我在補習社遇到一個令我難以忘懷的女生。: 五、Hello，我係Ellie。

咁快就到星期一，老實講，其實我唔太緊張，因為腦細比我嘅感覺好似幾好人咁。
 
腦細有提過吓我要點着，上身最好要係恤衫，下身就係長褲，仲話頭髮最好唔好太長。
 
今日我就返3點半至7點半，跟足腦細要求，恤衫長褲，前幾日剪咗個俾平頭長少少嘅頭髮，外官上面我俾自己5/10分。(阿腳7/10)
 
其實入到U身邊同科嘅hi-bye fd有時都話我外觀唔係到冇得救嘅地步，但就係啲表情好kam同埋唔太識俾反應人，我都認同嘅。
 
由於第一日返工，所以我比預定時間早咗到，見仲有10分鐘就坐係外面等。
 


九月嘅香港都仲係有啲熱，所以我係外面等個加拿大已經出晒汗。
 
突然聽到補習社裡面傳來一把女人聲。
 
「Kace, 你坐好啲，再唔坐好今日就留多十五分鐘。」一把好甜美嘅聲音由班房傳出。
 
「.......」入面突然一粒聲都冇。
 
「Miss Ellie，我唔識做哩題呀，哩個數字都減唔到嘅。」
 


我係外面聽到入面間房得兩把聲，我諗問問題嗰個就係Kace。
 
「你要將第一個數字加咗第三個數字，先再減第二個數字。」
 
我一直聽住佢教嗰個女仔，由聽覺佢俾我第一印象幾好，應該好易相處。
 
「轟……唔……」明明係商業大廈，但架𨋢仲嘈過工廈果啲𨋢。
 
Patrick見到我好驚訝:「你做咩坐喺出面唔入去？ 」
 


「我見未夠鐘咪諗住等吓。」
 
「入去啦。」
 
「咔。」Patrick打開補習社門。
 
「Good afternoon, let’s me introduce, he is Mr. William. 」Patrick好似魔術師登場咁同Cindy講。
 
「Hi~ 」鬼婆Cindy發出標準又熱情嘅口音。
 
我好冇力舉起右手揮一揮:「hi, I am really淫. 」
 
「oh, he looks very smart. 」Cindy笑到見牙唔見眼。
 
我好尷尬:「haha……」


 
「咁我帶你去classroom A啦，入面有個miss同你一樣，讀ＸX大學，year3，讀文學，啱啱返咗一星期工。」
 
原來佢係Ｘ大，即係同我唔係同一間啦。
 
「篤篤。」Patrick敲一敲門。
 
「咔。」門被打開。
 
一打開門就見到一個小學生同一個女老師。
 
「Ellie，依個係William，大學生year3，讀晒銀時，同你一樣做part-time tutor。」腦細用隻手指向我。
 
喺眼前嘅哩個女仔，好似一個藝人──大面Bella，不過就係塊面冇咁肥。佢今日着咗好普通女仔嘅衣着，一件薄薄地嘅恤衫，入面襯牛白色tee，牛仔褲，綠色adidas Stan Smith。
 


「Hello，我係Ellie。」一把洋洋盈耳嘅聲音。
 
我有啲緊張:「你好，我係William。」
 
佢眼睛望住我個胸附近。
 
「你好熱啊？」佢用手指指住我腋下。
 
我突然先意識到原來啲汗透晒成件恤衫。
 
「哈哈哈。」小學生Kace啲高音笑聲有啲刺耳。
 
我望住果位小學生，無意中發現佢棚牙原來冇咗上邊兩隻門牙，我諗佢平時一定食好多糖。
 
Ellie低頭忍笑。


 
Patrick喝住Kace繼續笑:「Kace, 仲唔叫Mr. William？ 」
 
Kace嘟起個嘴:「Goooooooooood afternoon, Mr. William. 」
 
哩位小學生都幾百厭……
 
Patrick:「我去開一開冷氣順便比埋張紙巾你先，唔好意思! 由於補習社啱啱開門，所以淨係開咗風扇。」
 
我擠出一個禮貌微笑:「唔緊要。」
 
「你出一出嚟，我同你講吓要做啲咩。」佢遞咗張紙巾比我。
 
「今日你就要坐classroom B, classroom B就係高班，入面嘅學生全部都係P4-P6，總共有6個學生，我知你一定想問點解你新嚟唔比你教低年級，因為P1-P3 好曳，驚你handle唔到。」佢指住classroom B位置。
 


classroom A同B只有一牆之隔，班房嘅隔音措施都做得幾好。
 
「平時學生啲功課answer就喺晒老師枱下面，分好晒名㗎啦。」佢打開classroom B門指住老師枱下面嘅文件夾。
 
原來依家補習行業已經咁先進，同我以前小學係補習社老師用人手對答案完全唔同。
 
Classroom B 同classroom A一樣間隔。
　窗            窗
學生枱    學生枱
　                        黑板
學生枱    老師枱
 
老師枱隔離有一張凳，係for功課做得慢嘅學生。
 
「如果邊個學生唔乖係佢個名上面剔就得，三個剔就留堂30分鐘。」佢指住黑板上面啲學生名。
 
之後佢繼續帶我參觀。
 
「咁默書方面就唔洗你搞，但我循例講吓喇，我會用錄音機幫學生錄默書，佢哋做完功課會自己去我枱面攞部機去默書。」佢帶我去放錄音機嘅位置。
 
「依度有部影印機，通常影印學生工作紙嘅答案同平時比佢哋做嘅練習，影印機隔離有練習嘅answer同默書內容，佢哋做完你就幫手對答案喇。」佢指住影印機隔離個櫃。
 
「講起練習，佢哋平時做完就會放係鮮紅色櫃上面嘅folder，每個folder都代表唔同學生，要講嘅大概係咁多。」Patrick托一托下巴諗緊仲有冇咩野漏咗冇講。
 
「仲有! 如果平時有學生或者家長嚟到比我同Cindy開門就得喇，因為有外藉老師比人個印象好啲，如果我哋兩個都好忙或者唔喺到，你先好幫手開門。」
 
做少一樣野我梗係無問題。
 
佢指向鮮紅色上面堆folder:「你攞住啲練習去classroom B 對住先，一陣有學生先開始嚟先對功課。」
 
「好……」
 
我心諗:「依間補習社運作都好簡單姐，應該好快上到手。」