我在補習社遇到一個令我難以忘懷的女生。: 三十八、棋局

同三位學生道別之後，我就同腦細講我已經完成任務，我亦。
 
「三個學生已有家長接送回家。」我send WhatsApp比腦細。
 
「唔該晒你。估唔到佢哋平時咁乖，真係搞到我趺晒眼鏡。」
 
「最緊要人冇事。」
 
送走佢哋之後諗返家長嘅反應，我竟然有種做咗好事嘅感覺。可能我開始鍾意補習老師依份工作。
 


送完佢哋都八點幾，一個人嘅我梗係行去食阿活啦。
 
今日嘅阿活特別多情侶一齊打邊爐，不過單身咗廿年都已經開始免疫到哩啲白色閃光。
 
每次食完阿活都有種好滿足嘅感覺，再加上今日做完好事，個人諗野都正面咗好多。
 
見今日心情咁好我就決定去海濱散吓步，還掂返屋企都係冇野做。
 
星期五夜晚嘅海濱好熱鬧，好多人喺跑步徑做運動，幾對小情侶喺樹蔭下纏綿，一班阿伯喺涼亭捉象棋，氣氛非常和諧。
 


小學果陣我成日都會同啲同學捉棋，大過咗已經冇再接觸象棋，我被眾多阿伯圍觀棋局嘅景象所吸引，向涼亭方向走去。
 
「唔……」一個帶住眼鏡阿伯托住頭望住棋局。
 
「你咁樣行咪戇居囉，邊有人用隻車換馬比人dip返咁戇居。」
 
「噓，旁觀者不得依牙鬆槓。」一個戴住橙色帽嘅阿叔低下頭，雙眼怒啤出言之人。
 
參與戰局兩個人都好專心望盤棋乜都冇講過。
 


「兩隻炮，再加隻馬，你冇棋喇！」
 
「等等先。」
 
「你要上隻士kick住我馬腳，咁我隻車咪抽到最底再將你軍囉，你點行都冇棋㗎喇。」
 
「唔……依局唔計，再嚟過！」
 
其他人:「哈哈哈。」
 
我心諗:「果然係一盤好棋，個男人沉住氣冇比其他人騷擾到，真男人就應該係咁。」
 
睇咗一陣我就行開咗，離遠我見到有個女仔係咁截停其他路過嘅人，好似啲sales喺咁問人野，所以我就烏低個頭笠住衛衣頂帽希望佢唔會問到我。
 
「先生，你有冇見過哩三個男仔呀？」一把好熟悉嘅女仔聲音傳到耳邊。


 
我抬起頭:「Ellie！？」
 
Ellie好驚訝:「William？點解你會係到嘅，你有冇搵到果三個學生呀？」
 
「一早搵到喇，Patrick唔係叫你同Michael一齊搵咩？」我見到佢仍然有啲尷尬。
 
Ellie好心急捉住我隻手:「佢要考試呀，你快啲講你點搵到佢哋。」
 
「……」我望住佢捉住我隻手，塊面又好似紅比針拮咁。
 
「唔好意思。」Ellie即刻鬆開手。
 
Ellie啊，其實你可以捉耐啲㗎。
 


我同佢行咗去一個用船做設計原型嘅涼亭坐，架船就好似帳篷，船艙入口就好似冇拉拉鏈嘅帳篷。
 
我同佢對住坐，之後開始講啱啱同果三位學生嘅事。
 
「你應承我唔好同Patrick講。」我伸一伸手指尾。
 
「好啊。」Ellie主動伸隻手指尾勾住。
 
「好啦。事源…」我深呼吸之後將件事嘅來龍去脈慢慢講。
 
「喂，你都未蓋印。」Ellie伸隻手指公示意我做同樣動作。
 
「咁麻煩……」不過佢講完我都照做。
 
「得喇得喇，快啲講喇！」手臂留下一條條抓痕，睇嚟Ellie真係好心急。