我在補習社遇到一個令我難以忘懷的女生。: 九、星期五（二）

「篤篤。」有人敲響B班房門。
 
Ellie走入嚟:「Mr. William, 你識唔識做依一題數？」
 
我緊張起嚟:「幾年級㗎？」
 
Ellie望住我疊未改嘅功課:「三年級，係kace份功課嚟，如果你多野做就冇野喇。」
 
我帶點質疑嘅語氣:「我哋依度唔係有答案咩？」
 


「哩份係工作紙，每年佢哋學校個老師都會出新，所以要用人手對。」Ellie看似焦急非常。
 
「哦，我一陣研究吓，做完攞返比你。」我攞住佢比我嘅工作紙。
 
「唔該晒。」Ellie雙手合十懇求我。
 
我望住條題目:你有10條雪條，如果每2條雪條棍可以換雪條1條，你最多可以食多少條雪條？題目前面仲要有粒星。
 
我心算咗二十秒就計到答案係19條。
 


問題唔係難，最難係可以點表達比Ellie知呢？ 特別係我哩啲表達能力差嘅晒銀仔。
 
思前想後，我決定搵張紙寫比佢。
 
「我將雪條分成四組，第一組有十條，第二組有五條，第三組有兩條，第四組分咗A/B組，A組係由第三組其中兩條換成嘅一條，B組係由第三組果兩條換出嚟嘅一條同第二組最尾果條加埋換成嘅另一條新嘅，所以加埋總數就係19條雪條喇，記住要由A組逐組逐組諗。」我將題解寫喺紙上面。
 
最後仲加咗句「下次有唔明都可以問我。」其實由於我對數學本身都好有興趣，哩啲幾得意嘅奧學題可以刺激我大腦思考。
 
就係咁，寫條題解晒咗十分鐘，但我都諗緊會唔會有個更簡單直接表達方法。
 


「篤篤。」我敲一敲A班班房。
 
「我做完喇，你睇吓……」我行入classroom A班房。
 
佢聽到我咁之後，瞇住眼笑:「唔該晒你。」
 
「……唔洗。」見到佢個樣咁可愛搞到我有啲緊張。
 
因為兩班星期五嘅功課實在太多，做做吓不知不覺已經八點鐘。
 
終於明白點解腦細會醒100蚊，因為長期固定同一位置坐，好容易就覺得腰酸骨痛，當我嘗試放鬆肩膊時先發現自己頸部肌肉硬晒，有種周身唔聚財嘅感覺。
 
時鐘顯示依家已經八點鐘，Cindy終於送走Classroom B最後一個學生，但係Classroom A 仲有一個學生Casper未走。
 
我因為做晒自己野。於是我就走出班房同Cindy講:「Miss Cindy, I am leaving the office.」


 
Cindy:「Bye~」
 
「Bye~」
 
經過classroom A門口隻窗見到Ellie仲對緊練習，內心劇場又上映了。
 
聲音A:「咪煩住人喇。」
 
聲音B:「行入去同人講句拜拜啦。」
 
最後我都係敲門入咗去。
 
我壓低自己把聲:「Ellie我走喇，辛苦晒。」
 


Ellie聽到後嘆氣:「嗯……辛苦晒。」
 
見到佢挨聲嘆氣，我就喺書包攞咗一嚿漢堡包糖比佢，我問:「你食唔食？」
 
Ellie見到眼前嘅糖果，突然雙眼發光:「好啊。」
 
估唔到Ellie同啲小學生都一樣咁鍾意食糖，而且因為一粒糖就咁開心，佢份人都應該都幾易滿足。
 
佢攞咗漢堡包糖中間嗰層同我講:「攞隻手嚟。」
 
「？？？？？ 」雖然唔知佢想點，但我都係伸咗隻手出嚟。
 
「我唔會咁貪心嘅，留翻塊漢堡包皮比你食。」佢遞上漢堡包糖嘅包皮層。
 
「……」睇到佢哩個舉動，我唔知比咩反應好。


 
我承認果刻聽到佢咁講之後個腦係有諗咸濕野。
 
「嗯……好味。」Ellie閉上雙眼咀嚼緊嚿糖。
 
「……」我口中品嘗緊塊包皮。
 
「咁我走先喇，拜拜。」我急急腳離開classroom A門口。
 
「喂，咪走住！你下星期返邊日。」Ellie左手攙扶門邊，喺班房入面伸咗個頭出嚟。
 
「星期一、四、五。」我諗都冇諗就答佢。
 
「好喇，拜拜。」Ellie笑一笑，然後縮返個頭入去。
 


如果哩個動作由一個醜樣嘅人做，應該會覺得佢好古靈精怪，但由眼前哩個女仔做出嚟，就只有一個感覺，就係非常可愛。
 
唔知佢啱啱問我返邊日做咩嚟，不過實在太攰，已經唔想諗野。
 
放工照舊去阿活食野喇。做咗半日野身體每一個細胞已經發出肚餓嘅signal，一定要整返個鐵板餐補充蛋白質。
 
「Jar……Jar…」我托住個餐去窗口位。
 
食完個餐真係叉足電，個人特別好醒神。
 
之後我如常經過天橋行去巴士站，好彩今次Ellie唔係度，唔洗驚尷尬。