我在補習社遇到一個令我難以忘懷的女生。: 八、星期四、五

話說我就係返星期一、四、五，咁今個星期四我放學食埋飯就準備搭車去補習社。
 
由於間大學同補習社都有成個鐘車程，所以點都要搵啲野做，咁我就google吓有咩grammar exercise做喇。
 
做咗半個鐘有啲眼瞓就帶住耳機聽歌。
 
「下一站，香港街，next station Hong Kong street.」
 
我就準備落車，唔知點解行緊去嗰段路，會諗起Ellie今日有冇返，畢竟佢比我嘅感覺好有禮貌，而且溫文有禮，返工做同事真係一流。
 


去到門口，打開門比我嘅係一個帶眼鏡米八嘅男仔，青靚白淨，文青樣，身上件tee仲要着住港大文院。
 
「hello，你係咪William？」Michael托一托佢副幼框眼鏡。
 
「係呀，你係Michael？」
 
Michael:「嗯，今日我教classroom A。」
 
「無問題。」我點點頭行入補習社。
 


星期四都係同星期一差唔多，對功課、改默書、改練習。
 
由於今日Cindy冇翻，所以係Patrick留到最後，而我同樣都係7點半走。
 
臨走嘅時侯，Patrick問:「你聽日可唔可以幫我接一接classroom A嗰個kace？你星期一果陣見過好百厭嗰個學生。」
 
「……」我發呆諗緊果個女仔係邊個。
 
「你幾點放學？ 」Patrick緊盯我雙眼。
 


「……十二點半。」我表現得非常心虛，一直迴避佢嘅視線。
 
「咁得喇，你三點係香港街38號嗰個巴士站等佢，Ellie聽日要返嚟開門，kace屋企人又唔得閒湊佢嚟補習社，照計翻人工比你。」Patrick解釋道。
 
有人工計翻梗係冇問題喇，不過估唔到返補習社要做埋保姆。
 
「ok。」我打咗OK手勢。
 
「唔該晒你。」Patrick用力握住我隻手。
------------------------------------------------------------------------------------------------------------------
星期五兩點五十分。
 
「你到咗巴士站未？」+9434 0634傳了一條訊息給你。
 
「到咗。」


 
「唔該晒，接咗佢覆我。」
 
「ok。」
 
等咗幾分鐘，見到有個細路孭住書包「鄧下鄧下」跑過嚟，一把好開朗嘅女仔聲:「Mr. William! 」
 
嗰陣我覺得好尷尬，因為唔知街上面嘅人會點睇。
 
「Mr. William，我想食糖。」Kace抬頭望住我。
 
「你食咯。」我意識到佢想叫我買糖比佢食，所以我扮聽唔明佢講乜。
 
「你買比我。」佢又展示冇咗兩隻門牙嘅招牌笑容。
 


望到佢笑得咁咁燦爛，我懷疑緊佢個口會唔會漏晒啲風入去。
 
「……」細路女嘅笑容真係好難拒絕。
 
「買比我，買比我，買比我。」佢一路fing我隻手一路喺街大嗌。
 
「……好喇，你唔好再嗌。」為咗阻止佢喺條街大嗌，我最終屈服咗。
 
「Yeah!」佢孭住書包四處奔跑。
 
我同佢去咗補習社附近嘅百佳買咗包十二蚊十包嘅漢堡包糖。
 
「你睇下你甩晒啲牙，淨係準食咁多。」我拆咗包裝紙攞咗三包比佢食。
 
佢又再扁嘴:「哼……Mr. William比多兩包我食呀。」


 
不過今次我唔會再心軟，因為根據我依一個星期返補習社經驗，只要小息有一個學生食糖，就會搞到班學生好似道友上身咁，糖果可以話係兒童毒品。
 
好快我哋返到補習社，開門嗰個係Ellie。
 
佢今日着咗一年幾白色Tee，大地色嘅長裙，件衫攝入條裙入面，展示到佢上身玲瓏浮凸嘅身材，又比到人好文青嘅感覺。
 
女仔着長裙比人感覺好溫柔，好有少女味。
 
佢似笑非笑:「hello, Mr. William. 」
 
通常一個人無啦啦對人笑所有人都會抗拒，但佢嘅笑容好似細路仔一樣比到人溫暖。
 
我好尷尬:「hello，Miss Ellie. 」
 


「hehe…」佢背住我偷笑。
 
「？？？？ 」我苦思佢究竟笑咩。
 
Ellie望住Kace:「咳咳……蓋完印好快啲返埋位。」
 
Kace攞住手上嘅漢堡包糖:「miss Ellie，我可唔可以食埋糖先啊？ 」
 
Ellie雙手叉腰:「點解你有糖食嘅？你睇吓你啲牙仔就嚟甩晒。」
 
Kace笑瞇瞇指住我:「Mr. William買比我㗎。」
 
Ellie望一望我之後望住kace:「好喇，五分鐘。」
 
我環視四周，發現Patrick同Cindy都冇返。
 
我問Ellie:「咦，點解今日Cindy冇返？ 」
 
「佢4點先返嚟。」
 
「哦……」
 
「鈴鈴鈴鈴～」電話喺褲袋響緊。
 
我攞起電話:「喂。」
 
「William你接咗佢未，我見你WhatsApp冇覆我。」
 
「啊……唔好意思，依家同佢到咗補習社喇。」
 
Patrick:「唔該晒，我喺我張枱第一個櫃桶放咗200蚊，你同Ellie記住攞，拜拜。」
 
「拜拜。」
 
「篤篤。」我敲一敲Ａ班房門。
 
我問Ellie:「你攞咗未星期五啲飯錢未？ 」
 
Ellie擰轉頭答我:「未啊。」
 
「嗱。」我伸手遞咗張100蚊比佢
 
Ellie好有禮貌:「唔該，今日辛苦晒喇。」
 
「……係，辛苦晒……」我微微點頭然後返B班做野。
 
學生陸陸續續返到嚟，星期五果然唔係講笑，一個學生竟然有十幾份功課。
 
Kelly喺座位舉手:「Mr. William，我唔識依題數啊。」
 
「攞嚟睇吓。」
 
「哦……你將小明同小美有嘅糖果數量加埋，再減小晴有嘅糖果數量，就會知道現有嘅糖果數量。」我指住佢本數學作業。
 
「我知條式係咁，但點解你打交叉嘅。」佢反駁我。
 
「你答案計錯。」
 
佢唔服氣，坐喺老師枱隔離果張學生凳坐。
 
「364+293-370 等於557-370=187。」
 
我停住咗佢:「等等先，364+293等於657唔係557。」
 
Kelly傻愣呆著:「係喎……唔該Mr. William.」
 
Kristy望住Kelly擺出一個好高傲嘅樣:「咁簡單都唔識，唔好話係我個妹。」
 
「……」Kelly啤住Kristy嘴藐藐。
 
原來Kelly係Kristy個妹，但佢地兩個關係好似麻麻地。
 
Mary望住Kristy:「Kristy唔好再講野喇。」
 
Kristy份人真係好醒，但就係有啲串。
 
好彩classroom B班啲人功課好少錯，如果唔係錯完又改都幾係野。