為了實現媽媽遺願，我成為了女校男生: 畢業典禮(2)

「Yo~~~今年係我致詞呀喂，俾D掌聲啦，係…飲杯水先」
 
佢地再一次係我飲水時發出叫聲
 
「首先，一定要多謝校長、各位老師嘅教導啦，呢D一定嘅，咁當然要同所有學校職員講聲多謝，冇你地一班幕後英雄，邊個係我條褲爆左果陣幫我聯返條褲?靠在座各位同學就慘啦。冇一班職員，邊個幫手出通告?所以我地應該多謝所有學校職員」
 
「亦都好多謝訓導主任，妳嘅獅哮功令我地學識自律，學識做人道理」
 
「要多謝各位一齊努力嘅同學，冇大家互相鼓勵同支持，我地冇可能咁多位同學一齊畢業。今晚大家係最後一日著起校服，聽日開始，大家都係，準預科生、準大學生、準社會人、準媽媽，呀…我做唔到媽媽唔好意思，正如我偶像張國榮所講，生仔好痛唔啱我，希望大家唔會忘記呢5年至7年，學校帶俾大家嘅時光，大家一齊喊，一齊笑。中學生涯，係每個人最青春最開心最瘋狂嘅日子，雖然我係最尾兩年先加入，但我好開心能夠入讀呢間學校，俾我最後兩年中學生涯最快樂嘅時光….今日所有嘅畢業生，我地將來可以同大家好自豪咁講，我地係英華女校畢業，多謝大家」
 




「程逸風同學，你同林雪凝同學兩個一齊拎到模範生，請問你有咩同大家講呢?」
 
「呀…洗唔洗俾時間雪凝講呀?」
 
「唔洗啦，佢年年都係講果D，我地已經識背出黎，而且你身為一家之主，佢話將所有時間交哂俾你講」
 
「首先…我好多謝校長……佢唔嫌我當年犯事警司警誡，掛緊噹噹果陣，肯收我黎讀書…令我識到好多好朋友…令我重遇返一個對我最重要嘅人。我仲要多謝當年係社團拉返我出黎嘅一班反黑組，特別係黃警司，冇佢幫手嘅話，可能我早年已經入左勞教中心。好多謝我契媽，我地嘅訓導主任Miss孔，當年家姐未成年，佢係我地兩姊弟嘅監護人，佢要照顧自己個女之外，仲要照顧埋我地兩個，我想係到叫妳一聲”媽咪”。我要多謝我以前樂善堂書院一班老師校長同學，果三年冇你地係我身邊，我唔會有今日，要多謝家姐所有大學同學同教授，冇佢地，我會考唔會有8A…仲有呀…4A，張詩敏，果陣我未黎讀書之前，每一次我臨近發癲之時，都係妳好溫柔咁拉一拉我返黎…多謝妳」
 
我嘅淚線終於忍唔住，把聲開始嗚咽
 




「我係到想同我係天國嘅爸爸媽媽講……三十年前，你地係呢間學校相識，先至有我同家姐嘅存在……雖然你地唔可以…爸爸唔可以見證我小學畢業….媽媽睇唔到我中學畢業，但我想話佢地知，我今日……係你地相識嘅地方畢業啦……我終於…...終於……幫媽媽完成左妳嘅遺願…所以...我好多謝每一位老師….職員….多謝你地……同埋…..我同爸爸一樣…..係到搵到我一生嘅幸福…… ……你地可以放心啦…家姐要嫁人啦…佢要嫁俾Captain Fong …姐夫…今日正式晉升為機長，佢永遠都坐係飛機駕駛倉嘅左邊…家姐佢今日戴左隻一卡嘅卡地亞鑽石戒指….價值大約7萬蚊…….我知爸爸媽媽今日有黎到…..所以我都想多謝佢地……冇呢間學校、冇我屋企人，就唔會有今日嘅我…而家…就輪到我…去追逐自己嘅夢想…」
 
「Captain Ching!!!多謝你呀!!!!你令我同Ivana呢兩個剩女有人肯要呀!!」Joanne係位企起身大叫
 
「你永遠都係我地心中嘅男神呀!!! 程逸風機長!!!」Ivana附和Joanne
 
「姐夫!!!你一定做到飛機師架!!!!!你會著住飛機師制服同家姐行婚禮架!!!」
 
「阿哥!!!我愛你呀!!!!我等緊坐你果班機架!!!」
 




「Captain Ching!!! Captain Ching!!! Captain Ching!!!........」
 
「多謝大家….希望各位唔好放棄自己嘅理想」
 
致詞完畢，我再一次整喊成千個女仔，我返到座位途中，雪凝唔理在場好多人係到，係個位到走出黎著住校服攬實我喊