我在補習社遇到一個令我難以忘懷的女生。: 三十六、英雄聯盟

我行去我身後面嘅B0、B1、B2號機睇吓會唔會係我啲學生，因為細路仔嘅聲音其實都好似，所以我唔係好認得出。
 
「Mr. William！？」學生A望到我之後嚇到彈起，好似小學生比訓導主任發現喺網吧咁。
 
學生Ｂ、Ｃ目定口呆望住我:「點解呀SIR你會喺度? 」
 
「喂，你幾條友放學都唔換件衫就嚟打機。仲有，你地屋企人唔知你地嚟咗網吧喎。」我用訓導老師嘅tone話佢哋。
 
「哈…哈…打埋依場先，好快昨，求吓你呀！」學生Ａ望住電腦螢幕講。
 


我望一望電腦螢幕嘅畫面，原來係英雄聯盟，哩隻game我之前都玩過，但我中五之後就冇玩喇。
 
遊戲時間: 34:20
 
我見到之後心軟同自己講:「都玩到三十幾分鐘，應該好快完姐。」
 
之後我企喺後面望住佢哋玩，作個藉口呃腦細:「佢哋去咗旺角睇玩具，依家同緊佢哋返嚟，你叫家長四十五分鐘後喺香港街果間Ｍ記門口等。」
 
腦細:「ok，唔該晒你。」
 


我烏低身喺佢哋耳邊講:「嗱，我就同Mr. Patrick講你哋去咗睇玩具，要九個字之後返，你哋一陣自己識點同人解釋喇，收唔收到呀！」
 
「收到！」三個學生好似用軍人式語氣答。
 
過咗幾分鐘，我見到佢哋輸咗，我就問:「走得未呀，我叫你哋屋企人八點喺M記等呀。」
 
「吓……依家先七點四，可唔可以玩多場啊?」學生B擰轉頭擺出一個楚楚可憐嘅樣。
 
「係囉……我好勁㗎，對面好快20分鐘FF，一定有時間剩㗎！」學生Ａ捉住我隻手不停fing。
 


「我哋開咗兩個鐘機，依家先玩得半個鐘，求吓你喇。」學生C懇求我。
 
古有少林足球三大弟子，黃一飛（大師兄）、莫美林（二師兄）、田啟文（三師兄，田雞），三位師兄各懷武功蓋世嘅絕技，喺我眼前嘅Ｂ班三大弟子居然對住機械鍵盤啪啪啪，仲要求我同佢哋一齊玩，講出嚟真係貽笑大方，你叫師兄列宗列祖點死得眼閉呀陰公，比心機讀書啦𡃁仔！估唔到我教嘅B班三大弟子為人係咁，差啲想講個事實比腦細聽等佢哋被逐出師門！
 
正當我考慮接唔接受佢哋要求，內心劇場又開始上映。
 
聲音Ａ:「玩場ARAM都夠時間啦，咁早去食風呀？出面十幾度昨大佬。」
 
聲音Ｂ:「快啲走喇，依度好雜㗎，小學生唔應該嚟依啲地方。」
 
聲音Ａ:「，打個機有幾曳呀？同埋你比咗50蚊買個足不出戶餐唔係唔玩翻鋪呀? 」
 
聲音Ｂ:「你自己話事喇~ 班學生再咁玩上晒癮㗎喇。」
 
其實網吧距離Ｍ記只有三分鐘路程，依家過去又好似真係太早。


 
我望住佢地擰擰頭:「唉～好喇，玩場aram，快嘅。」
 
佢哋三個異口同聲:「多謝Mr. William! 」
 
我睇完學生A遊戲名之後加咗佢入場。
 
「寂寞x孤獨已進入房間。」
 
我望到佢個名之後對住個mon喪笑:「嘩，依家啲小學生已經咁撚MK嘅。」
 
之後佢邀請埋另外兩個學生入遊戲房間。
 
學生A:「Mr. William，點解你game名叫硬漢搜蜜洞嘅，有咩意思㗎？」
 


佢咁樣一提我先醒起依個係中四果陣改嘅game名，當時唔知點解改名嘅風氣好鍾意用揩音嘅咸濕字改遊戲名，同期嘅仲有咩安全處移除下體、奔走好很遠、忍者龜頭很大……咁我上網見到依個名幾得意，就改咗依個名。
 
我有啲心虛:「唉～你唔好理喇。」
 
學生A繼續追問:「講啦，點解嘅？」
 
我絞盡腦汁諗一諗:「咳咳……硬漢係形容一個好強壯嘅男人；搜即係尋找，搵嘅意思；蜜洞即係一個……好甜嘅窿……就係咁喇。」
 
「咩係好甜嘅窿？」學生Ｂ望住我好疑惑。
 
你呀sir我都未試過呀，點知姐！
 
「開波喇，㩒制喇！」我望住螢幕嘅確認提示，希望快啲結束話題。
 
「Yeah！Yeah！有得同呀sir打機，Woohoo～」學生B喺電腦面前手舞足蹈。


 
聽到學生B咁講，內心不禁有股刺熱感，畢竟中學之後，我都好耐冇同其他人一齊打機。