《天燈的恩賜》: CHAPTER FIFTEEN
「喂起身啦！」呀諾拍拍熟睡的我。
「嗯...」我緩緩張開眼睛。
電視播放著那些日本綜藝節目，那些嘉賓一直發出「欸！！」、「喔！！」的聲音。
經過昨日的失散事件，我便向阿恩提議叫埋肥強呀諾他們兩個一起走，至少有個照應。
至於呀諾一大早把我叫醒...
就是因為我們要組團前往築地市場了！
這個名字往往在電視上的飲食節目聽過無數次，既然有機會，當然要親身到訪現場感受一下。
有一點我真的覺得日本做得比香港好得多的是..
交通。
當地的交通網絡十分便利，幾乎坐著列車鐵路就能去到所有地方。
我們一行五人乘搭鐵路，在築地市場站下車。
當然不可能是一下車就即刻抵埗。
我們走了幾分鐘的，才剛到七點，我們便來到築地市場的大門。
「哎...好眼瞓...。」肥強打了個呵欠。
「入面咁多嘢食，仲瞓？」呀諾拍拍他。
反倒最懶的呀諾今天卻異常精神充沛...。
「係嘅係嘅！」肥強也用雙手拍打著自己的臉，讓自己稍作凊醒。
一入到場內市場，就已經見到不少從事漁業的大叔在推車交貨。
「其實呢度都唔係好多野行啫...啲人吹到咁大！」呀諾道。
「咪當睇下人地批發嗰啲新鮮海產囉。」阿澄回答道。
「有得睇冇得食....」呀諾扁嘴道。
的確，我們不可能整條魚買回去。
裏面基本上都是以濕攤的海產批發、拍賣競標為主，我們對這些也是開開眼界就好。
「咁...出去出面食囉？」肥強馬上提議。
築地市場的外圍有著不同的食店，有單賣生蠔、玉子燒這樣的小食。
但來到漁市場，自然是要向日本最受歡迎的食物—「壽司」朝聖一下。
「咯咯...」我們敲響一間剛開始營業的壽司店的門。
然後拉開趟門入內，裏面的座位是吧台式的設計，讓客人可以看到壽司師傅當面製作壽司的過程。
「貴撚到....。」呀諾又說。
「試下先啦！」肥強已經垂涎三尺了。
我們每人都叫了一份壽司餐，壽司師傅雖然英文不好，但還是和我們邊聊天邊握壽司，非常友善。
仿如變戲法一樣，一盤盤壽司便呈上我們面前。
一口咬下那肥美鮮紅的托羅，就好像吞了整個海洋下肚子那般...
海膽壽司甘甘甜甜的感覺覆蓋味蕾上下，沾上山葵，微嗆的感覺在喉嚨腚挑逗著。
「唔係講笑，又真係幾好食。」呀諾邊嚼邊說。
「我就覺得個帶子勁正！超多汁！」肥強興奮的說。
「唔係囉！腐皮壽司先係最正！木村拓哉都係咁講架！」阿澄說。
(木村拓哉在那個時候也還頗流行的。)
在他們爭辯的時候，我留意到阿恩將那塊蝦壽司放到了一邊。
「你唔食得蝦？」
「嗯。」
「咁我幫你食咗佢啦～」
阿恩用她的筷子把壽司夾到我的口裹。
「Wowwwww！！！」他們幾個高呼。
壽司師傅也看著我們微笑....
「好食～」我吞嚥之後，吻了一下她的臉。
嗯，因為經過昨天之後，
我更加希望在和阿恩分開之前留更多的回憶。
俗語話「早起的鳥兒有蟲吃」果然沒有錯，當我們再次走出壽司，門口已經是門庭若市，聚集了一大條人龍在等候內座。
「如果我哋晏少少嚟，肯定有排等...。」阿澄說。
「理得佢....我淨係知我好眼瞓....。」呀諾又打了個呵欠。
「唉你條友咁鬼爛瞓....」阿澄掩臉搖頭。
「其實我都想瞓多陣...如果唔係你哋話嚟築地....」肥強附和道。
我看了一下手上的錶，才八點多...
「你哋眼瞓咪返去先囉。」我對他們說。
「好嘢！」
「咁又係嘅，咁早基本上都冇咩行。」阿恩說。
於是我們又回到酒店休息整頓。
阿恩和阿澄也到了我的房間來，她們倆坐在床邊的沙發上。
呀諾馬上便是倒到床上躺著，
我則倦意不大，所以坐在床上不斷按動著遙控器，在電視搜尋不同的節目。
「呢個咪鋼之練金術師？」我印象中最近好像蠻多人推介的。
電視上正播放著那個盔甲人跟那個長頭髮奸角打架的畫面...
