我在補習社遇到一個令我難以忘懷的女生。: 十、出糧日
返咗成個星期，都開始習慣咗咁樣嘅生活模式。
唔知係咪少咗時間同屋企人，依個星期返屋企都會俾兩老噓寒問暖，不過好彩佢地唔會問太多。
星期日我如常同阿腳去射波喇，咁佢都係問吓果度做野好唔好，有冇趣事發生之類。
好似前幾章都有講我同佢射波就一定會玩HORSE，今日唔知佢係咪發神經係咁整啲走籃double大風車，籃底下反手勾手嘅動作。
我坐喺球場三分線位:「我唔跟喇，再fing個膊頭就甩啦。」
阿腳反轉拇指:「渣ga。」
我用手掌捏一捏膊頭:「星期五返工坐到成個膊頭硬晒。」
「洗唔洗幫你按下。」
「……」佢咁突擊嘅關心搞到打晒冷震。
阿腳你都係快啲識女朋友喇。
------------------------------------------------------------------------------------------------------------------
星期一下午。
唔知係咪琴日打完波，個膊頭好酸軟。一瞓就瞓到晏晝一點。
「你今日返3點，做晒野自己放工。」+9434 0634傳了一條訊息給你。
「ok。」
「喂！你下星期返邊日。」腦海忽然諗起Ellie上星期講過嘅說話。
聲音A:「佢想夾埋同你返同一日啊。」
聲音B:「人哋返邊日關你鬼事咩。」
腦內聲音又再出現，今次後者說服咗我。
如是者我就起食咗少少野就換衫去返工。
返咗成個星期每次都會見到有啲阿伯坐係大廈外面談笑風生，唔知我老咗會唔會好似佢哋咁。走入大廈排隊等𨋢嘅人寥寥可數，所以可以比原定時間早咗幾分鐘到補習社。
今次係腦細開門比我，踏入補習社半步，Patrick扭一扭手上嘅鐘錶:「唔……好準時。」
我心中一陣竊喜，估唔到咁都可以喺老細面前留個好印象。
「今個星期都係同上星期一樣咁啦。」Patrick諗一諗點安排今日嘅工作。
「哩度係你嘅人工。」Patrick用手將裝有錢嘅信封遞比我，信封上面寫住「William, Thank you.」
「唔該晒。」我伸出雙手接上信封，不過為咗唔好尷尬，我冇喺佢面前拆開。
「做咩唔check吓啱唔啱數？ 」Patrick對我張信封放入書包嘅行為感到不惑。
「哦…係喎。」其實我都相信腦細唔會比少錢我，所以我都好放心。不過佢咁講我就喺書包攞翻個信封出嚟。
「你上星期返咗十二個鐘零三分，咁我計齊頭零五分喇，總共1100蚊，你check吓有冇錯。」
「多咗十二個半。」我心算咗五秒就計出答案。
Patrick攞住個計數機喺手上「篤」，計數機顯示1087.5。
佢拍一拍我手臂:「估唔到你心算都幾叻，果啲多咗就算喇。」
我點點頭:「多謝……」
「你今日幫手對下P1-P3啲練習先，上星期五Ellie未對晒。」佢指示我去folder度攞答案對。
「ok。」
我都係忍唔住好奇心:「我想問吓今日係邊個tutor返嚟？」
Patrick:「Michael今日會返，做咩咁問？ 」
「八卦下姐。」我扮到好唔在意攞堆練習返入班房。
Patrick一個似懂非懂嘅奸笑，好似世事都比佢看透了，我感到背脊一寒，於是都係急急腳行入班房對練習。
對吓啲練習轉過眼就四點半，classroom B都已經返咗四個學生。
「叮噹。」補習社門鐘響起。
Patrick:「我去開門得喇。」
Patrick chok把好溫柔嘅聲:「hi，Kelly and Kristy. 」
Kelly喺門口走入嚟問:「Mr. William, 今日有冇漢堡包糖食？」
「冇啊，快啲比我蓋印然後做功課喇。」
Kristy責備佢個妹:「你啱啱先係樓下食完燒賣你仲想食啊？ 」
Kelly冇理會佢:「……」
Mary:「Kristy, Kelly 唔好講野喇，返到嚟就要做野啦。」
Mary係classroom B 嘅一姐，由於佢讀band 1小學，考試默書次次都攞滿分，所以腦細好錫佢，除咗比佢有更多休息時間，亦比佢做classroom B嘅班長，有時我對功課太忙，佢就會暫時擔當我嘅角色，佢為人好公正，所以冇咩人不滿佢。
星期一又係風平浪靜嘅一日，冇乜野做好快又放工，之後梗係食阿活然後搭巴士返屋企。
到咗星期四，今日又係同Michael返。
班學生又問我有冇漢堡包糖食，我梗係話冇啦，有時開咗頭就會有壞先例，一個學生知道老師會比糖佢食，之後就會一傳十，十傳百話晒比所有學生知，之後結果就係你可能要買更多嘅糖嚟塞住佢哋把口，所以我都係間唔中先會買糖比佢哋食，唔好等佢哋覺得有糖食係理所當然。
今日星期四，功課唔算特別太多，而我同Michael都相處得幾好，雖然話題只係留於公事層面，嗰種唔太close又唔疏遠嘅感覺最舒服。
好快又到放工時間，返到屋企沖完個涼上陣網就準備上床瞓教。
唔知點解臨瞓前會諗究竟Ellie聽日返唔返。
聲音A:「都係果句喇，返唔返關你咩事？ 」
聲音B扮Ellie把聲:「唔話你知等你心思思。」
「……」就喺兩把聲音糾纏之下慢慢訓著咗。