為了實現媽媽遺願，我成為了女校男生: 日本之旅（6）

今日我地唔去太遠嘅地方，因為雪晴次次去旅行都要睇動物，所以我地第一日就去天王寺動物園，不過首先我地幫阿風安頓好，同埋食早餐先
 
「家姐，益左妳啦，姐夫轉過黎呢間到住啦，雖然唔同層數」
 
「咁我又唔係同佢同房，佢間房俾我地擺野之嘛」
 
「咁家姐妳想唔想同姐夫一間房先?想嘅話我就幫下妳啦」
 
「作死妳咩咁大聲!!」
 




「咁家姐係咪想係平安夜…同姐夫…嘻嘻」
 
「唔係喎，我就唔同佢咩住」
 
「但姐夫把持到咩?一男一女共處一室…」
 
「所以呢，我就同返妳一間房算」
 
「講真?」
 




「當然啦，妳估佢唔會夜晚自己一個走出去搵野食咩!」
 
過左一陣，阿風拉住行李黎到我地酒店，放哂野係我地房就出去動物園
 
搭左幾個站，我地係動物園前站落車，一出到路面，俾我嘅感覺完全唔似大阪，似深水埗多
 
「呢到真係日本?真係大阪?」雪晴見到都呆一呆
 
「係呀，呢到好近西成區，所以比較雜，如果妳眼瞓嘅話就入一入公廁丫，包妳精神」阿風強烈推薦雪晴去參觀下公廁
 




呆呆滯滯嘅雪晴只係經過洗手間門口
 
「我充滿力量啦!!!!」
 
個洗手間真係好臭
 
我地經過條隧道之後，再行入少少商店街，就到左動物園，雪晴每次見到動物都好開心好開心，佢係動物園中捉住阿風同我不停走
 
「姐夫!!!呢到寫咩呀?」
 
「哦…呢到呀…」
 
識日文嘅佢幫左我地唔少忙
 
=======================================================/




 
其實西成區唔係大家想像中咁差嘅，咁當然有D地方唔好自己一個人去啦
近動物園呢邊都還可以嘅，有好多舊式將棋鋪，仲有少少地攤機鋪仔
 
終於手太痕，入左100円入去打機
 
係8人街霸，我一打，就要打到爆機先肯走
 
雪晴好明顯係未見過8人街霸，佢睇住我打機非常肉緊
 
「打佢!!打佢!!打佢!!!」
 
順帶一提，我用春麗係非常之勁嘅
 
「嗚呀……K.O.」




 
「嘩!!姐夫你咁犀利嘅?」
 
「我細個打得多啦，小學果時放學成班同學一齊去商場打機」
 
「果陣你地成班一放學原來係跑去打機呀?」
 
「係呀，日日去架」
 
「咁唔怪得你地成班都日日嗌窮啦」
 
「這就是青春」
 
「姐夫呀，而家過左2點咋喎，仲有邊到可以去好呀?」
 




「2點，妳地去Big cam行下囉，成座係到俾妳地慢慢行，唔行big cam咪去激安囉，啱妳地呀，買mask敷面」
 
「家姐都唔敷mask嘅，姐夫你睇下，家姐係天然美女黎架，你執到啦你」
 
第一晚，雪凝佢地已經要去心齋橋地標到影相，見住佢地一家人開開心心咁玩，同我十年前一樣一家四口，個心又開始掛住爸爸媽媽。
 
「bb…你做咩唔開心咁嘅樣呀?」
 
「冇…冇事呀…」
 
「你諗起…老爺同奶奶?」雪凝而家已經可以一眼睇穿我
 
「妳真係識讀心術架?我心中諗乜妳都知嘅?」
 
「記住，我係你未婚妻，所以我瞭解你係好正常」




 
「真係好羨慕妳呢，一家四口開開心心」
 
雪凝拖起我隻手
 
「你而家有我呀，老爺同奶奶唔係到，我會一直陪住你」
 
「我諗緊…將來我地D小朋友問起爺爺嫲嫲去左邊果陣，我會唔會又忍唔住喊呢」
 
「呢D野到時再算啦，只要一日我係你身邊，我都會陪你一直咁行」
 
「傻妹」我摸一摸佢個頭
 
「妳凍唔凍呀?」
 
「戴住你織俾我嘅頸巾，點會凍呢」
 
「妳織俾我果條都好暖呀」
 
但點暖，都唔夠果晚嘅蟹道樂晚餐咁暖，真係好好食呀