「哇！！！」阿恩立即高興得像小孩子看到玩具一樣。
「你有睇？」我問。
「嗯嗯！」
「佢呢排連動漫都開始睇埋！」阿澄說。
「鋼鍊出漫畫嗰陣我都有睇啦！」阿恩說。
「喂..」阿澄想說話的時候
「我冇睇呀..介紹嚟聽吓，同埋唔識日文字幕..」我也剛好開口。
「我啱啱想叫你唔好叫佢同你討論劇情...」
「點解？」我問。
「佢可以同你講足幾日...。」
「邊有咁誇張！」阿恩瞪了她一眼。
然後又坐到我床上，靠著我。
「嗱，呢一幕就係講紅蓮之.......」
「咁點解會咁嘅？」
「就要由一開始呢，佢哋兩兄弟...」
阿恩一直向我解釋劇情的發展經過，又會向我比較漫畫跟動畫的差異....
據剛剛阿澄的反應，恐怕她已經試過一次，因此她早已潛入夢鄉，逃離阿恩的「咒語」。
直至電視播完那集，她還在介紹....
我就像聽睡前故事那般躺在她的懷中，看著她的臉....
「就係咁啦。」
阿恩終於將故事講完。
「你有冇聽㗎...？」
「乜我講嘢真係好悶咩...？」
她正打算放下我的頭在床上時，我趁著她起身的動作將重心轉移之際....
反轉身體將她整個人壓倒在床上。
「你...扮瞓嘅！」她鼓起腮紅的臉說道。
「如果唔係，又點樣將你...嘻嘻嘻嘻！」我又再次裝變態佬想咸濕她。
「嗯嗚...」她被我輕力的觸撫弄得輕叫一聲。
「唔好啦！佢哋係度啊！衰人！」她半斥半笑的說。
「即係佢哋唔係度我地就可以..？」我奸笑著磨擦雙手。
「唔得呀！咸濕仔！」
「好啦....」我扁嘴道。
當然我也不是真的想要幹那種事。
到眾人再次醒來的時候已經是十一、二點了。
「啊...早晨！」阿澄張開雙手道。
「就嚟晏晝喇....。」我說。
「頭先仲話我爛瞓...！結果原來自己先係！」呀諾語中帶點不岔。
「哼！唔話得咩變態佬！」
「唔通你覺得可以？仲有我唔係變態佬！」
「食屎啦死變態佬！」阿澄拿起咕旬想要擲向呀諾，而且還特別加強最後三隻字的語調。
呀諾立即起身穿起拖鞋，跑出酒店走廊。
「咪走呀你！」
「你叫我唔好走我就企喺度俾你捉呀..？」
.......
「噗～」
「喂你倆個大細路咪嘈到其他人啦...」我沒好氣的說。
「係囉係囉，咁精神不如而家出去玩喇～」阿恩附和道。
「嗯？你想去邊？」我擰頭望向她。
「嘻嘻，當然係秋葉原啦！」
秋葉原，宅宅的勝地，對阿恩這樣的宅女而言絕對是天堂般的存在。
「唔好理肥強喇佢仲未起身。」呀諾說。
「咁我哋四個出發啦～」阿恩高呼。
秋葉原和其他東京都內的著名地標也大多是位於山手線。
而且都有聽過一句說話，要認識一個城市，就首先要從它的鐵路網絡著手。
因此我們依然都是乘搭鐵路。
呃....絕對不是因為沒錢坐的士..絕對不是。
從車站出來之後，就是大名鼎鼎的電器街大十字路口。
如果話竹下通是旺角，那麼秋葉原就是深水埗。
有許多很販賣業餘無線電、電腦零件等的專賣店，就像高登一樣。
當然，我們又豈會注意這些家品電器，就算買了也抬不回香港啊...！
我們走過了一條街，又感受到了秋葉原的另一個魅力之處....
「@$:&@;$@/fjxz72)/@」
一個身穿黑白色女僕裝的少女走近我們，說著一大堆我聽不明白的日語。
「Errrr，I can’t find the right word...有乜人知佢噏緊乜...」我說。
「我都唔識聽。」呀諾聳聳肩。
然後阿澄亦將目光轉移到阿恩身上。
「佢話...呢度有間新開嘅女僕咖啡店，叫我哋去試下。」阿恩說。
「咁正！？」呀諾睜大雙眼。
望向眼前的女僕裝少女，絲質上衣在胸前開了個洞，露出乳中的深溝....
