為了實現媽媽遺願，我成為了女校男生: 日本之旅（12）

「風仔，辛苦你啦，尋日要照顧佢兩個，仲去到廣島咁遠」
 
「佢地都好開心丫，而且好聽話，冇咩點搞事」
 
我同林醫生兩個係火車博物館到睇火車
 
「風仔，拿…你係男仔，你諗咩我知嘅」
 
「下…林醫生…你…做咩呀?」我下意識保護自己菊花
 




「你18歲，家姐17歲，兩個年輕人對果樣野一定有好奇，我都預左個女都會有一日將自己交俾佢男朋友」
 
「呀…醫生…我地真係未…未去到果個關係」
 
「我知嘅，每朝媽咪去叫佢地起身果陣都係兩姊妹係房。我只係話，如果要呢，你地要做好安全措施」
 
俾林醫生咁講，我都唔知點答佢好
 
「係…我明白，但係醫生你真係咁信我?我始終早年俾人警司警誡過…係大家眼中最壞嘅學生」
 




「你有冇販毒吸毒?冇丫嘛，我平生最憎係販毒吸毒嘅人，但我知你冇，你係一個好男仔，有邊個會為左自己媽媽嘅遺願而會迫自己讀書，壓力大到識死自己都唔放棄?迫自己入女校做女校男生?如果你唔係孝順仔嘅話你絕對唔會咁做」
 
「醫生...你太過獎啦…」
 
「仲有，你用情專一，由三年級開學鍾意家姐，到F.6都冇變心，你呢D男仔世界真係好罕有」
 
「咁…雪凝佢又真係幾特別，好難忘記佢嘅…」
 
「咁你鍾意我個女D咩?我真係好想知」
 




「三年級細細個就簡單鍾意佢靚女，但係去到四年級同佢相處落就發現佢心地好好、好幫人、善良，無論我點蝦佢，我一有困難佢就會幫我…果陣我爸爸過身，我第一日返到學校，佢係唯一一個同學問候我，然後陪足我一星期嘅同學，所以我先覺得佢好特別。佢見我而家自己一個食街外野，又會煮埋飯俾我。見細個整爛爸爸送俾我隻錶，又要醫生你幫我搵人整。之前去物理治療佢又好照顧我…」
 
「個傻女三年級就鍾意左個同學我早就知，但我都估唔到佢同你一樣咁專一。你究竟做左D咩呢?教教我都好喎」
 
我好尷尬咁解釋返哂成件事俾林醫生聽
 
「所以我兩個女話你做事唔按常理出牌，好瘋狂係冇錯」
 
「其實醫生，有時我覺得，唔按常理出牌可能會有另一個效果呢」
 
「冇錯，個個手術雖然一樣，但每個醫生做法都會唔同，你幾有潛質做醫生，唔會考慮下醫科?」
 
「林醫生，我都考慮過讀醫科，不過我細細個有一次去旅行搭飛機果陣，見到有戰鬥機飛過，佢地自由自在咁飛，吸引左我做機師。醫生要對病人負責，有失誤有其他同事護士藥劑師幫手解決問題，但機師唔同，膊頭第四劃比起專科醫生更難考，始終機長要負起所有責任，全機乘客機員、地上人員同市民安全，挑戰性更大」
 
「有大志，所以我放心將家姐嫁俾你」




 
「下…醫生…你真係打算將雪凝嫁俾我?我先得果18歲…」
 
「年齡唔係問題，結左婚都可以讀書，特別你兩姊弟咁細個就冇左父母，所以你地心中都想早婚，俾返個家感覺自己，我有冇講錯?」
 
「醫生你真係好犀利」
 
「我係街坊醫生，所以睇野係闊D，所以呢，只要你肯娶雪凝，我會將佢嫁俾你，但我只有一個條件」
 
「我會好好對佢，唔會令佢唔開心，我會愛雪凝一世」
 
「聰明仔，而家我交樣野俾你做，睇下你做唔做到一個好姐夫」
 
「你係指雪晴可能會好快拍拖件事?」
 




「冇錯，始終阿妹太細，F.2拍拖我係絕對反對，至少去到F.4先開始拍拖就冇問題」
 
「明白醫生，我會幫你照顧埋雪晴」
 
「咁我就放心啦，好啦，睇返呢個蒸汽火車…」