我在補習社遇到一個令我難以忘懷的女生。: 五十五、關於Ellie

今次直覺話比我聽都知要講啲野氹翻佢。
 
「Ellie，我表演個魔術比你睇好冇。」我用筷子夾起舊土匪雞翼。
 
佢抬咗起頭望住我，面上嘅愁容仍未消失。
 
「睇住喇。」我喺佢面前咬斷咗雞翼兩端嘅軟骨，固定前排牙齒然後用筷子夾住隻雞翼360度轉。
 
「登登登登！咁就有一隻無骨雞翼啦，你都試吓！整甩晒啲骨就可以一啖食晒成隻雞翼喇！」我嘗試用氹小朋友嘅語氣講。
 


「唉。」佢眼神固定望住我擰擰頭。
 
我望到佢嘅反應之後成個人down晒，成餐飯大家都冇再講過野，我真係完唔知佢嬲啲咩，不過如果直接問一個女仔嬲咩應該係死罪，所以我都係唔講野。
 
好彩啲雞翼佢之後都係有食。
 
食完餐飯，佢望住張單攞咗六十蚊出嚟，不過為咗最後一次補償，我就主動攞咗張單埋。
 
「唉，唔怪之得Kristy會嬲你。」Ellie行出門口同我講。
 


「……」我已經知大事不妙。
 
「你係咪想知我啱啱點解咁嬲？」Ellie有口難言咁望住地下。
 
「係……」我戰戰兢兢將依隻字講出口。
 
「你陪我兜個圈先喇。」
 
「好。」
 


Ellie皺住眉:「唉，點講好呢？……我啱啱見到你跑走搞到我好唔開心。」
 
我心諗:「吓……跑去食野姐，有咩問題，最緊要食到咪得囉。」不過當然要聽埋落去啦。
 
「我之前中學拍過一次拖，係同班同學嚟，佢追咗我半年我先決定同佢一齊，頭半年我同佢關係好好，我哋就好似普通熱戀期嘅情侶。但兩個月之後我見到佢開始成日都變得古古怪怪咁，對我又好冷淡，咁我心諗算喇，還掂佢都就生日，我諗住親手整個栗子蛋糕比佢食，因為佢平時都好鍾意食栗子嘅小食。」Ellie呼吸聲開始加快。
 
我即刻喺書包攞咗包紙巾準備定，佢印一印啲眼淚之後就繼續講。
 
「生日果日我plan好晒去邊，但佢話唔閒唔去。我問佢可唔可以去樓下公園個涼亭食蛋糕，佢應承我最後有去到。我仲買整咗幾個氣球報置涼亭仔，我好記得佢嚟到果日係黑口黑面咁，但我又要傻更更扮冇事發生。
 
Ellie:「我整咗你最鍾意食嘅栗子蛋糕呀。」
 
Ex:「我都唔係鍾意食栗子，我鍾意食黑森林蛋糕啊，你唔好成日都自以為是啦。」
 
Ellie:「咁我哋下次再食啦好冇？」


 
Ex:「我同你唔夾啊，不如分手啦。」
 
Ellie捉住佢隻手:「點解啊？」
 
個男仔粒聲都唔出就跑走咗。
 
「你等埋我，你唔好跑啊。」Ellie繼續捉住佢隻手跟住佢跑，另外一隻手揸住個蛋糕。
 
Ex:「妖。」佢一手fing開Ellie捉住佢果隻手。
 
Ellie成個人失去平衡趺落地，成個蛋糕都污糟晒，佢果晚突登留空肚為嘅就係食嗰個蛋糕。
 
「之後果幾個月我日日都好唔開心，成日個心都好似un住un住痛咁。我果陣仲要同佢同班，日日見到佢真係生不如死，兩個月之後就見佢拖住隔離班嘅女仔。」Ellie一路控制住情緒一路講。
 


「屌，哩啲仔早飛早著啦。」果一刻我真係嬲到仆街。
 
Ellie嘆了口氣:「唉～所以你啱啱跑走果陣搞到我諗返起依件事，我份人好易冇安全感㗎，我覺得男人話走就走好自私。」
 
「我幫你打死佢喇。」我即刻扮TONY JAA上身，做出幾下肘擊揮拳。
 
「哈哈，死傻仔。」Ellie聽到後轉悲為喜。
 
「所以就算食唔到三哥，你都要等嗰個女仔！唔可以自己一個跑走。」Ellie又用食指好大力摼我個頭。
 
「痛啊。」我摸一摸自己個頭。
 
「傻仔，咁都話痛！不過同你講完成個人舒服晒～多謝你。」Ellie用好扭擰嘅語氣同我講。