我在補習社遇到一個令我難以忘懷的女生。: 二十五、三哥笑話

行到去巴士站，我坐咗喺欄杆上面，佢就企起到等車。個氣氛仍然好尷尬，因為我同佢都唔講野。
 
雖然我自己同人相處唔講野都冇乜問題，但係嗰刻唔知點解頂唔順，可能因為你知道對方嬲緊你。
 
「喂，唔講野會口臭㗎。」我偷偷地望咗佢一眼。
 
「………」佢都係唔講野，不過我見到佢聽到我講野之後好似有少少反應。
 
「好喇我都係收聲。」我對住空氣講。
 


「邊個同你玩？」佢好冷淡咁應我，然後望向另一邊。
 
「……」我繼續唔講野。
 
依個時侯我見到佢架480號巴士到咗，但佢冇上到車。
 
跟住我見到佢偷望我一下，然後又望翻前面，就好似一個細路女想你氹但唔講比你知。
 
老實講依個動作幾可愛。
 


「講個笑話嚟聽下。」佢背向我突然吐出一句。
 
「……」我腦內突然hang機。
 
佢見我冇作出任何回應，就鼓起小腮:「你聽唔聽到㗎？」
 
我好心急:「聽到，但我一時三刻點諗啊？ 」
 
「咁我繼續玩。」佢擰轉頭。
 


忽然間，我諗起之前上網睇到一個關於土匪雞翼嘅笑話。
 
我問Ellie:「你知唔知點解三哥啲土匪雞翼一係得三隻，一係就五隻？ 」
 
Ellie好認真:「因為銷售策略囉。」
 
我擰擰頭:「依個答案咁冇創意，點會係。」
 
佢托起頭，好細聲同自己講:「因為雞得三隻腳？ 唔係喎，兩碟土匪雞翼有五隻雞。」
 
喂你知唔知自己講緊咩呀大佬。
 
聽到之後我差啲噴水。跟住佢見到我笑就好激動叫我開估。
 
「唔……因為土匪雞翼係土匪，土匪係會三五成群嘅，所以咪只可以賣三隻或者五隻囉！」我好緊張望住佢等佢反應。


 
佢聽到之後好似有啲唔滿意:「痴線，個理由咁牽強，唔收貨呀。」
 
我都知一個答案未必夠喉，所以一早已經預備咗第二個答案。
 
我:「咳咳……咪就係因為一雙一對有翼咪會飛走囉，啲G飛走咗點食啊？」
 
佢聽到依個答案已經陰陰嘴笑:「依個答案都唔收貨喎。」
 
睇到佢反應就知唔洗再諗另一個答案。
 
笑完一輪之後又開始有啲尷尬，我就問佢:「咁耐都冇車嘅。」
 
佢有啲心虛:「係囉，都唔知揸車嗰個係咪瞓着咗。」
 


「係喎，咁你搭邊架車？ 」佢轉移話題。
 
「我搭73B號囉，咁耐一架車都冇。」我又講咗個大話。
 
無理由同佢講我搭480號或者689號，因為咁樣有機會要同佢一齊搭689號。所以我就話我搭73B巴士嘅。
 
我好驚同人突然之間變到咁friend，所有野嚟得太快好似唔太真實咁。可能我個人有啲變態，有開心野發生都會用負面角度諗先。
 
「哦……」佢好似有啲失望。
 
過咗幾分鐘，有架73Ｂ巴士嚟咗。
 
Ellie問我:「喂，架車埋站囉，你都唔上嘅？ 」
 
「係喎，咁我走先喇，拜拜。」我即刻跑上架巴士。


 
「拜拜。」
 
因為哩個大話我就要晒多半個鐘行翻返屋企，果日仲要咁夜收工，個頭有啲痛，真係攰到合埋眼就可以瞓著。
 
其實我有時都會諗，可唔可以唔好為咁小事而講大話，每次都立定決心，但每當人哋問我野嘅時侯，就會好似反射動作好自然講咗樣假野出嚟，成日講完出口都會諗如果對方知道咗會有咩反應，但通常都係向負面方向諗。