「兩個變態佬...！」阿澄雙手拍向我們兩個男手的後腦。
「哎呀...」呀諾大喊。
「嘻....」我面露尷尬的微笑。
「你想去咩......」阿恩望向我。
我當然耍手擰頭，要知道女人吃起醋來可怕到極。
「算你啦～」阿恩笑說。
「呼。」我輕擦額上的一把冷汗。
「縮沙...」呀諾望向我搖搖頭。
「收皮...行啦。」我說。
面前一整條街道都動漫周邊的專門店，阿恩當然是周圍「尋寶」，然後買了一個好像叫什麼愛德華的Figure。
海賊王、火影忍者那些阿恩也買了不少商品，例如是公仔、貼紙...
至於我們三個倒也沒什麼特別想買的。
之後的行程就是在市內逛著，然後又到了寵物小精靈的主題館參觀。
因為我們今日行程的要點是「shopping 」！
所以逛完了秋葉原的商圈，我們便坐車去到池袋。
池袋這裏屹立着一棟大建築物，那便是Parco百貨購物中心。
亦都可以說是池袋的地標建築。
而且這裏最友善的地方...是冷氣啊！！
「哇呢度先係人行嘅地方，頭先秋葉原熱到趴街...！」呀諾道。
「夏天都嚟啦，係咁上下。」阿澄說。
「啱呀，聽梁Sir講話過兩日仲有個咩初夏祭典...？」阿恩點頭。
「吓？咩嚟㗎？」我和呀諾異口同聲的問。
「你哋有冇聽梁Sir講嘢...？」
「個個都掛住玩邊有人聽佢講廢話吖...」我道。
「其實我都唔係好知係乜。到時先算啦～」阿澄說。
「冇錯！行街先gogogo！！」阿恩說。
第一層即是地下那層，放著不同的展品專櫃，都是一些鑽石首飾、銀器珠寶等的奢侈品。
「呢條鍊...好靚..！」阿眼雙眼發光的看著玻璃櫃裏的一條鍊子...
鍊子上鑲嵌了一顆晶凝通透的水藍色寶石，璀璨奪目...
難怪連阿恩這種不愛美的女生也被這條鍊子迷得出神。
「又真係幾靚嘅...」我嘆道。
不過，價錢不太和善就是了，六位數字的日圓，兌成港幣大概也有數千了。
「放心喎我唔會叫你買，你當我係果啲拜金女咩？」阿恩看了看我，然後抹起一陣嬉笑。
「嗯...不過我都想買條鍊仔比你。」我選了一條吊著摩羯座圖案的黑色手鍊。
然後付過款後，我便把那手鏈套到她幼滑的手腕上。
「我又要！」阿澄指著櫃子裏的另一條鍊子。
「冇人送比你㗎喇！算吧啦！」呀諾道。
「食屎啦你！」阿澄怒斥。
「係都你食先..」呀諾說。
「呀諾哥，你成日蝦人其實係咪鐘意人啫～」阿恩在旁插嘴道。
「痴...痴撚線！冇呀！」呀諾慌忙的搖搖頭。
「係咩～？」阿恩奸笑地咄咄逼人。
「冇呀冇呀，收皮啦行啦太陽落山喇！又話食蘋果批！就嚟賣晒喇！」呀諾推著我們說。
「呀係喎係喎！」阿恩如夢初醒般的點點頭，然後跟着我們快步跑到升降機大堂的位置。
平時M記蘋果批就吃得多，不過這間是旅遊天書推薦的「東京人氣十大必食美食名單」裏的美式蘋果批專門店。
去到那間店的門口，看到門外還真的聚集了不少人潮慕名而來排隊試食，雖然隊伍很長，但店內的員工做事乾淨利落，十分爽手，不用很久便拿到那個面頭是網格狀的蘋果批。
一口咬下，甜蜜的汁液流出，伴隨著煮得軟腍的蘋果肉，在舌尖上散發着清新的香氣，仿似是那些年初戀的感覺。
「好甜。」
「我反而覺得麻麻...」阿恩搖搖頭看向我。
「嗯...？點解？」我不解。
「甜得滯...」
「係喎你唔鐘意咁甜..」我恍然大悟。
「你倆個都夠甜啦！」呀諾笑說。
「咳！」阿澄把他拉開。
「食完就行啦，戇居居咁坐喺人哋舖頭唔好意思。」我用紙巾輕輕擦嘴。
阿恩也從小背包掏出一包紙巾。
之後在二樓的大超市打了個轉。
常言道要了解一個地方的文化，首先就是要去攻略那個地方的超級市場。
這裏的超市和香港那些百佳惠康完全是兩回事，不單止有熟食炸物專櫃，還有售賣着刨冰、軟雪糕，而且以日本貨來計，價格還真的挺實惠。
