香港都市傳說：一筒歸西: 彩蛋：一筒歸西 - 尚未結束（五）
「我埋到去個女仔身邊，都未出聲佢就已經發現咗我，仲大嗌『走呀，唔好埋嚟呀！走呀，走呀！』。我見佢成個人失晒常性，驚佢再係咁落去會自殘，咪諗住捉實佢囉。點知佢鬼咁死大力，捉極都捉唔住，仲跑咗出去。我諗住追出去嗰下，個女仔已經唔見咗。無辦法之下我唯有報警。之後件事搞咗好耐，最後個女仔被人喺沙灘被人發現，死狀同渡假屋嗰三個人一模一樣，而且聽返啲差佬講，四條屍體好似浸水浸咗好多日，而且條頸度仲有個『翔』字。我知道嗰陣嚇到傻咁滯，因為對上一個喺我間渡假屋自殺嗰對情侶，個男人條頸就係戴住塊有個『翔』字嘅玉......」
老闆一口氣說到這裡，發現手上的啤酒已經沒有了，便向雪櫃慢慢走去。
而這亦正好給三人喘息的機會，雖說這故事不是十分離奇怪異，但想到晚上要在這地方過夜，三人心裡莫名地起了一陣寒意。
「點呀，你三個好驚咩？」
老闆悄然無聲地來到三人身旁，三人被他突然發出的聲音嚇了一跳。
「吓，唔係，只係唔知點解硬係有啲唔係好自然嘅感覺。」
阿軒站起來，稍為動了動身體，怡欣和哲瑋亦跟著模仿，三人顯得有點坐立不安的感覺。
「唔驚就得啦，頭先講到邊呢......呀，係啦，我知道咗租屋嗰四個中學生死嗰陣條頸都多咗個『翔』字。之後我再同班差佬八下個情況，先知道嗰幾個學生全部都係浸死嘅，而且已經死咗好幾日。但呢個真係無可能，我租屋畀佢哋，到佢哋出事，成件事唔會超過兩天，咁又點會話死咗幾日先得㗎！如果佢哋真係死咗幾日，咁我租間屋畀佢哋嗰陣，我見嘅係人定係鬼呀？」
「我明白成件事好奇怪，但係點解你會話關個沙灘事？」
三人聽到這裡，忍不住插嘴。
「因為，呢件事完咗之後，仲有後續。嗰幾個中學生死嘅事基本上全個長洲啲人都知，嗰陣我最煩嘅就係我間屋到底點算。錢又洗咗一大筆，賣又賣唔走，租又無人租，真係蝕到入肉。之後為咗等多啲人租，我就大減價同唔再揀客，一家大細又好，一個人又好，總之有人租就算啦。同埋我為咗慳錢就無再做咩法事，總之每個月啲租金夠我供樓就算。」
「長洲嘅人唔係大部份都信有嗰味嘢嘅咩？你唔做法事，唔驚咩？」
「小朋友，你估鬼恐怖啲定無錢恐怖啲？任你點驚都好，無錢就生存唔到，咩牛鬼蛇神都行埋一二邊啦。不過......如果你依家再畀我揀，如果可以超渡嗰對情侶，我多多錢都肯畀，咁嘅話可能之後就唔駛死咁多人。至從佢哋死咗之後，其實我自己生活上無乜問題，但問題係我租親間屋畀人，次次都發現有人浸死。你無聽錯，喺間屋入面發現浸死嘅人。而且每次啲屍體條頸都有個『翔』字。原本出事嘅都淨係喺我間屋，但之後長洲嘅原居民都話成日係沙灘見到啲奇怪嘅人影，而且每次游水都好似有人捉住佢哋對腳咁，好恐怖。有一次有個長洲原居民，佢其實已經搬咗出去住，只係襯假期帶埋啲仔女返嚟探下屋企人同埋放鬆下。但最後佢哋成家都死晒喺我間渡假屋入畀......」
說到這裡，老闆眼神盡是悔意，雖然說老闆並沒有動手殺害任何一人，但一條又一條人命在他的渡假屋裡喪生，加上老闆當時亦沒有盡到責任去把渡假屋處理好，也難怪他會這樣神傷。
就在四人都沈浸在這悲傷的氣氛中，沙灘裡突然傳來求救聲。
只見剛剛那群中學生已換上了泳裝，本應在嬉戲遊玩的他們，卻突然大聲呼救。
原來那幾名中學生在海裡載浮載沉，看起來像是溺水似的。
「哲瑋！救人！」阿軒看到這情況便立即向沙灘跑去，而哲瑋亦在旁邊跟著。
不熟水性的怡欣亦隨後跟上，希望看看能不能幫上忙。
三人跑向沙灘時，老闆卻沒有跟上，只是停在茶座位置看著眾人，然後搖了搖頭。
阿軒和哲瑋兩人來到岸邊，把身上的衣物脫掉後便跳入水中，然後游向那群中學生。
仍在掙扎中的中學生，看到二人靠近，馬上大喊。
「救命呀，有嘢拉住我對腳呀！」
