我在補習社遇到一個令我難以忘懷的女生。: 十六、宿舍

星期五放學之後我哋組三個人就去咗宿舍樓下等有住hall嗰個groupmate，簡稱佢叫Mable。
 
一落嚟見到佢着住hall tee，着住條黑色運動短褲，頭髮有少少亂，應該啱啱瞓醒，佢個外形係幾典型住hall嘅look。
 
Mable同保安揮一揮手示意佢開門比我哋，逐個逐拍完卡就跟佢上咗去佢住果層。
 
Mable:「待會你們安靜一些，有些宿友還未起床。」
 
眾人點頭:「好的。」
 


宿舍每層嘅佈局就係中間係lounge，兩邊係條走廊，房間左邊係1-15號，右邊就16-30號。
 
一開𨋢門見到lounge有塊好吸引我視線嘅招牌。
 
「九樓大Nine Nine，

多過維他奶。

男士們你哋奶唔奶?



奶啊奶！奶啊奶！」
 
我望望走廊兩側，即刻諗起秦沛張圖──「大奶奶呢？大奶奶去了哪裡？」
 
Lounge同走廊一個人都冇。
 
Mable:「我住在28號房，室友還未起床，我們安靜點吧。」
 
眾人:「沒問題。」
 


入到去佢間房，發現佢roommate瞓到大字型咁，兩隻腳擘開晒，雙手打交叉放喺頭後面，仲要伸咗半隻燒鵝脾出嚟。
 
隻鵝脾肥瘦適中，肌肉線條分明，而且大脾位置幾結實，算係一隻中上等嘅鵝脾。
 
驟眼睇個樣唔似nds，而且睡相都幾好。組員Ａ見到我望住咗隻腳咁耐，佢就幫室友隻鵝脾塞翻入張被。
 
粗重野交比我做啊麻。
 
之後佢哋三個就坐喺組員Ａ張床，我就話坐凳就得喇。由於組員Ａ又唔係好靚女，所以我都對佢張床冇咩幻想。
 
男組員B首先打開僵局:「好吧，我們開始分工吧。」
 
女組員C:「好，你們想做那一個部分呢？ 」
 
「我做前言和專題分析吧，那我做背景資料和專題分析，我選擇分析和總結。」佢哋三個各有各講。


 
最後一個部分得翻採訪相關學者。
 
我有啲無奈:「那我做……採訪相關學者和報告整合吧。」
 
「採訪相關學者要兩個人吧，我的表哥是記者，我們一起做吧。」Mable好似對我唔夠信任。
 
「那好吧。」
 
咁都好嘅，唔洗晒時間send email問人得唔得閒做訪問。
 
之後大家討論吓揀咩題目同細節，就人攞住部手提電腦開始工作。
 
佢roommate都幾勁，我哋喺度吱吱浸浸都冇醒到，只係間中有幾次個身翻嚟翻去發出「唔～」嘅聲。
 


話說我哋組果三個NDS做野真係有效率，唔知係咪NDS一齊做野就一拍即合。
 
由於我依家做唔到訪問，資料又未打晒，即係我冇咩野做，咁我就係咁四圍望吓打發時間。
 
其實如果要一個外來人估依間房係男定係女都易估到，成枱都係化妝品，護膚品同鏡，最驚訝係我發現佢roommate塊鏡後面有幾包Condom。
 
我心諗住hall會扑野果然係好平常，係我少見多怪姐。
 
Mable用唔咸唔淡嘅廣東話:「William呀，我哋不如傾下點約我表哥同埋安排呀？」
 
「好，咁你想幾時同埋邊度？ 」我擺起一個認真嘅樣。
 
佢又用翻普通話:「星期五吧，我那天day off，你可以嗎？ 」
 
我心諗你係咪知我要返工先約星期五呀大佬，但之後又諗到人哋都幫你約埋人做，咩都唔洗你做，唔應承好似好衰咁。


 
我有啲婉轉:「……好吧。」
 
佢拎起部iPhone打比佢表哥:「表哥啊，星期五可以見個面嗎？ 我學校有功課關於訪問的，我想問你的意見。 」
 
「嗯……嗯……下午五點，好吧。」
 
Mable又用廣東話同我講:「William呀，你星…星期五得唔得呀，晏晝五點啊。」
 
你喺電話都講到咁，我有得話唔得咩。
 
我有啲遲疑:「可以……」
 
即係我又返少日工。