我在補習社遇到一個令我難以忘懷的女生。: 五十三、大師，請開解

過多陣就對晒新作業，我腳步浮浮行去攞學生嘅file。
 
「？？？？點解今日P4-P6一份練習都冇嘅？今日我都見到最少有幾份交咗出嚟。」
 
之後經過classroom A見到Ellie坐咗喺度玩電話。
 
「點解你仲未走嘅？又想呃人工？」我打開門。
 
「哼……乜你諗到我咁衰，你自己睇吓出面喇，我半個鐘前打咗卡喇。」Ellie鼓起個腮仔發牢騷。
 


「咁啲練習呢？」
 
Ellie指住老師枱file:「一早幫你對晒喇，阿懵炳！」
 
我傻愣愣望住佢，一諗到佢自己咁忙都肯幫我做埋，感覺到眼淚好似想湧出嚟。
 
Ellie伸一伸懶腰:「行喇！我好掛住三哥嘅土匪雞翼！」
 
「咁你有冇掛住我呀？」當然我冇講出口。
 


「我仲要幫Patrick去買書喎。」我忽然醒起。
 
「三哥同書店好近姐，Go！Go！Go！」Ellie雙手推我出去classroom A。
 
「等我攞埋啲錢同打卡先喇！」我示意佢去出面㩒定𨋢等我。
 
「記得熄燈，熄printer呀！」佢喺門後面同我講。
 
「得喇得喇。」
 


一開門走已經發現佢開住𨋢門等我。
 
「快喇！我hold住部𨋢好耐喇！」Ellie不斷催促我。
 
鎖完門我就九秒九跑入𨋢。
 
我嘆氣:「呼～點解今日可以咁鬼死chur，我依家攰到個腦空晒諗唔到野。」
 
Ellie瞪大眼晴嘴嘟嘟:「係喎，你今日做咩發Kristy姐脾氣，佢果份功課好簡單昨！我原本以為你係唔識發脾氣嘅人嚟添。」
 
我心諗:「死喇！Ellie會唔會因為咁樣而扣我分呢？」
 
「唉～我都唔知呀。當刻講完已經覺得好內疚。」我表現得不自所措。
 
「人人都有需要發洩情緒嘅時侯，唔洗內疚嘅，不過下次唔好咁惡對小朋友啊！猶其係女仔，佢哋會記成世㗎！好似Kristy哩啲咁cool嘅女仔，其實好難打開自己心扉，可能果陣佢對補習社仲未有歸屬感。但你見到佢今年都比上年多野講咗，依家你咁鬧佢，佢又會收埋自己㗎喇。」Ellie好詳細同我分析Kristy嘅諗法。


 
「大師，咁我應該點氹佢好啊？」我用懇求嘅眼神望住佢。
 
「嗱～徒弟仔，氹人呢就個個人都有唔同方法嘅，有啲人會請食野，有啲人會講個好笑嘅笑話，不過最緊要都係……」Ellie欲言又止。
 
「係咩啊大師～小弟天性愚笨，但我定當竭盡所能，就算上刀山，落油鑊，都在所不措！請大師指點明燈。」我裝作好堅定嘅樣。
 
佢壓低自己把聲：「哈～哈～哈～答案就係……你啱啱已經搵到喇。」
 
「係咩啊……我今日個腦真係function唔到。」我已經放棄思考。
 
佢用食指摼一摼我個頭: 「傻仔，我氹咗佢喇，不過你都要同人講翻聲道歉啊。」
 
「知喇，大師～都唔知Patrick鬧完啲學生會唔會內疚。」聽到佢咁講我個心好似舒服咗啲。