我在補習社遇到一個令我難以忘懷的女生。: 二十三、由悲轉喜

陷阱已經settle down，依家要做嘅，只係等待獵物上釣。
 
為咗確保萬無一失，我每十五分鐘都會檢查吓果袋野有冇郁到。
 
第一次檢查……係冇收獲嘅。
 
第二次檢查……都係冇收獲。
 
過多五分鐘，我都差唔多做晒自己野準備走。
 


「篤篤。」我見到有一個身影喺B班門後。
 
有一把熟悉嘅聲音:「er……William, 你知唔知依袋野邊個家長送比我？ 」
 
我故作鎮定:「好似係kace媽咪，佢見個女依排啲默書成日一百分，所以想多謝補習老師。」
 
Ellie表情若有所思:「哦……原來係咁。」
 
我扮好奇問:「佢送咩比你呀？我都想有家長送野比我。」
 


「一杯好似過咗期嘅熱黑糖薑茶同埋好多蟻喺上面嘅雞翼，我諗應該唔食得，不如Dum咗佢好唔好？」Ellie一手攞起袋野，準備向垃圾桶方向前進。
 
我忍住笑:「咁又唔係幾好嘅，人哋一番心意唔好晒啦。」
 
Ellie似笑非笑:「但係唔食得都要照食？你估個家長係咪想毒死我？ 」
 
我努力控制自己笑容:「過咗期好似惹味啲。」
 
「都唔知你講咩，我dum啦。」Ellie離開B班班房門口。
 


「係喇係喇，係我買嘅，啲野食仲好Fresh㗎，襯熱食啦。」我宣佈計劃失敗，舉起一道白旗投降。
 
「嘻嘻，仲唔係我嬴，幾多錢啊比翻你。」Ellie好奸咁笑。
 
「唔洗喇，快啲食喇。」
 
Casper聞到香味好似餓鬼衝咗入嚟:「食咩啊，我又食。」
 
有時真係會懷疑Casper個鼻係咩構造，每次有好野食都會即刻過嚟。
 
我同Casper講:「好，你問吓Miss Ellie先。」
 
Ellie用手托住眉骨嘆氣:「又叫我Ｍiss Ellie……」
 
我𢲷一𢲷頭:「習慣咗，sorry。」


 
Casper洗完手Ellie就攞咗一隻筷子比佢拮住嚟食，食完之後佢屋企人啱啱好嚟到接走佢，而我同Ellie就留喺B班。
 
Ellie單手托住頭拮住雞翼:「點解你又知我唔舒服嘅?」
 
我扮到若無其事嘅樣:「你唔舒服咩？ 」
 
Ellie聽到後金睛火眼睥住我:「唉，係咪又玩呀？ 」
 
「唔玩喇。」估唔到佢今日咁有火氣，都係少啲惹到佢為妙。
 
Ellie放低咗隻雞翼向我方向探前身體:「快啲講喇。」
 
「………」佢突如其來嘅動作搞到我屏住呼吸，非常緊張。
 


佢繼續望住我，好似等緊一個答案咁。
 
「因為……MAGIC。」我舉起右手整咗個倒轉嘅OK手勢
 
「我屌你！！！」佢個樣比我逗到又笑又嬲咁。
 
佢無啦啦彈句粗口又幾搞笑，但我見到形勢好似唔係幾對路。
 
我好平淡:「冇…因為聽到kace講話你唔舒服，所以咪估你係咪女仔果啲野嚟囉。」
 
Ellie咬住舊雞翼:「哦……雖然我麻麻地薑茶，但飲啖熱野，個肚好暖，成個人啲血液好似順暢咗咁。」
 
我:「你食埋先講野喇！」
 
「得一隻筷子好難食到入面啲肉。」隻雞翼係佢口腔內不斷翻轉，仲要見到佢食到流口水。


 
我指住佢流咗口水嗰個位:「嘩你流晒口水出嚟好dirty。」
 
佢含住舊雞翼:「頂你，你示範比我睇點食。」
 
「我冇筷子。」我望一望個膠袋入面。
 
佢攞翻自己隻筷子出嚟比我:「嗱，你試吓。」
 
我自己唔鍾意同異性共用餐具，因為我有啲迷信「食咗人哋口水尾，以後就會聽人哋話。」
 
「你食唔到咪唔好勉強喇。」我望住佢不斷變形嘅嘴。
 
「你好多野講呀，快啲喇。」Ellie死都唔放棄。
 


跟住我就伸前個頭用個嘴一下就吸咗舊雞翼入口，好似洗衣機咁吮晒雞翼啲肉同軟骨，配埋好掙扎嘅面部表情，唔洗一分鐘就得翻兩條骨係個口入面吐翻出嚟，好似托也哥咁純熟吐翻啲骨同肉，然後講咗句:「多謝款待。」
 
佢睇完之後笑到抽搐咁:「哈哈哈，你唔好咁痴線喇，好污糟啊，真係傻嘅先會好似你咁食。」
 
「啊……笑笑下又覺得好痛。」佢徘徊喺又笑又痛苦嘅階段。
 
「好喇，唔玩lo。」我突然變翻嚴肅。
 
跟住佢話去一去廁所先。