我在補習社遇到一個令我難以忘懷的女生。: 四十九、新年新氣象

Ellie當日夜晚就有覆返我，不過都係話手信冇我份之類果啲說話，咁佢肯覆我有冇手信都無所謂喇。
 
人一訂立咗目標，頭幾個星期都會好有衝勁想跟住自個planning去做。咁我都唔例外喇，所以過咗幾日晏晝我就約阿腳出街買衫順手執一執自己個look。
 
「一陣三點出銅鑼灣行吓？」我send WhatsApp比阿腳。
 
「嘩你傻咗呀，出咁遠會死㗎喎！」
 
「又串我，咁去唔去阿？新年想買吓衫。」
 


「去～洗唔洗問Ellie鍾意邊件啊？」
 
「haha，三點世貿等喇。」
 
「ok。」
 
好快就去到三點鐘，我份人就非常準時，兩點五十幾分就到咗，阿腳就遲咗十幾分鐘先到，咁我就話自己去行陣先。
 
「where?」阿腳WhatsApp我。
 


「u記。」
 
毒撚行街買衫其實好多野避忌，就係怕啲sales狂sell野比你，如果嗰個sales係靚仔或者靚女會更加唔自在。
 
「喂，睇啱啲咩啊？」阿腳喺男裝部見到我睇緊衫。
 
「冇啊，我不嬲冇咩fashion sense, 所以先叫你嚟。」
 
其實阿腳算係半個佐助型毒撚，佢喺人群面前可以好正常同人相處，而且又識着衫，但佢偏偏鍾意自己一個人靜靜地諗野，中三果年我成日同佢放學都自己一個人射波，我哋果陣差唔多個個星期都打波，但到第二個月先開始同對方講第一句野。
 


佢好輕挑:「我都冇喎，櫃有咩衫咪着咩。」
 
「我想買一套可以又返工着到嘅，返學又着到，姐係兩個場合都唔會失禮人哋果啲
。」我講出我揀衫嘅條件比阿腳聽。
 
「Um… 依件OK？最百搭㗎喇。」佢攞起咗件重磅牛仔嬲放喺我身前面。
 
「好似出位咗啲喎……」我睇咗一眼之後繼續望其他衫。
 
「灰色厚磅hoodie？老實得嚟又易襯。」
 
「我個人本身都夠頹，想買啲精神少少但又唔太突出嘅衫。」我擰擰頭。
 
後嚟我先知買衫有一套哲學，件衫靚唔靚唔係最緊要，最緊要係你要不斷嘗試着唔同類型嘅衫，試得多先會搵到自己最啱嘅款同色。
 


「揀衫昨，唔係揀女朋友呀，試吓先喇。」阿腳遞咗件衫比我。
 
「好喇，就買依件喇。」我攞咗件Ｍ碼上身對一對位就諗都唔諗。
 
「頂，你試吓入fitting room試咗先決定喇，有時啲衫着上身先知有好多問題。」
 
喺我眼中，有翻咁上下買衫經驗嘅人先講得出依翻說話。
 
「唉，好喇。」我諗我都推搪唔到。
 
我喺fitting room搞咗幾分鐘就出翻嚟。
 
「點啊？」我有啲尷尬行出嚟。
 
「ok喎，着完個上身睇落大隻咗，不過件衫好似長咗少少，遲啲一齊做gym操橫少少個膊就fit晒。」佢個樣好似好滿意。


 
「咁就買依件喇，你後面仲有人排隊等緊試衫。」我催佢快啲走。
 
佢好似仲興奮過我：「等等先，你試埋依件深綠色恤衫順便着埋條黑色褲先喇，返工果陣一定成個人fresh晒！」
 
聽到返工啱着我梗係好快就攞入去試喇。
 
「點啊？我自己覺得好似偽文青咁。」我好唔自然行出嚟，雙手唔知放喺邊好。
 
「咁咪幾好睇，依家興藝文青啊！着恤衫最緊要練二頭三頭同個膊，啲肌肉線條若隱若現Ellie實鍾意。」阿腳好似知道我對嗰個人名著曬魔咁。
 
「好，我信你眼光就買晒三件。」我攞咗個籃裝住啲衫。
 
「Ｕ記算好平㗎喇，而且啲衫都叫有質素。」
 


睇完三件價錢都覺得係自己接受到範圍，所以就即刻比錢。
 
比完錢我哋就去咗阿活食個tea。