我在補習社遇到一個令我難以忘懷的女生。: 十四、遊車河

上到上層，我眼角望到一個好熟悉嘅身形。
 
聲音A:「唔係掛？應該唔係佢嚟，扮睇佢唔到，坐佢後面。」
 
聲音Ｂ:「係佢嚟，行埋去打招呼喇。」
 
我宣佈今次係聲音Ａ獲勝。
 
我就急急腳行去後面確認吓係咪佢嚟。
 


我坐咗喺巴士尾二果排嘅右手邊近窗口位，佢就坐係我前五排同一位置。
 
及肩嘅短頭髮，白色tee，側面嘅輪廓，加埋手臂果少少肥肉。電腦分析有89%係佢。
 
聲音A:「點解咁都會撞到㗎，唔知佢睇唔睇到我呢？ 」
 
聲音B:「你哋咁有緣，快啲坐埋去喇。」
 
聲音A:「你都知William唔信緣分依家野㗎，住附近搭同一架車有咩出奇，你睇吓佢喺邊落車仲好喇。」
 


聲音B:「今次你有道理。」
 
好少聽到心入面兩把聲音會有和議，我係咪攰到痴咗線。
 
坐喺我前面嘅佢戴住耳機，右手托住頭貼住窗，眼睛有少少困倦咁望向車外面，估唔到佢都有咁憂愁嘅一面。
 
我心諗唔知佢聽緊咩歌呢？
 
由以前到依家都覺得如果知道一個人手機嘅playlist，就會更加了解嗰個人，因為你揀每首歌，都會比自己感受、經驗、當刻嘅心情影響，唔同類型嘅歌組合成playlist就可以清楚知道你嘅心路歷程係點。
 


搭搭吓發現架巴士已經過咗我住果頭，咁佢應該唔係exactly住我附近。
 
「下一站，貝沙灣南灣，數碼港道，Bel-Air on the Peak，Cyberport Road. 」我見佢企起身準備落車，我即刻烏低自己個頭。
 
見到佢落咗車，我就即刻坐去左邊窗位望住佢。
 
原來佢咁有錢，住得貝沙灣啲樓最少要有二三千萬先入到場，同我依啲屋邨仔差太遠。
 
跟住我就開始聽住歌遊車河，由於啱啱巴士過咗我住果度，咁就要搭去總站再等架車去翻另一個方向。
 
夜晚搭巴士冇咩人聽住歌個感覺幾舒服。
 
返到屋企真係太攰了，所以沖完個涼就瞓著咗。