我在補習社遇到一個令我難以忘懷的女生。: 三十七、師生聯盟

我襯LOAD入遊戲嘅空檔去咗雪櫃攞三包野飲比學生，杯麵咁麻煩就費時攞。
 
「喂，又係果條雷友喎。」啱啱屌我個MK仔講。
 
我手攞住三包野飲望住佢個外形，米六幾，高筒timberland，瀨屎褲仲有個鳩毛獅王頭。
 
「望咩呀雷友。」佢向我吐煙。
 
「……」我怒啤佢，心中怒火已經蔓延全身。
 


「屌，你仲望喎。」MK開始玩弄雙手手骨。
 
我放低手上三包檸檬茶，除低身上嘅恤衫。
 
「係咪想打架呀？」MK使勁將煙頭掉向地下。
 
MK仔入面佢都算臭串，真係忍唔住想幫佢上翻一堂格鬥課。
 
「屌，條友啞㗎，唔好理佢喇。」另一個MK仔示意佢一齊出門口出面煲煙。
 


之後條MK仔「超」咗我一聲就走咗，依場MK仔網吧大戰毒撚嘅格鬥始終都冇開始，買咗飛入場嘅觀眾真係唔好意思! 但我想喺到重申:我冇打佢絕對唔關我冇腹肌事！
 
返到去我部機，學生Ｃ就催我:「呀sir，開咗波成分鐘喇！」
 
「得啦嚟啦，唔好意思! 」我擺低三盒野飲喺佢地枱面埋就嗱嗱臨埋位。
 
「呀sir，你肯企前面未呀？玩坦都企咁後。」學生B投訴。
 
「屌你等等先得唔得呀，辛吉德未到6lv生存能力好低㗎。」我好high咁應佢。
 


學生C無啦啦好正經:「呀sir，唔好講粗口喇。」
 
由於平時喺補習社係唔可以講粗口，但可能我都玩得好投入唔記得咗，雖然喺網吧講無所謂，但係佢哋都仲係一班小學生所以就費事喇。
 
玩咗二十分鐘就差唔多完場，我望一望手機睇時間，發現仲有十五分鐘，時間果然預算得非常好。
 
我拍一拍佢哋張電競椅:「差唔多喇，咪再玩喇。」
 
佢哋都幾聽話好快就熄機跟我落去樓下。
 
學生A落到樓下即刻伸展筋骨:「好肚餓，好想食Ｍ記啊。」
 
「食咩Ｍ記啊，食魚蛋燒賣啦，呀Sir請。」我雙手推學生Ａ行去小食鋪。
 
我哋喺小食鋪買咗三十蚊魚蛋燒賣。


 
我分咗三兜攞喺手:「嗱，你哋啱啱去邊嚟？做咗啲乜嚟？一陣要同屋企人講咩？逐個逐個答我。」
 
「旺角，去睇模型，對唔住呀媽咪我下次唔會㗎啦。」學生A倒背如流講出好標準嘅答案。
 
「唔……」我好滿意咁點頭，然後好似耶穌分五餅二魚咁比兜野食佢哋。
 
之後行去Ｍ記段路我一直反反覆覆問佢哋嗰三條問題。
 
到咗目的地，我哋坐喺Ｍ記出面嘅涼亭仔等。無幾耐佢哋嘅家長就好急咁跑過嚟接佢哋嘅心肝寶貝:「唔該晒你呀sir，返去真係要好好教訓吓我個仔，不過點解你會知道佢三隻死野會去咗旺角嘅？」
 
聰明嘅我當然有所準備啦，我不嬲都係一個唔太鍾意風險，要萬事都有幾手準備嘅人嚟。
 
「冇呀，上堂聽到佢三個話放假好悶冇野做，話想出旺角睇玩具figure，咁咪搏下囉。」我𢲷一𢲷頭。
 


「係咪呀？」我瞪大眼睛望住三位學生。
 
「係呀。我哋下次唔會㗎喇。」三位學生同時鞠躬。
 
「唔該晒你呀，咁我哋返去先喇，衰仔仲唔同呀sir講拜拜。」家長拍一拍學生Ａ背脊。
 
「拜拜 Mr. William. 」學生A笑住向我揮手。
 
「拜拜。」我同學生Ａ講。