「我冇嘢買呀。」呀諾說。
「不過我有！」我拿起旁邊堆積如山的其中一條繽紛樂。
「你條友痴痴地...嚟日本都仲要買繽紛樂食...」呀諾道。
「冇辨法，至愛係呢樣。」說罷我和呀諾便跑了去收銀櫃檯付款。
「一共九七円。」店員掃碼過機後用日文說。
我從零錢包掏了一個面值為一百円的銀色硬幣，交付店員之後非常豪氣的頭也不回般離去，示意叫那個店員不用找錢給我。
「妖嗰三蚊你又喺度爛型...」
「吹咩？」我邊撕開包裝邊說。
「你條粉腸要咁我實吹你唔脹嘅..」呀諾無奈的說。
「你條友平時一定窒我㗎喎，轉死性？」
「食...」
「咪住先！」
在他未講完「食屎」二字之前，我便打斷了他。
「喂佢兩個呢？」我問。
呀諾也隨即轉身看向後方，只見到一列收銀機。
「可能仲喺入面睇緊嘢啩？」呀諾道。
「可能啦。」我說。
然後便打算回頭走回去剛剛一列列的貨架堆之中。
剛轉身便看她們正在朝我們的方向走來。
「你哋咁鬼遲嘅?_? 」我問。
「阿恩啱啱係嗰邊睇緊野吖嘛！」阿澄答道。
「喔...睇乜呀？」我又問。
「冇呀....行啦。」阿恩淡然的說。
「哦...」我怔了怔，然後繼續踏起腳步。
「係喎！有冇人諗住今晚去東京鐵塔睇夜景！」阿澄突然之間雀躍的看向我們問道。
「我....」呀諾正準備開口之際....
「你冇得話唔去！」阿澄說道。
「下....人權呢...？」呀諾無奈道。
「我係萬惡嘅獨栽者～嘻嘻。」阿澄抹出奸狡的微笑。
「不過原本諗住去嘅，難得嚟到東京...」呀諾道。
「叻仔識諗。」
「哇難得你讚我真係謝天謝地！」呀諾用浮誇的語氣說。
「乜料...你呢？」阿澄看著呀諾搖了搖頭又轉而望向了一旁的我。
「我...冇乜點特別有興趣。」我擺擺手。
因為個人認為夜麻麻望著那些只會發光的大廈其實有夠無聊。
「咁好啦。」阿澄說。
「......」
於是乎晚上我和阿恩便回到酒店稍作休息，收拾一下今天所購買的東西進行李箱裏。
「喂..」阿恩戳了戳我的後背。
「嗯...？做咩呀？」我問她。
「你愛唔愛我？」她這樣子向我問了句。
「梗係愛啦....做咩無端端咁問？」我有點愕然，沒有想到她會這樣問。
「冇嘢....」她搖搖頭。
「成日都答冇嘢...。」我輕聲說了一句。
「我返房啦，你早抖。」她說。
「好。」我答。
她是怎麼了？
奇怪...。
阿恩走了不久之後，走廊便傳來了吵鬧的談話聲，正逼近我的房門，然後「嘟」的一聲，房門的鎖就被匙卡解開了。
那麼聲音的來源顯然也是阿澄和呀諾的喉嚨聲帶所作出的閉合運動而產生。
「我返嚟啦。」呀諾大喊一聲。
「白痴，咁大聲做乜春！」阿澄怒斥。
「梳囉！」
「乖～」
嗯？幾時開始，阿澄竟然開始可以「食住」呀諾了。
「好一個馴獸師。」我默默的說。
「喔？阿恩呢？」她留意到我之後又張望了一下。
「返咗房喇。」我說。
「咁早嘅？」她問。
「唔知呀...」我答。
「唔好講呢啲住講返你先，你同佢....」
「嗯，諗諗吓就當我自私啲，我真係唔想同佢分手...」我說。
「唉都估到你，你哋將來行嘅路我都唔比太多意見...祝你地兩個開心啦。」她說。
「又會諗得咁開？」
「因為我知道，旁觀者係冇權過問、干涉人哋嘅感情，呢樣野，我都係最近先學到返嚟。」她甜笑著說。
「學？」我又不解。
「咪你後面污糟邋遢嗰條友教我囉！」
「你哋....喔明曬。」我點頭：「有趣有趣～」
我都幻想到，東京鐵塔的暸望台上所發生的浪漫愛情故事。
哈。
「咁呢個就比返你，麻煩到你，sorry！」我說。
她接過御守，然後放到自己的錢包裏收好。
「呼！今日攰死！」
「呼嚕呼嚕....」