我在補習社遇到一個令我難以忘懷的女生。: 二十六、測驗考試

好快就到學生第一次測驗嘅日子，補習社啲tutors都忙都踢晒腳。
 
唔知係咪因為我同Ellie每兩星期先見一次，所以我同佢嘅關係維持喺忽遠忽近之間。每個星期都太多野做，再次抬起頭望出窗外已經天黑，大家都非常有默契冇提過一齊食飯，做晒野後各有各走。
 
我記得上個星期四，我嗰班嘅Kristy同Kelly第二日要考中文，所以腦細要我一對一幫佢哋，腦細就借咗自己張枱比我同學生溫習，因為佢部電腦有其他小學嘅mock卷。
 
「William辛苦晒，依排考試喺忙啲，拍硬檔呀。」Patrick神情異常沉重。
 
講完佢就話佢有野做要走先……
 


咁我都明白嘅，補習社之間競爭太大，同我哋同層隔離嗰間都係補習社，每次見到佢出面塊board都貼滿晒啲學生攞果啲進步獎，學業獎就知腦細有幾大壓力。
 
「明白嘅，我會盡力㗎喇。」我用堅定嘅眼神講。
 
嗰陣真喺做到唞唔到氣，就算急尿都唔想去廁所，因為一去廁所就會有好多學生排隊問問題，辛酸程度係你忍忍下尿就唔會覺得急。
 
Kristy最差就係四字成語，Kelly最差嘅部分就係句子排序。Kristy平時都已經好掂，我都唔係好擔佢，但對Kelly啲中文功課就好辛苦，因為最少要來來回回最少三次佢先會改啱晒。
 
咁我就叫佢哋各自針對自己唔識嘅範疇溫習，準備好就出嚟搵我喇。
 


Kelly喺classroom B嗌:「我溫好喇。」
 
我: 「出嚟呀。」
 
我攞咗份練習指住其中一題:「你試吓答依題。」
 
（）小巧玩得口渴了，買了一條雪條吃。
（）小合看見了，連忙把雪條棍撿起來。
（）同學們高興地在公園裹遊玩。
（）他們一起把雪條棍扔到垃圾桶裹。


（）他隨手就把雪條扔在地上。
（）小巧聽到後，覺得不好意思點點頭。
（）她對小巧說:「我們要保持公園的環境清潔，不要隨地扔垃圾。」
 
答案：2、4、1、7、3、6、5
 
Kelly坐喺我對面:「答案係4、2、3、7、1、6、5。」
 
我聽到之後眼都突埋，因為個次序好明顯亂排。我好冇耐性同佢講:「你有冇心想學㗎，冇我就唔教你喇。」
 
咁樣講係因為想激發佢重視吓今次練習。Kelly側一側頭:「咁我唔識呀ma。」
 
我聽到之後深一深呼吸:「應該點講好，嗱，做依啲題目首先要睇晒所有句子。你要sure你睇得明每句係唔係明白。跟住發生嘅事件由遠至近，好似你哩題咁，事件有一班人在公園玩、有人買雪條、有人扔雪條落地、有人撿起雪條。你要思考事件之間關係。最後當你寫完答案，睇一次個答案會唔會覺得好怪，順序有冇唔合理嘅地方。」
 
Kelly低頭望住題目：「哦……」


 
佢坐咗喺我面前五分鐘都未寫到答案出嚟，但有學生不斷出嚟問問題，我忍唔住同Kelly講:「你返去班房先喇溫多陣先喇，一陣再教你。」
 
Kelly扁晒嘴行返去班房:「……」
 
見到佢個樣好似蘊釀情緒想喊咁，我就同佢講:「答啱一題一包漢堡包糖，比心機喇。」
 
佢即刻擰轉頭笑:「好呀，Mr. William。」
 
其他出嚟問問題嘅學生聽到後即刻起哄:「Mr. William 我又要糖。」
 
學生啲反應嚇到我好緊張，我就做咗個噓嘅手勢叫佢哋安靜啲。
 
Cindy望住班學生:「Keep quiet. 」之後啲學生即刻安靜晒，果然老師有威嚴係非常重要。
 


等到啲學生返晒去班房，Cindy無啦啦撩我講野:「hey William, I think these kids like you so much. 」
 
我有啲怕羞:「huh……I don’t think so.」
 
Cindy放低手上嘅練習:「it’s real, Compared with Michael, they are happier to see you.」
                                                         
我有啲不知所措:「haha…… thank you.」
 
同小朋友相處係幾開心，因為佢哋反應係最直接最真，唔似其他人講句野都可能有幾種意思。
 
好似讀大學咁你想問人r source, 個個人都話冇，但最後大半班人啲assignment都係a range。問佢可唔可以借份NOTES抄返啱啱miss咗個part佢哋都會叫我問第二個。