為了實現媽媽遺願，我成為了女校男生: 正傳後記

終於都打哂成個故事啦，其實我都唔知點解會打故事，仲要係女校男生

事緣我諗返起，英華女校，係我媽媽嘅母校，佢話過當年佢F.6有男同學黎讀，成日俾佢地班女仔蝦。

我果時又問:媽咪，D男仔讀書咪好叻囉??

我媽咪就話:當然啦，次次考試都第一，會考8A入去讀。佢當年果班，果個男同學係最後娶左考第二果個女同學，結婚生小朋友。

所以我係好多年前就想寫呢個故事出黎





點解開始有動力寫呢?

年頭開始，我都要入隔離營做野，係夜更自己一個係營中果陣不停見到好Sad嘅野，畢竟入隔離營係好慘嘅事

有一晚我見到一個小妹妹係到作文，佢話佢好想做作家，所以自己係到練文筆。我就同佢講，我細個都好鍾意作文架，會考中文作文有A架

果個妹妹就叫我試下寫小說啦，不過唔好寫甜故

於是我就開始寫故事，本來寫好我都唔打算發表嘅...但係打好左又唔出又好浪費，於是我諗左好耐





我係3月果時因為嚴重頭痛同嘔，照腦之後發現腦中有血瘤，做手術可能會失去記憶...於是我就決定出文，等我自己嘅心血可以同大家分享

我係公告到話過，寫故事期間，我搵返一個同我失去聯絡14年嘅朋友....因為我唔想忘記佢，當我知道自己好快會唔記得佢果時，我立即打鑼咁搵佢，佢對我好重要，

我細個果時，佢會送生日咭俾我，

2003年佢去左澳洲留學之後，我地好少通訊

當我以為佢忘記左我果時，我係2006年生日收到佢嘅Postcard，我收到喊左好耐，於是我開始搵佢，一搵就搵左14年





當我知道自己可能就快會失去佢記憶果時，我用左最後嘅方法，上facebook尋人，仲搵下我有冇朋友同佢同校之類。

終於我有一個朋友係佢隔離班，我朋友幫我搭上搭，由香港搭到英國，再由英國搭去澳洲，終於俾我搵返佢

係同一時間，澳洲果邊有人同佢講，有個男仔係香港搵佢搵左14年，佢知道係我。佢都立即搵返我。

雖然我地各自都有自己嘅家庭，但我對佢仍然冇變過，個心同我當年剛識佢係一樣。我都好想同妳講一聲多謝妳

當年係我F.6就快讀到痴線果陣，總係收到佢嘅信，係我崩潰前一刻，佢永遠都好溫柔咁拉一拉我返黎。

佢臨去澳洲叫我要讀書叻過佢，於是我讀埋碩士。佢叫我唔好做警察，因為佢唔想我受傷或者殉職，所以我放棄左我自細夢想(好彩放棄左)

我應該呢一世都唔會再有機會見返佢，我想係到同佢講返17年前應該同佢講嘅說話

我愛妳






呢個女仔...............叫Jessie