我在補習社遇到一個令我難以忘懷的女生。: 二十四、由悲轉喜（二）

去完廁所翻嚟，可能因為笑完個氣氛好似輕鬆咗，我見佢塊面嘅粒酒凹出猶如晨光再見，露出好雪白整齊嘅牙齒。
 
「係喎，上星期點解你唔返嘅？」Ellie繑埋雙手問我。
 
「我要做project。」比佢咁問，我成個人又緊起嚟，不過點解我會咁驚？
 
「你唔可以約第二日咩？ 」Ellie 飲住我買嘅黑糖薑茶問。
 
我嘆氣:「佢哋全部都星期五先得我咁無計喇。」
 


「咁你之後果啲星期五會唔會返？ 」佢嘴角郁咗一下，內心好似已經準備咗哩條問題好耐。
 
「應該一時時掛，查家宅咩。」我有啲厭煩。
 
「問吓又唔會少咗條毛，咁小氣嘅你。」Ellie有啲不忿。
 
「你係咪同Michael唔夾？我星期一四同Michael返，佢做野幾快手啊，有咩問題？ 」
 
Ellie提高聲線:「唔係啊，佢做野效率高，脾氣又好，又唔會似你咁小氣，同佢一齊返都合作得幾好。」
 


「哦……我去對埋啲練習先。」聽到佢咁讚其他人，唔知點解好想快啲逃離現場，於是我幫佢執埋啲垃圾。
 
「一陣一齊放工好唔好？ 」佢叫停我問。
 
我笑住講:「你係咪想我幫你對P1-P3啲練習昨？見你今日唔舒服好喇。 」可能我對自己突然唔見人兩星期，都要負返少少責任。
 
「……」佢呆咗幾秒，唔知佢諗緊咩呢？
 
「唔知點解我覺得你今日特別靚仔。」佢牙齒咬唇瞇住眼笑。
 


「……我去攞啲練習對先。」我緊張得好想快啲離開佢視線範圍。
 
跟住我攞咗半疊低年級嘅工作紙返埋位對，過咗半個鐘佢就問我做晒野未。
 
「我未走啊，你走先喇拜拜。」我望住堆練習講。
 
「咁我走先喇，拜拜William。」佢閂埋咗classroom B道門。
 
喺佢閂埋門嘅一刻，內心好似有啲空虛同失落。
 
聲音Ａ:「空虛寂寞凍啊~」
 
聲音B:「咁夜自己一個喺補習社做野，係唔開心㗎喇。」
 
過多十五分鐘，終於做晒今日嘅野，我伸一伸展手腳，鬆動筋骨，開門發現佢坐咗喺平時學生休息嘅位。


 
我好驚訝:「你做咩唔走嘅？ 」
 
佢笑住同我講:「等你啊ma。」
 
「……」我個心猶如小鹿亂撞，竟然比個女仔講啲咁暗示性嘅說話。
 
「你都冇鎖匙，我要鎖門唔通我自己走咗去咩。」Ellie見我冇反應再補充，期間雙手放喺腰後。
 
「哦……係喎。」我點點頭。
 
Ellie拍我膊頭:「行快啲喇，我今日叫咗呀媽留飯比我，我要返去食。」
 
我串佢:「你啱啱食完雞翼又食野，會唔會變死肥婆㗎？」
 


佢好大力搣我手臂:「好似係你肥啲喎。」
 
我尖叫:「啊～好痛啊。」
 
我諗有比女仔搣過手臂嘅都係幸福男仔，大部分都係因為果種痛依家已經成為一種值得回味嘅回憶，咁梗係唔包少部分Ｍ底或者個女仔好似真係想搣死你咁喇。
 
佢好得戚:「睇你都係唔識同女仔相處，女仔對肥字好敏感㗎。」
 
「得喇唔提喇。快啲行去巴士站。」我轉移話題。
 
佢有啲懷疑咁問:「……你又知我要去巴士站搭車？你跟蹤我嚟？」
 
一緊張果陣講野真係講多錯多。
 
「……咁…」我嘗試解釋。


 
佢聽到我講第一個字就不斷叫囂:「死變態佬，跟蹤狂，死變態佬! 」
 
我表現得好唔自然:「咁返去唔係搭巴士就係小巴㗎喇。」
 
「……變態佬，變態佬。」佢抬高頭細細聲係我耳邊講，濕潤微風送入耳仔，感覺有啲麻酥酥得嚟帶半點挑逗。
 
我心諗:「嘩，又嚟依招。」
 
跟住我擰埋個頭去一邊，佢就不斷keep住重覆依三隻字。
 
佢配合我嘅動作，彎低個頭由下而上望住我，露出燦爛笑容:「講笑昨，小氣鬼。」
 
為咗舒緩尷尬，我搵藉口串佢：「一開頭見到你以為你係好文靜果啲女仔，原來咁鬼死嘈，成隻開籠雀咁，如果你安靜翻少少會好啲。」
 


「………」佢即刻收起面上嘅笑容，就好似拉起直尺然後按下收回制。
 
我心諗女人變面變得咁快嘅。
 
之後我同佢行果段路都冇咩講過野，我仲要行喺佢後面。我唔知佢係咪嬲咗，加上我唔識tum人，所以都係少講野為妙。
 
由於放工行到去巴士站都十點幾，巴士班次好疏落，好耐先有一架車，我哋成程又以沉默作為相處方式。