來到近處，阿軒和哲瑋才發現不是全部都出了狀況，只是其中兩人聲稱有甚麼在抓著他們的腿。
二人猜想大概是熱身不足導致小腿痙攣，便一人在旁邊協助遇溺的學生，慢慢游回岸邊，其餘沒有事的亦在旁邊跟著。
幸好他們遇溺的地點離岸邊不遠，否則單靠阿軒和哲瑋的力量亦不知能否救回兩名遇溺的中學生。
回到岸邊後，那群中學生總算吁了一口氣，遇溺的兩人上岸安頓好後，終於忍不住大哭起來。
待情緒稍為平復後，便開口向阿軒三人道謝。
「多謝你哋幫手。」
「唔駛客氣，不過你哋下次落水玩最好去啲有救生員嘅地方，又或者做好熱身先，如果唔係又抽筋嘅話就麻煩，唔係次次都咁好彩。」
阿軒話音剛落，兩名遇溺的中學生立即大喊。
「唔係咁㗎，我哋頭先有做足熱身，不過係游游下嗰陣突然間有嘢拉住我哋對腳，所以先差啲浸親咋。」
「係呀係呀，我哋頭先都有試過拉住佢兩個游返去岸邊，都就好似有嘢扯住佢哋，拉極都唔郁。」
三人聽到後，腦海裡閃過老闆對他們說的事情，臉色不禁一沉。
「可能你哋無學過點樣喺水入面救人啫。我同我朋友考過救生員，知道水入面發力同地面好唔同，無事嘅，唔好諗咁多。」
阿軒想安慰他們，但接下來中學生卻向三人展示了不可能發生的事情。
「我哋明，但係你睇下我哋腳踭......」
兩名中學生向眾人展示了腳跟位，只見一個又一個清晰的手指瘀痕出現在他們腿上，這瘀痕的模樣明顯是新印上去的。
眾人看到後只能沉默不語，沒有一人能解釋這個情況。
「點都好啦，依家無事就好啦。」
怡欣見眾都不發一言，明白再沉思下去亦於事無補，便決定以安慰的方式試圖解決現狀。
「都係嘅，真係好多謝你哋肯幫手咋。」
「係啦，你哋仲好心提醒我哋個沙灘有問題，我哋唔應該唔聽嘅，對唔住。」
這群中學生一臉歉意，看來對剛剛無視了老闆善意的提醒深感內咎。
「算啦，都過咗去啦，況且老闆應該唔會放在心上嘅，下次小心啲就得啦。」
阿軒準備承接怡欣的說話，替眾人打圓場了事。
「原來你哋係餐廳老闆呀？我會同啲朋友講，入開嚟多啲幫襯㗎啦。」
「吓？我哋唔係餐廳老闆呀，我哋都係入嚟玩㗎咋。餐廳老闆喺上面，你哋駛唔駛親自上去多謝佢？」
哲瑋向中學生解釋，並向餐廳的方向指了一指，亦有揮手向看著眾人的老闆示意。
這群中學生向哲瑋指著的方向一看，但眾人不知道是否餘驚未了，臉色突然都陰沉起來。
「吓？多謝佢？」
那名遇溺的中學生吐出了一句不明所以的話，向提醒他們的老闆道謝是有這麼奇怪嗎。
「係呀，我哋帶你哋上去搵老闆講聲多謝啦。」
怡欣亦開口表示可以幫忙。
中學生群組聽到後，臉色變得更加陰沉，然後其中一名看著餐廳方向的中學生突然大叫。
「唔關我哋事㗎，我哋嚟玩㗎咋。」
「你無事呀嘛？」
怡欣看著那名中學生情緒突然失控，擔心地查看他的狀況。
「唔好意思，我諗我哋太攰，佢啱啱又爭啲浸親，所以先會咁啫。我哋換埋衫之後會即刻搭船走㗎啦。」
其中一名看來比較成熟的中學生，用顫抖的聲音向阿軒他們解釋。
「你哋真係無事？駛唔駛上餐廳坐下先？」
怡欣很是擔心中學生的情況。
「唔......唔駛啦，我哋依家走啦！你哋......你哋都小心啲。多謝你哋幫手，對......對唔住！」
中學生稍為整理了一下後，便帶著那名情緒激動的中學生離開。
離開前亦再次向三人道謝。
「多謝你哋，希望......希望你哋都小心啲同平安無事啦。」
拋下這句話後，中學生群組瞬速離開了沙灘，留下一臉疑惑的三人在苦苦思量他們的說話。
「算啦，唔諗啦，人都救咗，上餐廳飲埋杯嘢就返渡假屋燒嘢食啦。」
阿軒雖然也對中學生的舉動充滿了疑惑，但心想可能只是驚嚇過度而導致語無倫次罷了，並沒有太過深究下去。
回到餐廳跟老闆多聊了一會後，把手上的飲料都喝光後，便準備回到渡假屋去。
而目送他們離開的老闆，在海風的吹拂下，隱約看到脖子後方紋上了一個字 — 「翔」。