我在補習社遇到一個令我難以忘懷的女生。: 四十六、兩個男人的綠野失蹤（二）

「咩事呀Patrick？」我將嚿肥牛放入口。
 
「我之前係咪話要返夜校嘅，有時返返吓補習社又冇啦啦走咗人，其實我係為未來鋪緊路。」腦細個樣好愁飲咗好大啖啤酒。
 
「鋪咩路呀？」我目瞪口呆望住佢。
 
Patrick壓着嗓子:「我喺IVE讀咗兩年幾水電技工喇，讀埋今年就畢業。」
 
「幾好呀，恭喜晒！你係唔係想我嚟睇你畢業禮呀？不過學生睇住個老闆畢業都幾搞笑……」我諗到個畫面忍唔住笑搞到差啲濁親。
 


「我今年8、9月就要移民英國喇，我中學喺果邊讀書，都叫做適應果邊嘅環境，要重新生活唔難，又有本BNO揸手，果邊啲下水喉管好缺乏維修工人㗎，我讀完依個課程喺London再邊做邊學多兩年就應該可以攞返個牌。到時應該就可以成功移民喇。」腦細講依句嘅時侯好輕描淡寫。
 
當時我沒法作出任何思考，淨係默默觀察腦細嘅神情，一諗到老細做埋今年就要走內心都有啲空虛。但兩個男人唔通依家冇啦啦攬埋一舊喊咩。唔通我講我以後會珍惜你呀？依啲野女人就話容易講出口姐，男人咁做嘅話諗起都覺得好尷尬。
 
「恭喜晒，咁補習社班細路點啊？」我嘗試隱藏失落感。
 
「我做埋今年就會交比Cindy同佢啲外國朋友接手喇，如果你想做落去我會求吓Cindy比你留低。啲細路我都好唔捨得㗎，有啲由小學全科到中學到仲嚟我度補英文，真係由細睇到大㗎，我可能之後會搞啲活動同班細路玩吓，當留個留念囉。」腦細表情開始顯得有啲苦悶。
 
「出年可能我都要趕fyp或者搵intern做啦，都唔知仲返唔返到part-time補習。咁啲細路知唔知依件事？」我情緒突然又被佢影響。
 


「佢哋唔知㗎，得你同Cindy知。」
 
「你幾時有依個plan㗎？」我追問。
 
「講你都唔信，本來我讀哩個課程只係想有一技專長，我有條考牌癮。點知見到香港2012年開始搞到咁，就諗緊洗唔洗移民，咁啱我有個外國朋友同我講英國好缺水管維修技工，佢話啲本地人唔肯做依行喎，咁我咪決定走過去做二級公民囉。」
 
「哦……」我默默點頭。
 
我忽然醒起:「咁補習社咪要改名？」
 


Patrick:「依啲事小喇，比幾千蚊搞掂。」
 
「唉，都唔差在講埋，我以前喺果邊讀書嘅事跡比你聽啊。」腦細好似講到有啲興起，所以我都無謂打斷佢條癮。
 
「我中學就去到London讀書，讀high school果陣數學仲教緊代數昨，見好多鬼佬唔識一元二次方程真係好好笑，我依家啲英文都係果陣浸返嚟。」佢好開心憶敘當年往事。
 
我暗諷佢:「去得英國讀書你身家一定有翻咁上下喇。」
 
「唔係喎，果陣好多外國人都歧視亞洲人㗎，我果幾年除咗周圍去就喺係唐人街生活打工。」　　　　　
 
「你打咩工㗎？」
 
「我喺中國餐廳做廚師仔，但果陣我淨係識整意粉昨！第一日返工個大廚就叫我入廚房整炒飯比人食。我睇咗其他師傅點整之後，就自己學整，當時炒飯拋個鑊都唔夠力，我炒完死死氣攞出去，點知個大廚叫我比佢試食一啖先，試完之後佢好似Gordon Ramsay咁屌到我上天花板，我頭三個月都係冇人工㗎，因為佢話會喺浪費咗嘅食材度扣。」
 
「咁痴線你都仲做！？」我真心為老細覺得唔忿氣。


 
「冇計喇，細個比人烚到上心口都唔識反抗。」佢開咗第二罐啤酒。