我在補習社遇到一個令我難以忘懷的女生。: 五十七、健身健心

好快就到星期日，今日我同阿腳冇打波而係直接去佢會所做gym。
 
「where? 」阿腳send WhatsApp比我
 
「樓下。」
 
「ok依家落嚟。」
 
今次係我第一次去阿腳屋企樓下個會所，入面啲健身設施真係多到好似出面啲gym room咁，淨係啞鈴都有幾十個重量，仲有好多部跑步機。
 


好彩今日依個時間會所得一兩條友，如果太多人我哩啲新手會好驚行埋去做，而且每做一次就換人做好麻煩。
 
阿腳今日着到成身運動裝，身上面仲攞住健身沖奶粉水樽。
 
我問阿腳:「點個個健身嘅人都咁鍾意用哩類型嘅水樽嘅？」
 
「因為用普通水樽啲粉會倒瀉晒囉。」阿腳有啲驚訝我會咁問。
 
「哦……我一直以為用運動水樽型棍啲。」困擾咗我咁耐嘅問題終於比阿腳解決。
 


「做完整包奶粉比你試吓喇，不過依家做住動態熱身先。」
 
我跟阿腳做咗啲熱身動作，雙手畫圈、旋轉身體、開合跳、抬腿跳、抬手拉腿。好彩平時有打開波，做完都覺得冇乜問題。
 
「由於你每星期只係做一次，所以今日盡可能操晒成個身喇。」
 
「冇問題，做咩先？」
 
「其實冇話做咩先嘅，做啞鈴練二頭肌先喇，依個動作最易做，用雙手握實做彎舉，個人企直唔好成日郁前郁後，保持手肘唔好彎。」阿腳攞咗兩個17.5kg啞鈴示範比我睇。
 


我咁廢梗係攞7.5kg就算喇，因為佢有提我最緊要係嗰個位置嘅肌肉感受到有用力就得。
 
「之後果啲你睇吓佢貼住咗果啲示範圖喇，我去做翻我個訓練進度先。」
 
阿腳其實中學果陣身型好單薄，估唔到依家變成擁有鋼條型肌肉嘅型男。
 
「無問題。」佢走咗去做其他機，我就戴起耳機繼續做。
 
唔知點解聽住歌做gym成個世界好似耳根清淨晒，心無雜念。個人果一刻淨係知道要好好控制呼吸，用力做啱每一個動作，估唔到做gym都幾好玩。
 
之後我就做去啞鈴推胸，咁推胸我覺得7.5kg好似唔太感受到肌肉用力，所以就轉
咗用10kg。
 
「嘩，我咁樣望你唔似新手做喎，個重量同姿勢都幾好。」阿腳啱啱做完滑輪機行過嚟。
 


我講笑:「小心我遲啲有腹肌打死你。」
 
「清～你幾時幽默咗咁多，如果係以前既你一定會話「唔好串我喇，都係咁姐。」」阿腳嘲笑我。
 
「係咩……我都唔知點解。不過哩排真係少諗咗負面野，同埋內心把聲音好少出現咯！」我坐喺健身椅上面講。
 
阿腳:「咁咪幾好，一陣做完一齊去樓下食翻個蛋白質餐好冇？」
 
「咩蛋白質呀，講清楚好喎。」我同佢四目交投。
 
「你明ge～」阿腳奸笑望住我。
 
「頂你快啲搵女朋友喇。」
 
「係喎，你一陣操唔操腳？」


 
「做咩要操腳？上網胡師傅唔係話唔洗操腳嘅咩。」因為之前上網好多人都討論過有個健身師傅話唔洗練下身。
 
阿腳搖搖頭:「啲人講笑姐，你唔練下身你想變做小拳石呀？」
 
「咁又唔係，要點練同練啲咩？」
 
阿腳用健身教練tone:「嗱，練腳最主要就做弓步下蹲同埋深蹲，兩個加埋練到屎忽同大腿肌。」
 
我大惑不解:「練到個屎忽翹起晒咪成個gay佬咁，做咩要練？」
 
阿腳好串咁講:「你條友真係唔識喎。練大腿幫助到成身肌肉；練屎忽着褲又好睇啲，同埋……你一陣返屋企就明。」
 
「唉，你講到咁多益處咁就做喇，你示範比我睇吓。」我唯有無奈接受。
 


「睇住喇……」佢示範咗幾下深蹲比我睇。
 
做完成set野差唔多過咗兩個鐘，我就同佢就落樓下行去間日本餐廳食野。
 
我哋嗌咗兩份滑蛋親子雞肉飯，阿腳話個飯有成60g protein，夠我一日健身所吸收蛋白質量嘅一半。臨走前佢仲比咗個健身餐單我叫我跟住食，我份人咁懶當然唔會跟足喇。