我在補習社遇到一個令我難以忘懷的女生。: 十二、食飯嗎？
之後兩個鐘冇停過咁改功課、對卷、默書，星期五多野做到真係懷疑人生。
做到7點半，終於得翻一個學生。
有時啲家長都幾變態，五點半送個仔嚟，六點半就想個仔做晒功課默好書做埋練習，你個仔曉飛都唔得喇。同埋補習社比起私補有個缺點，就係老師唔可以每分每秒跟進學生進度。
「今日早啲比你走喇，快啲打電話比屋企人。」我同學生A講。
學生Ａ好似當我神咁拜:「多謝Mr. William. 」
補習社其中一個規矩就係學生走之前要打比屋企人，等屋企人決定接佢定自己走。
「媽咪，我走得喇。」
「嗯，拜拜」學生Ａ掛斷電話。
學生A同我講:「今日我媽咪話自己走得喇。」
「小心啲，拜拜。」
送走佢之後就去攞啲練習同埋默書對。
經過classroom A見到Ellie扒喺張枱度，隔離仲要有成堆未對嘅工作紙。今次我冇猶豫就行咗入去Ａ班。我打開門放咗粒漢堡包糖喺佢隔離細細聲講:「今日辛苦晒喇。」
然後閂翻門唔好阻住佢訓，依家諗翻起都唔知點解當時會有咁嘅勇氣。而Cindy似乎都做晒今日嘅野準備離開。
Cindy問我:「Are you going to leave？ 」
「um… I need to mark all the worksheet first.」我諗咗一陣先答佢。
Cindy:「Oh, I see. Do remind Ellie to lock the door.」
我:「ok.」
跟住我返classroom B繼續做野，過咗無耐，我隻耳仔感受到一股濕濕的暖風，嗰陣風喺耳窿至耳蝸打轉，有啲麻酥酥嘅感覺。
「你 膊 頭 好 翻 啲 未 呀？ 」一隻字一隻字慢慢傳入我身體，我個身體不經意打震。
「嘩，你行路同開門都冇聲嘅。」我又比佢嚇到神經衰弱。
Ellie用調皮嘅語氣:「可能係你聽力差或者我係……鬼……呀！」
我似笑非笑:「好好多喇，不過你下次唔好再咁玩我喇。」
Ellie喺度玩手指:「你咁敏感嘅，哈哈。邊個叫你明明可以當面請我食糖又要做到咁鬼祟姐，我咪以其人之道，還治其人之身囉。」
「……你又知係我比你嘅？ 唔比係Cindy嘅咩。」我好尷尬咁搵藉口。
我真係好小嘅事都好鍾意講大話，對邊個都係。
「kace講晒比我聽喇，你咁鍾意口是心非得唔得㗎。咁大個人仲咁唔誠實。」Ellie用手掩住嘴笑。
「……」比佢咁樣挑逗，搞到我塊面又好似比針拮咁。
Ellie望住我張枱:「仲有成疊野未對完，你都唔會咁早走喇。」
我托一托頭:「梗係，星期一我又要返，今日唔對晒咪下星期辛苦自己。」
「咁…不如叫外賣上嚟食？ 」Ellie睜大眼睛等我回應。
「……好啊，你想食咩？ 」望住佢雙眼，發現自己沒有拒絕佢嘅能力。
「你諗喇。」
「我食咩都冇所謂，真嘅。」我好認真同佢講。
「我都唔知呀。」Ellie㩒緊手機。
我提議:「樓下間車仔麵？」
「我麻麻地。」
「對面間日本壽司？ 」
「我唔太鍾意食生冷野。」Ellie繼續ban我嘅選擇。
連女仔最鍾意嘅日本野都比人ban咗，神啊，依個世界究竟仲有咩可以食㗎？
依個時候我喺到傻笑。
「你做咩無啦啦笑呀痴線佬。」Ellie望到我佢都笑埋一份。
「冇啊……」我尷尷尬尬避開佢視線。
「講喇。」Ellie鼓起腮想扮咗個好惡嘅樣。
「我諗起之前討論區有個好搞笑嘅回覆姐。」我一講完依句又喺度傻笑。
「係咩啊？」Ellie個人突然坐正。
「我Hi喇 我問你想食乜 你話唔知 好喇 你決定唔到 我決定喇 你又bam勁我 咁你決定囉 你又話唔知 然後無限loop 所以話女人真係麻勁煩 利申 發洩下only。」我純熟咁背起討論區嘅金句。
Ellie聽到之後皺皺眉頭:「你係咪姐串緊我呀？」
我有啲唔好意思:「最後果句先係重點。」
我講完哩句之後冷場咗半分鐘。
我絞盡腦汁:「不如食三哥，又夠近。」
「好啊，乜你諗咁耐嘅。」佢好快應我。
「……」我嘆咗口氣。
Ellie用牙齒咬住下唇問我:「你食唔食土匪雞翼㗎。」
「我食㗎，做咩。」
佢好似唸急口令:「咁你打電話過去喇，我想食魚片頭墨丸三小辣，東檸茶少冰少甜。」
睇嚟佢應該平時食開三哥，啱啱一開頭講咪幾好……
我上網google三哥個電話號碼:「喂，係咪ＸＸ街ＸＸ號果間譚仔三哥？ 」
電話入面嘅阿姐:「係呀。」
「我想要一碗墨丸魚片頭三小辣，一碗墨丸魚腐清湯，兩杯凍檸茶少冰少甜，仲有要五隻土匪雞翼呀唔該。」
電話入面嘅阿姐:「十分鐘後嚟攞。」
「好。」我掛斷電話。
「原來你食米線叫清湯㗎。」Ellie有啲驚訝。
「有咩問題？」我好嚴肅問佢。
「冇……我好少聽人食米線食清湯姐。」
我扮女人聲應佢:「咁我唔食得辣ar ma。」
Ellie用把阿叔嘅聲:「渣ga。」
「……」我同佢望住大家忍笑。
Ellie再接再厲:「乜咁渣ga.」
我忍住笑:「我係食唔到ga la洗唔洗嗌我渣ar」
「哈哈，估唔到你都有睇果篇潮文。」Ellie嘴角失守了。
我:「hehe，大家咁話喇，我落去攞野食先。」
估唔到大家有咁怪嘅默契，就係鍾意記網上一啲無聊嘅對白。
唔知大家有冇依種感覺，同一個識咗冇耐嘅人有一樣野無啦啦好啱KEY，就會覺得同對方好FD。
「快啲返呀，好肚餓。」Ellie用水汪汪眼神望住我。
「……嗯。」我吞一吞口水然後離開補習社。