我在補習社遇到一個令我難以忘懷的女生。: 三十九、講故佬

「嗰三個學生去咗網吧打機，我搵咗半個鐘都搵唔到，之後見到有班着校服上去嘅後生仔。靈機一觸之下，咪估吓佢哋應該都喺到果度囉。」我嘗試組織慢慢講。
 
「係咩，點解你會去網吧搵嘅？」Ellie眼光好似將我望穿。
 
「……有咩點解，啱啱咪講咗原因囉。」我表現得有啲緊張。
 
「係咪你去帶壞晒佢哋昨，你知喇你又有食煙嘅。」Ellie嘴藐藐咁望住我。
 
「？？？ 」我擺出一個Confused Nick Young嘅樣。
 


「Michael同我講咗喇，你話你去後樓梯倒垃圾，其實就係去食煙，我初頭都唔信㗎，你份人又唔似會食煙咁，不過有次我見你啲牙好似有啲黃咁，我就信喇。我就最憎男仔食煙，一食煙真係會扣晒分。講！你果次食咗幾多枝煙。」Ellie不斷chur住我。
 
「嗱，首先我係冇食煙嚟，你估我係凱婷咩。牙齒黃我都唔想㗎。至於點解我要去半個鐘呢……」我反應變得遲頓。
 
Ellie諗咗一陣:「好，我信你冇食煙，咁點解你要去成半個鐘咁耐啊？喺後樓梯半個鐘做咩呀？你偷偷地……打飛機呀？估唔到你有咁嘅廦好。 」
 
佢一輪嘴係咁講，唔比我有回覆空間。
 
我聽到之後喺到傻笑，打飛機點解唔去廁所要去後樓梯啊？貪果度夠陰涼咩。
 


Ellie望到我個反應:「我嘅推斷非常合理，法官大人我冇野補充喇。」Ellie抱住雙手凝視放喺我地中間個書包。

我諗佢應該當咗個書包係法官……
 
哩個時侯我又同Ellie開始玩角色扮演喇，唔知點解我同佢好有默契知道大家幾時會開始做咩角色，最好笑係我地會互相配合，唔會篤穿大家。
 
答依個問題之前，我諗起腦細叫我唔好講佢有食煙，因為驚影響補習社形象。而我啱啱又同果三個學生去完網吧，如果一陣佢再追問我點解補習社有煙味，我就可以話係佢哋。
 
「因為我想偷懶，果日又冇咩野做呀，我見學生差唔多走晒，咁補習社又有cam，去廁所太耐又驚有人敲門，所以咪出去後樓梯偷懶囉！」我犯咗一個講大話嘅人常犯錯誤，就係愈解釋得多細節愈容易穿幫，不過好彩佢相信。
 


Ellie聽到之後微微點頭:「…唔…好似有幾合理，冇咩破綻。」
 
「咩叫冇咩破綻呀！我今次講嘅野珍珠都冇咁真！我講野不嬲都牙齒當金洗！」我聽到之後好大反應。
 
Ellie聽到之後恥笑:「你牙齒當金洗點解都會咁黃呀？」
 
聽到佢咁講我真係好頹，差啲控制唔到面部表情。
 
我順勢扮個sad樣望住中間個書包:「咁控方律師可以撤控未啊? 」
 
「嘻嘻，我宣佈將案件押後至兩星期等侯控辨雙方陳詞。」Ellie突然法官上身做出退庭動作，握實拳頭喺空中上下揮動。
 
我望到之後個身忽然㷫恰恰，Ellie你知唔知你依個動作好意淫啊，係男人望住都會諗到衰野。
 
「咁你哋喺網吧有冇打機呀？」Ellie繼續追問。


 
「有......」我如實講啱啱發生晒件事，仲講咗個MK仔點樣兇我。
 
「哈哈，咁鬼好笑嘅，你同佢哋有冇打交呀。」Ellie聽到之後笑到面部抽蓄。
 
「我依啲文人係唔會咁易同人打架，特別係對MK仔，無視佢哋就得喇。」我開始化身吹神。
 
「文人……唔好話你淆底唔敢同人打。」Ellie個樣好似唔相信我講嘅野。
 
「你好想我打架受傷咩？」我好真誠問佢。
 
佢好似比我嚇親:「……你打架啲學生點啊？」
 
「咪係囉，我係一個顧全大局嘅男人！」我胸有成竹咁講。
 


「哈哈，你係咩？」Ellie不屑一笑。
 
喺佢笑嘅時侯我見到佢個櫻桃小嘴有啲乾痕同埋笑果陣個嘴唇卡咗一下。
 
「你等等先，我去買啲野，好快返！」我攞咗個銀包離開艘船。
 
Ellie坐喺度:「好……」
 
過咗一分鐘我就攞咗一包檸檬茶翻去架船仔。
 
Ellie望住我手上包檸檬茶嘴藐藐:「淨係買比自己飲，自私佬。」
 
「邊有話唔係買比你姐？」我遞咗包檸檬茶比佢。
 
Ellie諗咗一陣先決定攞包野飲:「多謝喎。」



「講！係咪想賄賂我！」Ellie裝兇作勢扮攞住把刀。
 
「……」佢突然神經質嘅反應搞到我哭笑不得。
 
Ellie望住個書包:「法官大人，我要求傳召緊急法庭，處理辨方律師疑似用一包檸檬茶賄賂我。」
 
我聽到之後忍唔住笑:「唔玩喇。」
 
Ellie嘟住嘴瞪大眼望住我，但係冇講任何野，個樣顯得有啲弱智。
 
過咗幾秒之後，我忍唔住繼續同佢玩扮演角色:「法官大人啊，控方律師話我隻牙黃，點敢飲啊？」
 
Ellie聽到之後咗包檸檬茶比我，好似等緊我回應。
 


我塊面又好似比針拮咁，但係今次我決定捉緊機會，傾前個頭飲佢包檸檬茶，原來同女仔飲同一包野嘅感覺係咁。
 
「又話驚牙黃你又飲？」Ellie笑住窒我。
 
比佢咁樣講完又真係駁唔到。之後我哋dead air咗一分鐘，果一分鐘真係好漫長。