為了實現媽媽遺願，我成為了女校男生: 日本之旅（7）

阿風每一次見到其他人一家人開開心心咁玩果陣，佢自不然會流露出掛住屋企人嘅日子，所以我決定每一次嘅家庭活動都要帶埋佢出去，既然我夫家嘅人已經唔係到，所以我娘家就要負起呢個責任，俾我未婚夫一個家嘅感覺
 
所以之後果日去USJ，佢就俾雪晴玩到癲咁滯，平時一向做野唔按常理出牌嘅阿風，遇上我妹妹嘅結果顯而易見
 
講玩機動遊戲，應該冇人痴線得過我妹妹
 
「呀!!!!!!!!!!!!!!!!!!!!!!!!!!!!!!!!!!!!!」
 
阿風已經第三次係過山車上大叫，佢俾雪晴捉左去玩幾次
 




雖然話佢想做飛機師，但係唔係做戰機機師，所以玩呢D機動遊戲唔知對佢將來有咩訓練成果
 
佢好易就俾雪晴呃左上去
 
「你點呀?你玩唔到就咪陪阿妹癲啦」
 
「冇野嘅…」
 
其實我有時都會呷我妹妹醋，因為阿風真係好鍾意同佢玩
 




「妳唔洗呷個妹醋啦傻妹，妳個妹即係我個妹，我錫佢係應該嘅」
 
「其實…如果呢…阿妹拍拖你會唔會反對?」
 
「咁佢大個會識男仔架嘛」
 
「我指中學階段喎」
 
「妳而家夠係中學生啦，妳咪又係拖住我隻手，有咩問題?」
 




「咁…怕個妹俾人呃嘛。你估個個男仔都好似你咁咩，讀書時代冇追過女仔，一追就係追自己老婆咩」
 
「我冇追過女仔者，不過有女仔追過我呀」
 
我一聽到就覺得好突然「你唔係話你冇女朋友，冇追過女仔咩?」
 
「我係冇追過呀，不過有人追我咁解者」
 
我雙手捉實阿風塊面，雙眼望實佢「我今晚俾機會你同我坦白交代!!!」
===================================================/
 
呢D咪叫衰多口囉，夜晚我沖完涼冇耐，雪凝就好似審犯咁入黎我間房，而雪晴就好似做法院旁聽市民一樣，即花生友
 
「好啦，你可以講你D情史我知啦」
 




雪晴開左包大薯片係到邊食邊聽
 
「邊有情史呢…」
 
「有幾多個女仔追過你?」雪凝一臉不滿咁問我
 
「F.1-2就一定冇，我果陣日日放學都係去篤波之類」
 
「F.3-5呢?果幾年你成績又咁好，又生得咁高，點會冇女仔鍾意你呀?」
 
雪凝果陣嘅殺氣就好似人馬座聖鬥士艾洛斯咁樣，即將使用原子力雷神光速拳向我進行攻擊咁
 
「果陣只有一個女仔追過我者，係隔離班嘅」
 
「上次有冇見到佢呀?」




 
「佢都夠分升中六，不過係隔離文科班嘅…」
 
「佢點追你呀?」
 
「咪約我食飯呀，睇我打波呀，一齊落自修室溫書，約睇戲之類囉」
 
「真係咁簡單?人地有冇上過你屋企呀姐夫?」
 
「都話妳家姐係第一個上黎我屋企嘅女仔囉」
 
「佢叫咩名呀?」
 
「Tiffany…Tiffany Choi」
 




「中文名呢?」
 
「蔡綺雯…妳知黎做咩?」
 
「有冇佢張相呀?」
 
「有…成班大合照果陣有嘅」我已經預左雪凝要睇，所以我撳定出黎俾佢
 
「拿…我係到，佢就企係我身邊」
 
「嘩!家姐，同妳冇得比啦，不過人地條裙好短喎」
 
雪凝又扁起個咀「咁你有冇曾經心動過?」
 
「呀…阿妹係到，唔方便講喎」




 
“啪啪”兩聲拍手聲後「我食完薯片啦，你地兩個慢慢」
 
「雪晴妳去邊呀?」
 
「返房囉，姐夫你好好氹返家姐啦，記住安全d呀，拜拜」
 
雪晴返房之後，得返我地兩個人
 
「妳仲嬲呀bb豬」
 
「前日先係飛機到應承ba b唔呃我，原來呢?以前係有女朋友嘅」
 
「佢當我係水泡者，我都冇同佢開始過」既然雪晴唔係到，我就可以放心咁攬實雪凝
 
「唔…唔俾你攬呀」
 
「做咩事者…唔好呷醋啦bb豬」
 
「你真係冇呃過我?冇同佢拍過拖?」
 
「妳如果唔信嘅話，大可以打俾Miss Law問啦」
 
雪凝由扁咀變成鼓成泡腮
 
「當時佢係搵我做水泡者，我同佢手都冇拖過架，妳唔信我?」
 
「你…你唔好呃我先好呀，咁你仲有冇同人聯絡?」
 
「邊有同佢聯絡呢，妳擔心呀?」
 
雪凝自己走入我懷內「咁我未婚夫咁好，我當然擔心架」
 
「妳有咩擔心呢?」
 
「擔心你跟人走囉……」
 
「傻妹」我摸一摸佢個頭後，將我個咀痴實佢個咀
 
雪凝都有向我進行反擊，我地由企係到，到雪凝瞓落床時，個咀都冇分開過
 
大約維持五分鐘左右
 
「唔…好啦，我夠鐘返上去瞓啦」
 
「妳唔留低呀?」
 
「費事要阿妹一個人瞓啦，咁我點知…你要用幾耐喎」
 
「好啦，陪妳返上去啦」