我在補習社遇到一個令我難以忘懷的女生。: 五十二、新學年的Cls星期五

話說每個新學期，補習老師都會特別忙，因為有啲出版商會冇啦啦整個最新修訂版，或者學校會加幾本以前唔會用嘅作業，依個時侯腦細就要不斷問其他同行R作業答案，或者自己比錢買。
 
星期五果日我返三點，腦細今日因為要返夜校所以五點半就要走。
 
 「叮噹。」
 
「等等。」門後傳出一把我冇聽兩個星期嘅聲音。
 
「Hello, Ellie.」我笑容滿面講。
 


「Hello, William. 你返得咁準時啱晒喇，幫手做一做依幾分作業先，有兩本係kace，仲有一本係Casper。」佢喺classroom A攞咗幾本作業比我。
 
估唔到兩星期冇見今日一返嚟連閒計都傾唔到。
 
「等我打埋個卡先。」我急急腳放低書包然後行到打卡位。
 
Patrick見到我之後好心急:「喂，William快手做埋果本練習，我同Cindy五點半就要走，我對完啲英文功課就要準備去上堂。」
 
「okok……」今日嘅補習社好似戰場咁。
 


我望一望classroom B枱頭嘅功課堆咗成座山咁高，仲要有好多張要用人手對嘅功作紙。
 
我心諗:「What the fuck? 」
 
Mary見到我之後笑到見牙唔見眼:「Mr. William，祝你今日好運喇。」
 
Kristy出嚟放咗張常識工作紙喺我枱:「我有好多條唔識呀，果啲問題要上網搵，不過我唔想返屋企做喎，所以我圈咗比你喇。」
 
「唉～我一陣再私人教你，你唔好攞比我住。」我望一望啲功課，差啲覺得自己嘅理智線已經接近崩潰。
 


如果要形容果日嘅情況，就好似你返part-time廚師，一返到廚房換完衫就有幾個大廚叫你快快手做單。跟住你望住部出單機，發現啲單已經多到捲咗幾個圈，見到都想死。
 
「呼……呼…你得嘅。」我調整自己嘅呼吸。今日我嘅策略係對咗Mary、Kristy、學生C嘅功課先，因為應該好多都會啱晒，唔洗改完再彈返比佢哋。
 
過咗一粒鐘，終於對晒果三個學生嘅功課。
 
「William，你記住做一做新果啲作業answer，同埋一陣你放工順便去書店睇吓有冇呢幾本作業。我問唔到啲舊生借，我同Cindy走喇，拜拜。」Mr. Patrick入咗嚟放咗張寫有書list嘅memo紙。
 
「好，拜拜。」唔知點解新學年腦細比我嘅workload好似幾何級咁上升。
 
Kristy用好西嘅語氣:「喂，你對完我份野未呀？」
 
唔知係咪太大壓力嘅關係，我聽到佢催我之後扯晒火。
 
「你問夠未姐，你見唔見到我枱面有幾多野做呀小姐？老師都叫你返屋企做份功課，你依家比我做咩啊？仲有我忍咗你啲死人脾氣好耐喇，成日串串貢咁，你叻女係咪好巴閉呀？」我當時鬧佢嘅聲量應該成層都聽到。


 
Classroom A同classroom B頓時鴉雀無聲，因為我平時好少喺課室發咁大脾氣。
 
講完出口其實我已經內疚緊，因為我眼角窺視Kristy嘅時侯，留意到佢一言不發垂頭落淚。
 
依個時侯Ellie行咗入嚟問咩事，我講咗句唔好意思就繼續對功課，然後Kristy自己一個跑咗出去小息區坐。
 
「我去睇吓佢咩事先。」我同Ellie講。
 
「無事嘅。我去睇佢仲好喇，你快啲對功課喇。」Ellie走出去安慰Kristy。
 
我心情十分忐忑:「好，唔該晒你。」
 
「唔好望喇，繼續做功課！」我提醒其餘學生。
 


發完老脾後做野好似點都提唔起勁，仲要時不時偷望出面嘅情況，見到Kristy挨住喺Ellie嘅膊頭，而Ellie時不時都會拍吓佢背脊安撫佢。
 
過咗一陣Ellie就入嚟叫我比Kristy份功課佢做。其實之前返工果幾個月我都好少見到Ellie教學生時侯係點，因為tutor好多時都係背住門口坐。但今日我喺側面見到佢好細心咁教學生嘅樣，我腦入面只得一個答案形容Ellie──跌落凡間的天使。
 
做吓野好快就到八點，Ellie打開門:「喂，你走得未？」
 
我唉聲嘆氣:「未啊～仲有新出版果幾份作業同埋P4-P6啲練習，放工之後又要幫人買野。你走先喇，拜拜。」
 
「哦……辛苦喇，拜拜。」語畢Ellie就閂返埋門走咗。