你講糖水。」Ellie繼續撚我。
 
我扮唔失望:「算喇～食野先。」
 
我食糖水嘅時侯一路都頭耷耷，因為驚比佢見到我冇手信收唔開心嘅樣。
 
「喂，我變個魔術比你睇啊。」Ellie伸隻手入書包摷嚟摷去。
 
我仰起頭望住佢個書包，內心充滿期待。
 
「登登登登，恭喜哩位先生獲得白色戀人同綠茶年輪蛋糕一盒，價值一萬日元，提醒你本店只收取現金不設找續。」佢無厘頭咁亂噏。
 
「多謝晒喎，又話冇手信嘅。」我扮唔好意思攞走。
 
「仲有一份㗎！嗱，比你嘅。」佢伸隻手喺書包攞咗一個御守同一張紙條。


 
御守外面寫住「幸福御守」四隻大字。
 
「記住唔好打開個御守，一打開神明就會被釋放，咁就會失去守護嘅作用！同埋一定要記住，唔好轉送比任人，如果唔係會被神明懲罰，不過半年之後御守失效，你到時就一定要打開！今日係1月6號，你自己計好時間喇。」Ellie忽然神婆上身同我講。
 
我好好奇:「點解咁多要求嘅，我點記得晒呀。」
 
「總知你一定要記住，如果唔係仲衰過比雷劈！」Ellie表現得十分凝重。
 
「知道。」我見佢咁嘅樣都唔敢質疑咁多。
 
而我係一個好善忘嘅人，所以我就喺電話set咗半年後嘅今日提醒自己打開。
 
Ellie:「不如你睇吓張紙條寫咩先喇。」
 


「第二十八番，等第:上吉，勢運。」之後果啲係日文mix漢字睇唔明。
 
我望到寫住上吉嘅籤文，面上嘅笑容忍藏唔住。雖然我對依啲野唔係特別迷信，但見到係好運我諗冇人會質疑或者尋根問底。
 
Ellie面上點帶愁氣:「睇吓你個傻仔笑到，上吉上面仲有大吉同上上吉㗎，不過哩支都係好籤嚟。」
 
我好興奮咁問佢:「可唔可解釋吓上面嘅紙條寫咩？」
 
Ellie望住部手機講故佬上身:「我幫你求哩支籤果陣，個解籤佬話:
願望：不會即時實現
財運：很好
疾病：主要是相思病
失物：會找到
盼望的人：可能會出現
旅行：適合冬天時侯


結婚、交往：主要看對方意願。」
 
我聽完覺得Ellie好似比人昆咗咁:「依啲野我都識噏喇，洗唔洗我講一次比你聽。」
 
Ellie裝作唔在乎嘅樣:「依啲野信不信由你喇。」
 
我好好奇:「咁你果支籤文呢？」
 
Ellie苦笑:「唉～唔好提啦我果支衰野嚟，費時過晒啲衰運比你。」
 
「我過返啲好運比你咪得囉！」我用雙手掌心隔空傳運比佢。
 
「你哩個樣好白痴呀！啲人以為我同個白卡佬坐埋一齊。」Ellie笑住講。
 
我:「頂你！」


 
Ellie提議:「不如臨走前影張相喇好冇？今次都係你揸機，我哋順便拎個御守出嚟一齊影喇。」
 
其實上次喺公園fail咗十幾次之後，我哩排都有練習吓點樣自拍。
 
「好啊。」我喺褲袋掏出手機。今次我純熟舉起左手高炒，右手攞住個御守。
 
今次我哋影咗三張，而三張佢都話收貨，不過佢話要揀影得自己笑得最好睇果張，咁我就無咩所謂。
 
Ellie:「你影相進步咗咁多嘅？係咪返屋企有偷偷地練過？」
 
「冇啊。」我又作咗個藉口。
 
Ellie叮囑我:「你記住個御守要隨身帶住！最好就放喺銀包，我會隨時check㗎。」
 
「咁變態！？」當然我梗係即刻將籤文同御守即刻收入銀包，佢見到之後都好滿意。
 
影完相我哋好快就行去搭巴士走，因為都差唔多係尾班車，如果唔係要比多幾蚊搭Ｎ車，今次都係好似上次咁搭唔同巴士喇，因為佢啱啱心情先好翻啲，我都唔想比佢知我講大話。