香港都市傳說：一筒歸西: 彩蛋：一筒歸西 - 尚未結束（六）

回到渡假屋後，由於還未感到肚餓，又因為經歷了海邊的事情，三人便各自梳洗的梳洗，休息的休息。
 
當阿軒在浴室洗澡時，突然聽到「咯咯，咯咯」的敲門聲。
 
「係咪怡欣呀？我沖緊涼，好快搞掂。」
 
雖然阿軒在浴室作出了回應，但門外的那方卻像聽不到他的說話，繼續「咯咯，咯咯」地敲門。
 
「得啦得啦，我抹埋身出嚟啦。」
 




阿軒以為怡欣肚子不舒服，於是趕緊把身體抹乾，穿好衣服後便馬上開門。
 
「搞掂啦，你用......」
 
本以為開門的瞬間會看到怡欣，但打開門後，卻沒有任何人站在外面。
 
阿軒正感到奇怪之際，渡假屋的大門突然打開，怡欣拿著一個鐵盒進到屋內。
 
「頭先......你係咪有拍我門？」
 




「拍你門？無呀，我頭先本來休息緊嘅，哲瑋沖完晾之後話想瞓陣，我咪走咗去借麻雀囉，廢事燒完嘢食太夜借唔到啦。做咩你，流晒汗咁？定你無抹乾身。」
 
阿軒聽罷，摸了一摸額頭，真的有水冒了出來，但那不是沖涼後的水，而是身體冒出的冷汗。
 
「可......可能未抹乾啦。差唔多食嘢啦，我去叫醒哲瑋。」
 
阿軒回應怡欣後，馬上跑到睡房，只見哲瑋正在呼呼大睡，還發了刺耳的鼻鼾聲，要是說他是裝出來的，演技未免也太好了。
 
但阿軒卻希望哲瑋真的有如斯演技，並且馬上從床上醒來大叫一聲，然後對阿軒說：「今次仲唔嚇到你！」
 




可惜，哲瑋並沒有這樣，他仍然像是豬一般躺在床上發出鼻鼾聲。
 
「阿軒，哲瑋醒未呀？哇，仲瞓到成隻豬咁，醒呀林哲瑋！唔好再瞓呀！」
 
怡欣見阿軒久久未有動靜，進入睡房卻發現哲瑋仍然睡得死死的，便忍不住在旁邊吵鬧，誓要把哲瑋喚醒。
 
在經過一陣混亂後，怡欣總算弄醒了哲瑋，三人便把燒烤用的東西拿到天台，開始準備燒烤。
 
在開始正式燒烤後，怡欣注意到神不守舍的阿軒，忍不住問他：「喂，你乜鬼無嚟精神咁嘅，無嘢呀？」
 
旁邊的哲瑋聽到後搭話：「吓，阿軒你無精神咩？我睇唔出嘅？」
 
「你呢啲低B仔梗係睇唔出啦，淨係識得食同瞓。」
 
「咩呀，我今日咪同阿軒救咗班中學生囉，好過你企咗喺岸邊唔幫手。」




 
「哎吔，你明知我唔識游水又點幫手！想死呀係咪？」
 
「唔......唔係，點敢呢。係......係啦，阿軒你做咩事呀？係咪食錯嘢？」
 
面對怡欣露出的鐵拳，哲瑋緊張地轉移話題。
 
「我......唔知點解硬係覺得有啲唔自在......呢間屋，硬係好似有啲嘢。」
 
阿軒猶豫一會後，決定對兩人說出自己的感覺。
 
「吓？唔係啩，可能你太攰啫。」
 
「係囉，你今日落水救人嚟，又無好似哲瑋咁瞓到豬咁，實會攰啲嘅。」
 




怡欣說話同時，亦不忘瞪了哲瑋一眼。
 
「嗯，可能係啦。」
 
「咁我哋快手食埋啲嘢之後，啲嘢等哲瑋一個人執啦，你去休息下先。」
 
「吓？我一個？」
 
「梗係你一個啦，得你一個咩都無幫手咋！」
 
「我明明都有落水......」
 
哲瑋本來還想辯解，但看到怡欣的眼神後，雙唇自動閉上，不敢再多說半句。
 
然後三人把食物都清得七七八八後，哲瑋和怡欣負責收拾，阿軒則襯機休息一會。




 
「唉，終於執晒啦，攰死人！」
 
