我在補習社遇到一個令我難以忘懷的女生。: 十五、分組

唔重要嘅劇情就飛啦。好快到下個星期四。
 
話說間間大學reg科都有一個系統，就係比你pre-reg完之後，如果唔齊credit，就要喺add-drop period同人鬥快揀科。小弟喺pre-reg之後差3credit先完成今個學期要求，咁哩3cred就要讀除咗本科外嘅科，即係要同人鬥add-drop喇。點知小弟冇睇大學send email提邊段時期先係add-drop period，錯過咗黃金時期，我都係有次上堂見到人哋電腦係度揀緊科先記得。
 
「GEOG2007 兩份present，兩份paper &final ，好輕鬆，推薦！」我喺圖書館用緊電腦睇大學reg科攻略。
 
ＣＬＳ兩份present，兩份paper仲有final邊到輕鬆呀大佬，打果條友都唔知係咪個tutor自己嚟。
 
「MATH2637，一份mid-term，final，一份take-home assignment，workload好少。」我碌到去M字頭嘅course list.
 


好似幾正喎，跟住我就去數學系網頁睇吓果科教咩。
 
「Complex analysis……」望住螢幕顯示嘅課程內容，都係當我冇講過。
 
搵咗十分鐘都未搵到，於是決定搵科多人推薦又有位嘅就唔理三七廿一add咗先算。
 
「JOUR3627，一份小組report，一份take-home assignment，一份individual review，用中文讀冇考試，推薦！」
 
就依科喇，又多人讚又少workload，時間係星期四1130-230，落堂即刻返工都趕到。
 


今日上完自己major果堂就即刻趕去上啱啱新reg果一科。
 
入到去班房，果然多人推薦，已經坐滿晒成個班房，我就去最後面擔凳仔坐。
 
一位身型健碩嘅後生呀SIR攞起支咪:「新加入嚟嘅同學，上兩個星期add-drop period大家都決定我哋今個學期作業順序，先完成小組報告，之後再完成個人作業，而上兩個星期大家都已經分好組，未分好組嘅同學舉手。」
 
咁我當然舉手順便睇吓有邊個未分組喇，我望望兩邊，發現有兩女一男都冇舉手。
 
「你哋出一出嚟比個學號我。」呀SIR示意啱啱舉手嘅同學出嚟。
 


我依啲毒撚有人幫我分組就最好喇，唔洗比人拒絕覺得尷尬。
 
「13062470、1534202、14942431。」三個人用普通話依次序講出自己學號。
 
三個人都係NDS嚟嘅，大撚獲。
 
我不太情願：「14689777。」
 
呀SIR:「你們交換一下聯絡方式吧。」
 
其中一個女仔主動提出:「用微信吧，很方便。」
 
我用好爛嘅普通話：「我沒有微信，Facebook或是WhatsApp可以嗎？ 」
 
其中一人:「好吧……你們也有WhatsApp？ 」


 
三人:「有。」
 
呀sir見到我哋有大家嘅聯絡方法，就叫大家都返埋位坐。
 
哩堂講咩我都唔記得，不過落堂之後返去搭車，見到WhatsApp比人加咗入group。
 
「+6899 7779 新增了您。」
 
大家係群組介紹完自己個名就講吓Project點分工。
 
點知無啦啦有條友發神經話不如聽日放學一齊傾project，佢叫大家send自己個timetable出嚟夾時間，我哋組有三個人都係放1130，而另外一個人就星期五day off。
 
啱啱先分完組聽日就開始做，有冇咁chur呀大佬。
 


其中一個groupmate:「我們投票吧，誰贊成明天的？」
 
其他果兩條友都話聽日得，咁我冇理由唔得㗎ma，今日佢哋都就咗我用WhatsApp。之後day off條友話自己住宿舍，就提議聽日上佢宿舍做。
 
姐係我今日返工就要同腦細講今個星期五返唔到工。返到補習社，我就同腦細講返哩件事。
 
腦細:「OK我搵人頂住先，但你之後星期五都OK？因為我都要安排人手。」
 
「應該得掛。」我有啲唔肯定。
 
Patrick聽到後有少少激動:「咩叫應該得，得就得，唔得就唔得。」
 
我即刻怯一怯:「得……」