我在補習社遇到一個令我難以忘懷的女生。: 五十一、新學期

過埋今個星期，小學生都要開始返學，姐係代表我都可以如常返工。最重要係Ellie都翻返嚟香港！
 
星期二夜晚Ellie喺ig story post咗自己喺香港國際機場，咁我梗係即刻reply佢喇。
 
「Welcome back~日本好玩？」
 
「好玩呀！遲啲比啲相比你睇吓。」
 
「好，你今個月返邊幾日？」
 


「我返星期三同五啊，你呢？」
 
「我返四同五。」
 
「頂！又要同你返星期五，你今年做野記住爽手啲喇。」
 
「我次次都做野快過你幾多～」
 
「你試吓教P1-P3果班啊。」
 


「不了，粗重野留返比你。」
 
我原本諗住同佢玩吓，但佢之後佢冇再應我，唔知我係咪又講錯野，可能係我不善辭令。
 
自從開咗ig之後，每日留意Ellie有冇ig story已經成為我嘅習慣。星期三果日我見到佢post咗個男人嘅背影，caption係:「今年多多指教喇。」
 
睇完之後有心如刀割嘅感覺，但我又唔敢問佢嗰個人係邊個。
 
今個星期我就返四同五，Michael就唔知返邊幾日。喺依度想提吓老細真係有遵守見工果陣嘅諾言，就係表現好就加我五蚊時薪，雖然唔係多，但見工果陣最怕啲in你嘅人講到個offer有幾好，每年加幾多錢，到最後都係開空頭支票，老細最少比其他人老實得多。
 


成個禮拜冇返工，真係幾掛住啲細路，所以星期四返到去即刻買咗漢堡包糖派比佢哋食。
 
「叮噹。」我㩒一㩒門鐘。
 
開門比我嗰個係Michael，佢今日着咗件白色恤衫，淺藍色牛仔長褲，仲要戴咗con，由以前文青look變到有少少陽光。
 
「嘩！你型棍咗咁多嘅，點追啊？」雖然我同佢講笑，但心入面其實有少少提子佢。
 
「多謝，除咗眼鏡姐，戴眼鏡冇咁方便。」
 
Cindy一見到我返嚟就好熱情:「hi~ William. You look so great today.」
 
我暗自竊喜:「thank you.」
 
之後都係如常入classroom b教班學生。


 
「Mr. William, 你今日唔同咗喎。」Kelly望住我講。
 
「咪又係咁，你哋今日有冇工作紙要做，比咗我影印先喇。」聽到之後我心裡暗爽。
 
「呀sir～你次次嚟都係着果件衫，果條長褲，新年有錢買衫啊？」Kristy講野真係一針見血。
 
「你哋唔好再討論我着咩衫喇，邊個今日再講就冇小息加冇漢堡包糖食。」我嘗試用老師哩個威嚴嘅身份控制場面。
 
Kelly好得戚:「琴日Ｍiss Ellie嚟果陣已經派晒手信比我哋食喇，一陣小息我哋可以自己出去攞！」
 
估唔到漢堡包糖都有被打敗嘅一日，我聽到之後即刻出去睇吓鮮紅色櫃入面有冇小食。一打開個櫃發現有兩盒白之戀人同幾盒香蕉糕，原來佢真係有買到翻嚟，不過唔知有冇我份。
 
「Michael，你忙唔忙呀？有啲野想問吓你？」我敲一敲Ａ班嘅房門。
 


「好，你等我改埋哩份練習先。」Michael示意我喺小息位置到等等。
 
「咩事？」佢行出嚟問我。
 
「er……想問呢，琴日Ellie係咪派晒手信比所有人呀？」我有啲唔好意思咁問。
 
「係呀，佢買晒啲小食比兩班學生，仲要每個人都有一個御守。」佢喺銀包攞
咗個印有「平病癒氣守」嘅御守出嚟。
 
「嘩……佢都幾有心喎，每個人都有一個。」我個心有啲妒忌Michael。
 
「……」或者我喺Ellie心目中地位並冇咁高。
 
Michael你夠喇！如果你擺個好幸福嘅死樣比我睇，耶穌都保你唔住，我話嘅！
 


「琴日每個學生都喺度討論緊自己支籤係點，不過佢哋淨係識睇係咩等第。」Michael好用心講晒琴日每個細節比我聽。
 
我好疑惑:「咩係等第？」
 
「姐係支籤係上中下邊樣囉。」
 
「哦…..唔該晒，唔阻你喇。」我好匆忙咁行返入classroom B。
 
聲音A:「手信個個都比晒喇，得你冇昨。」
 
聲音B:「你哩個星期都未見到佢，聽日見到可能就有㗎喇，唔好又灰心啊！」
 
聲音B講嘅野又有道理，都係等埋聽日結果再算。