香港都市傳說：一筒歸西: 彩蛋：一筒歸西 - 尚未結束（七）

「無事嘅霍振軒！無事嘅！」阿軒來到大門前，內心一直安撫自己。
 
然而大門外的聲音卻不願放過阿軒，阿軒每靠近一步，敲門聲便像回應他而響起。
 
「邊個？」阿軒來到大門前，靜待著門外的回應。
 
只是等了半晌，門外沒有回應。
 
阿軒嘗試利用門上的防盜眼去查看外面的情況，只是防盜眼不知是太舊還是甚麼原因，看出去只有一片模糊的影像，無法得知外面的情況。
 




「係咪有人呀？邊個？」阿軒再次鼓起勇氣對著大門喊話。
 
這次總算有了回應，只是回應的不是人聲，而是「咯咯」、「咯咯」的敲門聲。
 
怡欣和哲瑋此時走向阿軒，三人互相對望了一會後，便點了點頭。
 
「邊個？係咪有咩事？」
 
阿軒嘗試再對話，只是對方仍然以敲門聲作回應。
 




怡欣和哲瑋兩人分別拿著掃帚和玻璃瓶，然後向阿軒示意。
 
「我唔知你係邊個，但你再唔走嘅話我哋就叫人嚟㗎啦！」
 
阿軒的警告似乎無效，敲門聲仍然接連不斷。
 
無計可施下，阿軒深呼吸了一口氣，右手握著門柄，準備打開大門。
 
怡欣和哲瑋亦已準備好，在門打開的同時便把手上的「武器」揮下，希望把門外的人擊退。
 




而門打開的瞬間，阿軒總算看到門外的人，大喊的同時，亦舉起雙手阻止二人。
 
「唔好，係正宇嚟！」
 
兩人聽到後回過神來，只見門外站著的正宇，正一臉驚恐地看著他們。
 
四人的動作完全停頓，回過神來的怡欣，馬上大喊。
 
「林正宇你搞咩呀？嚟到又唔Send message又唔出聲講嘢，想嚇死我哋咩！」
 
「係囉係囉！你又話唔舒服嘅，做咩仲入到嚟？」哲瑋附和著說。
 
正宇聽到二人質問後，拿出了手機向他們展示黑漆漆的螢幕，看來是沒有電了。
 
然後正宇指了指喉嚨，再左右來回揮動右手，看來是在示意不能說話。




 
「你哋兩個畀正宇入嚟先啦，出面開始落雨啦。」
 
本來不錯的天氣，卻突然下起了暴雨，三人馬上讓正宇進入屋內並讓他到浴室沖洗一下。
 
「正宇都嚟埋，終於可以正式開始打牌啦。我哋重新再計過啦。」
 
「咩重新再計過呀？你頭先明明輸晒！」
 
「唔係呀，咁正宇入到嚟梗係再計過啦，無理由仲用返頭先啲分㗎嘛。」
 
「我唔理呀，計過無問題，但你爭我哋個早餐無得走數呀。」
 
就在兩人為著是否重新計算積分時，阿軒則一直用疑惑的眼神看著浴室。
 




「喂，阿軒，搞咩呀你，嗌極你都唔應？」
 
「吓？你哋嗌我咩？咩......咩事呀？」
 
「個死人林哲瑋諗住走數呀，明明頭先輸成咁點都追唔返㗎啦，但佢話正宇嚟咗要重新計數，想賴死唔肯請食早餐呀。」
 
「我唔係賴死，只係正宇嚟咗梗係重新計啦。同埋我依家輸得多啫，唔代表追唔返㗎。阿軒，你嚟評下理。喂，阿軒！」
 
「吓？係，係嘅。」


 
「你無事呀，成個人呆呆滯滯咁？」
 
「係囉？唔係正宇唔舒服完到你呀？駛唔駛抖下？」




 
阿軒看著兩人，一副欲言又止的樣子。
 
「你哋，覺唔覺得正宇好似有啲......」
 
阿軒還未說完，浴室門便已打開。
 
「終於出嚟啦，快啲過嚟啦，我等緊你聽日請食早餐呀。」
 
「咩請食早餐呀，就算係都你請先啦，你爭我同阿軒一餐㗎。係喎，阿軒你啱啱想講咩㗎？」
 
阿軒看向正宇，眼神正好對上，一陣淡淡的寒意從體內冒出。
 
「無......無事，我哋打牌啦。」
 




「等睇我大殺三方啦！」
 
「殺你個頭，記住爭我同阿軒一份早餐呀！」
 
「都話重新再計囉，唔好嘈啦。」
 
阿軒雖然坐到麻雀桌前，但內心不安的感覺絲毫沒有消散。
 
「正宇唔舒服又出唔到聲，不如我哋抖下算啦。」
 
阿軒鼓起勇氣對三人說，怡欣和哲瑋才想到正宇身體狀況的問題，然後三人紛紛看向正宇。
 
「唔緊要，我好返㗎啦，不過把聲沙啲，你哋唔介意就得㗎啦。」
 
正宇聲音聽來除了沙啞了一點，聽來並沒有任何問題。
 
怡欣及哲瑋並沒有在意，只有阿軒仍然皺著眉，感到十分不自在。
 
「阿軒，你無嘢呀嘛？我嚟咗之後你好似好唔自在咁。」
 
正宇用那沙啞的聲線跟阿軒說話，阿軒心裡又冒起了一陣寒意，但無法說明這一切下，只好裝作無事回應。
 
「我......我無呀，嚟啦，打牌啦。」
 
隨著正宇到來，總算可以開始正常的「四人麻雀」了。