我在補習社遇到一個令我難以忘懷的女生。: 四十八、新年快樂

每人新年都會訂一個新目標比自己，不過通常好快就唔記得，或者到年尾先會醒起自己一早半途而廢，所以之前果幾十年我都覺得訂立目標比自己係一件好戇居嘅事。不過今年，我就係果啲傻仔，我好希望今年同Ellie關係會再進一步。
 
「十、九、八、七、六、五、四、三、二、一，Happy New Year~」樓下公園倒數班人啲聲傳到上嚟我屋企。
 
「叮～」我電話喺枱面震咗吓，之前個幾年新年不嬲都冇人會send野比我，唔知今次係邊個send野比我呢？
 
「Happy new year～」+9434 0634傳送一則訊息到Patrick English Centre。
 
唉，原來係腦細，仲以為係Ellie send野比我，不過年年都習慣咗冇人同我講，果然沒有希望就沒有失望永遠是對的，過多幾分鐘我就開始瞓個靚教迎接新一年第一日。
 


「新年快樂，祝你今年心想事成，萬事如意，龍馬精神，過三爆四，快啲出pool，食親三哥都會留三隻雞翼比我食。」Ellie在0:05分傳送一則訊息給你。
 
「死咗？」Ellie在0:30分傳送一則訊息給你。
 
「你死喇，我仲未買手信！」Ellie在0:45分傳送一則訊息給你。
 
「你份手信係咁先拜拜。」Ellie在1:10分傳送一則訊息給你。
 
「屌你真係死咗。」Ellie在1:50分傳送一則訊息給你。
 


瞓教如果瞓得夠又冇醒過，專家都會稱之為一個好高質素嘅睡眠，我2017年第一日就經歷到，由12點瞓到11點都冇醒過，非常幸福。
 
起身第一件事當然係用手機上吓網。
 
「你有9則未讀訊息來自2個不同群組。」咁大個仔都未收過咁多message梗係唔上連登住即刻狗衝開WhatsApp睇喇。
 
「頂！仆街喇，我冇應到Ellie WhatsApp 添! 」我望住Ellie琴晚嘅message。
 
我喺張床到碌嚟碌去，收到佢message當然好開心，但諗起成晚冇覆佢又有啲灰。
 


「應該打咩覆佢好呢。」我喃喃自語。
 
「新年快樂，我祝你心想事成，萬事如意，過三爆四，愈嚟愈靚女！」
 
「唔好喇，我要手信呀！」
 
我同自己講:「真係好失策，點解唔可以遲多幾分鐘先瞓！」
 
聲音A:「係有緣冇份呀ching! 」
 
聲音B:「瞓早咗少少姐，佢唔會咁小氣嬲你。」
 
聲音A:「你都睇到人哋send咩比你㗎可？」
 
果日晏晝我好似望夫石咁，上網期間每五分鐘望住部手機，做家務又每五分鐘就望住部手機，等成日就係為一個message而生存。


 
聲音A:「mola～mola～」
 
聲音B:「可能佢咁啱出去玩未覆你姐。」
 
今次我選擇相信聲音B。
 
雖然話就話新一年，其實都係冇咩野做，我都係上網睇吓野咁過日辰。
 
「叮～」電話震咗一震。
 
「喂，你睇咗pre-reg result未呀？」阿腳傳送一則訊息給你。
 
「唉，仲以為係Ellie send message比我添，我未睇呀。」
 


「嘢～Mr. William你好衰㗎～返嚟等我喇BB豬。」
 
「想嘔呀屌！乜今年又偷跑咗咩？」
 
「偷跑咗十世喇，我今個sem禮拜四五day-off，正呀！」
 
「等我睇吓先。」我上網登入學校網站。
 
「屌！一日day-off都冇，仲要禮拜一至三都放五半，乜撚野時間表嚟㗎。」
 
「所以話大家都乞食科，點解你要讀晒銀時呢～又多堂上又遲放。」
 
「FK.」
 
星期四同五放11點半，即係我今個sem只可以返星期四同五喇。


 
我心諗:「唔知Ellie果間大學出咗pre-reg result未呢？希望我哋今年有一日可以一齊返工。」