「攰你個死人頭，你都係清垃圾咋嘛，碗都唔駛洗，攰咩啫。」
 
「咁執垃圾都攰㗎。得啦得啦，唔好睥住我啦，我哋依家有咩做？」
 
哲瑋避開了怡欣的目光，轉過來看著阿軒。
 
「仲做咩啫，阿軒攰啦，畀佢靜靜地抖下啦。」
 
「吓，特登入到嚟玩襟棉胎？唔係呀？十點咋喎。」
 
「咁唔係你話有咩做啦？」
 




「三個人又真係......係喎，正宇有無回應？」
 
阿軒搖了搖頭。
 
「咁嘅情況，不如打牌啦？」
 
「吓？你呢個咩結論嚟㗎？咪話咗阿軒好攰囉，仲有，三個人打乜鬼？」
 
「麻雀嘅嘢，三個人都玩得嘅啫。你無聽過咩，三缺一，都好過喺度唔知做乜。」
 
怡欣沒好氣地看著哲瑋，而哲瑋則看著阿軒，等待他的回覆。
 
「我抖咗陣都無咁攰啦。同埋反正都入到嚟，照打啦。」
 
「阿軒即係阿軒，從來唔會令我哋失望。我去開枱。」
 
哲瑋基本上沒有等待阿軒回答，身體已經先行把麻將拿出來。
 
「唉，呢條友。阿軒你係得先好喎，太攰真係可以休息。」
 
「我真係可以，嚟啦，打牌啦。」
 
「喂，我排好晒啦，快啲過嚟打牌啦，邊個輸咗聽朝請食早餐。」
 
「輸唔切啦你！喂，點解無抽起啲牌㗎？」
 
「抽牌？唔駛啦，咁麻煩。」
 
「吓？但係......」
 
「但咩係啫？哦，我知啦，你唔係驚呀？」
 
哲瑋經怡欣提醒後，也想起了麻將的禁忌，亦想起了稍早前經歷過的一筒歸西事件。但嘴硬的他卻不願說穿，又或者，大家也不敢把事情說穿。
 
沒有說，就不會發生，大概每個人都曾經有過這種奇怪的迷思吧。
 
總而言之，三人麻將就這樣開始了。
 
「食糊，林哲瑋你死緊啦，呢度計計埋埋你請我食一個月早餐啦。」
 
「喂，講咗係聽朝請食早餐，無啦啦做咩變一個月呀？」
 
「咪嘈啦，繼續打啦。」
 
三人繼續耍樂，牌過三輪後，阿軒突然臉色變了一下。
 
「阿軒，你做咩呀？」
 
怡欣發現阿軒的異樣。
 
「你哋......聽唔聽到......」
 
臉如死灰的阿軒，好不容易從口中擠出了這一句話。
 
「聽咩呀？唔好扮嘢呀，我仲要追返㗎，快啲繼續打啦。」
 
「咪嘈住，我......我好似都聽到......」
 
怡欣阻止了哲瑋，並示意對方安靜。
 
「做咩呀你兩......」
 
哲瑋原以為兩人聯合起來作弄他，但此刻也跟隨兩人安靜下來，只因他也聽到了一些像是走路的聲音，在慢慢靠近他們。
 
本來吵鬧的環境，突然變得安靜，三人的聽覺也因此變得格外靈敏。
 
「咯咯......」
 
本來還只是微弱的腳步聲，但愈來愈靠近的同時，聲音亦愈變愈大，最後，那腳步聲不但停在屋外，更變成了「咯咯」的敲門聲。
 
三人聽到後，完全不敢作聲，只能互相瞪著眼看著對方。
 
沉默了一會後，門外變得安靜起來，完全沒有動靜。
 
「我哋係咪聽錯咋？」怡欣用嘴形向兩人示意。
 
「三個人一齊聽錯？」哲瑋搖了搖頭。
 
「咁你去睇下啦。」怡欣推了推哲瑋，但哲瑋死也不願移動半步。
 
看到兩人你推我讓的，門外的某樣事物好像也看不下去，再次響起了「咯咯」的敲門聲，示意自己的存在。
 
敲門聲使兩人停止了動作，呆呆地看著門的方向。
 
而此刻，阿軒再也待不下去，他挪動了身體，站了起來，準備走向大門。