我在補習社遇到一個令我難以忘懷的女生。: 四十七、兩個男人的綠野失蹤（三）

我見到佢塊面開始有啲紅，唔知係佢開始醉定係邊爐嘅水蒸氣造成。
 
「其實呢，你真係好似以前嘅我咁。」佢忽然望住我。
 
我心諗:「如果我光頭好似張衛健咁靚仔，我人生應該少好多不必要嘅煩惱。」當然依啲說話當然唔適合哩個場面講。
 
「吓……點解咁講。」聽到之後我搞到毛管戙。
 
「我以前又係好似你怕怕羞羞咁，做咩都絲絲縮縮，淨係掛住讀書。好喇，我讀到書喇咁又點？咪又係做補習社，又要走佬去外國。我去外國讀書果陣冇溝過女呀！啲外國鬼妹成日同我講you’re so cute, you’ re so cute, 我都對佢哋冇任何反應。咁我以為係外國翻嚟一定吃香啲喇，一定會有女埋身。但原來去咗外國果幾年玩自閉，返到嚟竟然好驚同人social，依啲野唔係好似啪個制咁，你扭翻轉頭就冇事，有啲野耐咗真係入心入肺，好似一隻好臭嘅鞋，你落好多除味劑都洗唔走陣味。」佢講野好似有言外之意。
 


我唔係好明佢究竟想比說話我聽定同我訴苦，但我繼續聽。
 
「我廿幾歲果陣仲好相信未來一定係我㗎，等咗幾年，終於搵到個女朋友，拍咗幾年拖，諗住拉埋天窗結婚。果陣時我啱啱搞補習社，成副身家都放晒落去，你話邊有錢結婚？仲要啱啱搞起，咁多不確定因素。條女死都話要三十歲前結婚，佢話女人好怕身邊嘅朋友一個一個嫁出去，我叫佢比兩年時間我，佢話佢等唔到喎。終於過咗兩個月，我哋因為依個問題分手，之後我梗係未死心，相信哩個世界仲有其他女人，但等吓一年又一年，我都未遇到一個我真正愛嘅女人。」佢講講吓開始眼光泛淚。
 
「Patrick…唉…」今次係我第二次聽大人講佢哋愛情故事，上一次係阿媽。
 
我嘗試緩和氣氛:「你仲係黃金單身漢，大把師奶想搵你簽名喇，啲家長有時見到你我都feel到佢哋發晒姣咁。」
 
「……原來你都識尻嗡，講多啲呀，聽完好似舒服咗啲。」佢將眼淚鎖喺眼簾。
 


「頂，我講真㗎！我之前見到個家長話入嚟比錢交學費，佢又chok撚晒聲咁，坐完果張凳仲要濕撚晒呀！好彩我即時抹走啲水昨，如果個學生坐落張凳feel到自己pat pat濕晒一定鬼剎咁嘈! 」我開始發揮自己嘅吹水能力。
 
「仲有呀！如果嗰個係Casper坐落去，佢一定唔敢出聲，然後偷偷哋坐翻埋位扮冇事，你諗吓佢作賊心虛個樣幾搞笑。」我開始用盡腦細胞氹一個大我二十幾年嘅人。
 
「哈哈，我諗到佢隻死野做完啲衰野比人篤爆個樣真係幾好笑。」腦細嘅笑容好似雨後重見一絲陽光。
 
哈哈，張衛健笑吓咪幾型仔。
 
老實講，我唔知佢依一刻嘅笑容係真定係假，但你感受到身邊有人嘗試安慰你而做出令你驚喜嘅事，的確係幾值得開心，真假都唔緊要喇！我哋嘅生活何嘗唔係呃呃氹氹就一生。
 


完咗依個話題，我哋都準備埋單走人，當然係老細請啦，果一晚之後我同Patrick嘅關係好似唔係淨係上司同下屬，可能有多另一種關係──朋友。
 
「喂！你行唔行到直線㗎。」我笑住問佢。
 
「飲得少少酒我會醉咩？」佢立即跟住地下嘅直線裂縫行。
 
「唉～知你叻喇，係咁先，拜拜。」我向佢揮一揮手。
 
「拜拜。」佢做出敬禮手勢，然後再用力將隻手fing出去。
 
喺行返去搭巴士果段路，通常我都會思考人生。唔知咩原因我好似覺得自己冇再咁怕同人相處。
 
聲音Ａ:「你依排好似開心咗好多喎，不過開心都係因為壞事未發生姐～」
 
聲音Ｂ:「開心啲咪好囉，你有冇發現今日你個人識發光？」


 
果兩把聲音又喺冇人嘅時侯影響我思緒。
 
為咗唔好再諗咁多野，我今次選擇聽歌嚟消除自己咁複雜嘅思緒。
 
哩排我好似撞咗邪咁，日日都會聽幾十次Ellie手機鈴聲果首歌，我成日都想深究點解佢會聽依首歌，但線索太少，就好似零零碎碎嘅拼圖。