我在補習社遇到一個令我難以忘懷的女生。: 二十七、進步神速

跟住就係教Kristy四字成語，我就比咗啲例句要佢配對翻適當嘅字詞落去，佢做十題錯一兩題，話晒都係classroom B第二個叻嘅學生，實力當然有咁上下。不過估唔到腦細話佢成語唔掂原來就係依種程度，腦細對佢要求都幾高。
 
過咗一個鐘，都走咗一半學生，我就叫Kelly出嚟繼續做中文練習。
 
我向住classroom B方向叫:「我依家得閒喇Kelly，快啲出嚟做。」
 
Kelly聽到之後行出嚟:「係～等等。」
 
我:「啱啱果題答案係咩？」
 


Kelly胸有成竹答:「2、4、1、7、3、6、5。」
 
我望一望電腦入面份答案2、4、1、7、3、6、5。
 
「點解你會突然答啱晒？咁我整多幾題比你。」
 
Kelly眼神突然變得自信:「冇問題呀。」
 
我喺電腦搵咗十題放落個word檔然後print出嚟。
 


我遞咗份練習比佢:「你試吓做哩十題，做啱晒就可以即刻走。」
 
Kelly攞咗份野諗都唔諗就開始做。
 
過咗十五分鐘，佢就交份野比我。我一路望住電腦一路對答案，好得人驚嘅係佢竟然啱咗八題。於是我就懷疑佢係咪睇到我電腦嘅答案，我就坐埋去佢個位睇吓睇唔睇到電腦個mon。
 
Kelly有啲不滿:「我冇偷睇到呀。」
 
我o晒嘴望住佢:「點解你會啱咁多嘅？ 」
 


「啱啱Mary教完我，原來好簡單姐～」Kelly擺起一個好得戚嘅樣。
 
我望一望向Mary心諗:「好彩你係細路，如果唔係我諗要同你爭飯碗。」
 
咁腦細都有講過Mary有幾聰明，功課又啱晒，成日做完練習默書就開始睇書，佢平時唔問我野我都冇咩留意佢，原來依個世界真係有隱世高人。
 
我遞另一份練習比佢:「Kelly見你咁叻，比你執野走喇，翻去記住做多幾題，如果聽日考試好似啱啱咁嘅表現，你就一定會攞好高分。」
 
Kelly伸一伸舌頭:「你要比翻八粒糖我食。」
 
「得啦，你進步咁多抵比嘅。」
 
我成日都諗點解Kristy同Kelly係兩姐妹，但表現可以差咁遠。點知今日先發現佢原來潛力無可限量，所以我以後都叫Mary教多啲Kelly，可能差唔多年紀嘅人溝通得好啲。
 
放咗佢走，望望個鐘原來已經七點半，班房得返一個學生，終於可以鬆口氣。


 
「William, 你走咗未？ 」突然間電話一震，原來係腦細send野比我。
 
「未。」
 
「幫我dum垃圾ok？ 」
 
「ok. 」我send完訊息就去垃圾桶抽起袋垃圾再打結。
 
「唔該晒。」