為了實現媽媽遺願，我成為了女校男生: 雪晴的坦白

因為我地兩個應承左雪晴，唔將佢差d將自己俾埋人嘅事話俾ba b聽，所以阿風都打算唔講哂所有事出黎，而果晚雪晴好坦白同我講左一樣野
 
「家姐…我唔應該呃住妳…但我怕講左…妳會好憎我，唔會再認我呢個妹妹」
 
「做咩事呀?我係妳家姐，一世都係，我點會唔認妳?」
 
「但係…呢件事係好過份…關係到…關係到…」雪晴D眼淚不停流出黎然後跪係到扭耳仔
 
「咩事?有咩都可以同家姐講喎，妳起身先啦」我用力將雪晴扶起身
 




「呢件事…得Ivana姐姐同Jasmine姐姐知道…佢地知我點解咁快想拍拖…因為…我想逃避果個人…每日都係我身邊出現嘅佢…我每日睇住佢同自己最親嘅人一齊甜甜蜜蜜…」
 
果一刻我意識到，我之前所諗嘅野，原來係真
 
「妳講啦，家姐唔會嬲妳」
 
「我… …我…我…我真係鍾意左姐夫呀…」
 
雪晴邊講邊喊，仲愈喊愈犀利，所以我緊緊攬實我妹妹
 




「果次…果次家姐妳呷Jasmine姐姐醋…其實我都好唔開心，果陣係Ivana姐姐陪住我…到家姐妳生日果日妳地一落電車，我就跟到妳地實，直到姐夫同妳…同妳…果陣，我真係企係妳地附近喊，果時都係Ivana姐姐陪住我…上次妳地去christmas ball…係Jasmine姐姐陪我喊….」
 
「唔洗喊啦傻女，家姐早就知道，妳係開學第一日，佢摸妳個頭果下已經鍾意左佢係唔係?」
 
「對唔住呀家姐……我唔係有心同妳爭男朋友架…」
 
「傻女，如果…妳真係咁鍾意佢…家姐讓佢俾妳好唔好?」講到呢到我都開始流眼淚
 
「唔可以架家姐…佢心中只係鍾意家姐妳一個，佢可以鍾意妳10年，家姐妳都係，所以…如果家姐妳退出，佢就一世都唔會再理我地兩個架啦」
 




「傻妹，點解妳咁為家姐著想?」
 
「因為妳係我家姐…世上最錫我嘅人」
 
「家姐呢一世都會咁錫妳，傻女」
 
「所以家姐妳要應承我，妳地兩個要開開心心咁一齊，我要做妳伴娘，睇住妳嫁俾姐夫」
 
「嗯…家姐應承妳」
 
雪晴喊喊下，喊到好攰就瞓著左
 
我呢個妹妹真係好為我著想，寧願自己辛苦都唔想傷害我，果下我覺得，雪晴真係大個女啦
========================================================/
沖完涼之後，雪凝突然衝入我房攬實我係咁喊




 
「bb豬做咩野呀?做咩事呀?」
 
雪凝喊左好耐佢先慢慢講到野
 
「原來…阿妹為左我…自己收埋哂所有事，佢寧願自己一個人辛苦…我做家姐竟然發現唔到，我好冇用呀!!」
 
「妳講我知發生咩事?」
 
「雪晴個傻女，原來一直鍾意你…」
 
「下?」我聽到之後個腦係hang左，佢地兩姊妹都同時間鍾意左我?
 
「發生咩事呀?」
 




「你唔記得開學果日，你對佢做左d咩呀?」
 
我諗一諗，應該係果個動作啦
 
「妳指我摸佢個頭，彎低身果下?」
 
「嗯…我個妹都係女仔黎架，仲要係剛踏入青春期嘅女仔，突然間有個六呎高嘅大哥哥咁樣對佢，佢會唔心動咩?你又咁錫佢，佢鍾意你好正常」
 
「但係佢知道…我同妳…」
 
「我生日果日，佢一直都係我地背後喊緊，如果唔係Ivana聰明，知道個妹會跟實我地，雪晴都唔知要喊幾耐」
 
「正一傻女黎…佢而家點呀?」
 
「佢喊到攰瞓左啦，佢仲要我同你開開心心咁結婚…」




 
雪凝未講完所有野，我攬實佢
 
「我知道要點做啦bb豬，我會好好照顧妳地兩個，唔會再俾妳地喊」
 
「你呀!真係犀利啦，學校入面至少有三個女仔鍾意你，又可以一次過整喊成千個女仔」
 
「邊得黎三個咁多」
 
「我同雪晴之外，仲有Jasmine囉!你唔係唔知呀?佢由細細個都鍾意你到而家」
 
「詩敏都係?唔會嘅」
 
「我話你知，女仔嘅直覺係好準，佢上次運動會黎搵我果陣，佢第一眼望我果時，佢眼神係好似挑戰我咁樣，如果你唔信，你問問姐姐，佢一定知道」
 




「但詩敏明明F.1時已經同男仔拍拖，仲俾契媽扔埋出家門喎…佢點會…」
 
「Jasmine俾契媽扔出門口??我以為就咁趕出去咋」雪凝聽到後個樣非常驚訝
 
「聽日先講妳知，妳快D返去陪阿妹瞓啦」
 
「嗯…」
 
而家D細路女真係…
 
一落床，就收到舊校班fd嘅消息，我睇完之後…
 
「死靚仔……」