我在補習社遇到一個令我難以忘懷的女生。: 十三、第一次對話

「叮噹。」我㩒一㩒門鐘。
 
Ellie好似海獅拍手咁:「辛苦晒。」
 
我將兩碗麵同雞翼放喺classroom B。
 
我就坐喺老師張凳，佢就坐喺功課做得慢嘅學生專用凳，即係我隔離。
 
正常人同人食飯一係並排坐，一係面對面坐。不過都好嘅，面對面我驚尷尬，二嚟又可以偷望到佢側面。
 


佢側面真係好靚，食飯果陣佢用雙手將頭髮輕輕撥喺耳仔後面，露出雪白嘅頸，下鄂線條又突出。近睇先發現原來佢今日有化個淡妝，有少少腮紅喺兩面頰。　
 
「做咩咁樣望住我？ 」米線散發出嚟嘅熱氣搞到Ellie塊面紅卜卜。
 
「……冇，仲唔快啲食。」我喺膠袋入面攞咗對筷子。       
 
「我唔客氣喇。」Ellie將筷子放係虎口位雙手合十。
 
「我食先喇。」我冇等佢，直接將筷子插落碗米線。
 


「唔得，你都要跟住我咁做。」佢解開我隻手攞起咗我對筷子。
 
「……」比佢嘅滑嫩小手捉住搞到我突然心跳加速。
 
我整個人渾身發熱，加上嘅熱辣辣米線令我更加失了方寸。
 
「我開一開冷氣先，好似好熱咁。」我用手扇撥啲風去自己條頸。
 
「好啊，我都比啲熱氣搞到流晒汗。」Ellie用手背印一印額頭上嘅汗。
 


望到佢食到啲汗流落條頸，我就喺書包攞包紙巾出嚟撕開一半。
 
「你流晒汗，洗唔洗抹下。」我遞咗張紙巾比佢。
 
Ellie用疑惑嘅眼神望住我:「唔該，你撕得咁好嘅，係咪平時撕開？」
 
我好真誠答:「好簡單姐，你對摺張紙巾，然後兩隻手反方向撕就得。」
 
「嗯，下次試下先。」
 
Ellie好似無啦啦醒起咗啲野咁:「係喎，下次你唔好再叫我Miss Ellie喇，唔知點解比個同齡人叫MISS感覺好好笑，你仲要咁認真講，搞到我都要叫你Mr. William，平時Michael都唔會咁叫我喇。」
 
唔知Michael會點叫佢呢？原來佢之前一直係笑呢樣野。
 
「咁叫你咩？」我好有禮貌問。


 
佢諗都冇諗:「Ellie喇，個個都咁叫我。」
 
我好爽快答應:「好。」
 
食食下Ellie好似有口難言咁。我眼角偷瞧，佢嘅表情顯得十分懊惱。
 
Ellie:「依度…有五隻雞翼，一人兩隻嘅話……咁最後嗰隻邊個食？ 」
 
通常女人咁樣問得傻嘅都知佢想食。
 
我用雙手托起碟雞翼:「Ellie，隻雞翼依家係屬於你㗎喇。」
 
「好野，醒目仔。」Ellie好開心將隻雞翼放入口。
 


「你食得咁唔乾淨嘅，骨同骨中間仲有肉。」我指住佢食完果兩隻雞翼。
 
佢伸一伸脷:「嘻嘻，果啲位咁難咬唔食喇。」
 
我突然開認真mode:「唔知點解好多人食雞翼都唔會食中間有肉果啲位，同埋兩邊嘅軟骨，依兩個部位係除咗雞皮之外最好食嘅位。」
 
Ellie有啲難為情:「咁……下次睇吓你點食先。」
 
「咁又唔洗。」我發現自己啱啱好似有啲嚴肅搞到氣氛有啲緊張。
 
「點解你咁鍾意食土匪雞翼嘅？」我好奇問佢。
 
「啲孜然粉香噴噴，黑芝麻增添咬口感，最緊要係啲雞翼皮脆肉嫩。」Ellie愈講個樣愈幸福。
 
「你真係好鍾意食喎。」我好專心望住佢食野嘅樣。


 
Ellie摸住個肚:「飽晒，食得好滿足。」
 
佢食完就執埋啲垃圾行出去後樓梯dum垃圾。咁我都返埋位做野，半個鐘我就對晒P4-P6啲練習。
 
而佢就仲有十幾份未對完，咁我就同佢講我走先喇。
 
「你等埋我得唔得呀，仲可以賺多十幾分鐘人工！」Ellie用懇求嘅語氣。
 
我心諗:「如果要一齊走咪又要諗話題，一陣冇野講會好尷尬，啱啱講野好似已經用晒所有諗到嘅話題。」
 
同埋我份人當同其他人無啦啦關係變好，就會主動保持翻一個適當距離。
 
我求其作咗個藉口:「我要幫呀媽買野，間野九點半就閂喇。」
 


「…好喇。」Ellie露出楚楚可憐嘅樣。
 
再望多一秒真係會回心轉意。
 
我雙手合十:「……唔好意思，我走先喇，辛苦晒，Ellie。」
 
Ellie嘆氣:「辛苦晒，拜拜。」
 
為咗唔好同佢撞到，我就急急腳走去巴士站等車，仲要專登揀前一個巴士站，咁就一定唔會撞到佢。
 
行到去巴士站，點知見到個三年冇見嘅中學同學，仲要咁多年嚟淨係問過功課問題，都唔知點同佢講野好。
 
中學男同學:「咦，你係咪William？ 」
 
我好尷尬:「係……」
 
「轉咗新look喎，個頭短咗咪幾好，唔洗好似以前咁，有個蓋吸住個頭咁，又拮眼又唔精神，不過你好攰？成個人都仲係咁頹。」
 
「返part-time攰姐。」我苦笑。
 
「你返咩㗎？ 都仲未畢業就咁快返工，好易老㗎，遲啲冇得你返咩。」佢連珠發炮問我，我都唔知點覆佢好。
 
我心諗關你鬼事咩，當然我都係冇講出口。
 
「補習。」
 
「好唔好搵㗎，依家啲細路咁叻，好惡教喎，私人定補習社。」佢起勢咁問。
 
「補習社。」
 
「啲學生曳唔曳？ 」
 
明明係個男人，點解問野問到成個女人咁，依一刻好似比佢強姦緊咁。
 
「少少喇。」我有啲耐煩
 
「依家啲學生係咁㗎喇，果陣我咁啲有19分升到Ｕ，依家我就好忙，又要上莊，又要RE-U，真係想搵個星期五可以休息。」
 
我係咪做錯咗啲咩。。。
 
依個時侯我見到有架480號巴士埋站。
 
我心諗有救喇！
 
「我有車，下次再講，拜拜。」我急急腳行去排隊等上車。
 
「下次成班中同約食飯呀，拜拜。」
 
「呼。」我上到車嘆咗口氣揀咗上層坐。
 
我份人好唔鍾意同人講野對方就不斷問問題，一啲都唔似同朋友傾計咁。