《天燈的恩賜》: CHAPTER SIXTEEN
「嘟嘟嘟嘟嘟......」床頭櫃上的內線電話響起，刺耳的聲音快像是要震破我的耳膜。
我在迷迷濛濛之中摸著聲音的來源，然後找到聽筒的位置，便拿起放到耳邊。
「This is the morning call service.」只聽到電話對頭從事客戶服務的男人說道。
我再把話筒放回，然後極不情願的雙手撐著純白色的棉被床墊，把整個身體架起。
「呼。」我搖了搖頭，像小狗那般先清醒一下自己。
「搞乜無端端有個morning call....」我望向同樣也被電話響聲吵醒的呀諾。
「梁Sir set 㗎，好似話今日朝頭早要去嗰個唔知乜國立美術館參觀。」呀諾答道。
「美術館...？有乜鬼嘢好睇..？」我暗道。
「是但啦反正大隊行程，你刷牙先啦！」呀諾催促度。
「喔....好。」我答。
呀諾的性格感覺改變了很多...阿澄真的應記一功。
我看著大鏡子反映著自己的樣子，然後稍為將亂竄的髮絲放好。
「搞掂到你！」我走出洗手間，灑了灑手上的水珠說。
..........
「咯咯...」
到了九點，梁Sir和Miss Chan 便輕輕敲響了我們房間的大門。
「喂～阿揚、呀諾，夠鐘出發喇～」門外的便是Miss Chan的招牌甜美聲線。
「係！出緊嚟！」我和呀諾回覆後立刻打算衝出來。
我們也是整裝待發，便帶著房卡離開房間，並在鐵手把掛上了寫有「請打掃」字樣的紙牌子。
「唔係講笑真係好似鴨仔團....」我看着眼前的巨大藍色旅遊巴說道。
「係爭在呀梁Sir冇扯住支旗...」呀諾附和我道。
「上車啦咁多野講！我帶你地去睇好野！」Miss Chan自信的說。
「okok....」我只好答。
日本的旅游巴依然還是有一陣怪味。
「諾！」阿澄拍了拍在她身旁空着的座位。
「噢...我唔同你坐喇咁！」呀諾回身看了看走在後方的我。
「好好...」我然後又再一次妥協了。
不過自然都有人在等我坐過去，我橫看了一陣子，看到後排的雙人位。
阿恩挨着窗邊，擺出一副若有所思的樣子。
「阿恩？」我掦了掦手。
「喔喔...坐啦，有少少攰啫。」她說。
「你琴晚冇早瞓咩？」我問。
「呃...」她想了一想。
「趁而家喺車度瞓一陣啦！」我指著座位上的後枕道。
「嗯...。」她點頭，然後閉起了眼睛。
而我則是趁著車程，瀏覽著高登討論區，
按起了成人.....喔不。
是時事台。
看看這幾天香港發生的事情，不過也其實沒有什麼特別，跟平時差不多還是沒兩樣。
然後又順手看了看感情台..
「有冇人覺得天氣一熱就好易分手？」
這個標題其實有點無稽..？
那有人會因為天氣而分手？
我按了進去看。
「因為一到夏天個人就會燥#fire# 」
有人這樣說。
正當我準備繼續看下去...
「差唔多到啦，咁多位同學收埋自己嘅野啦。記住一定要帶齊野落車，後邊嘅同學幫手睇吓有冇人漏咗野。」梁sir用麥克風說道。
我便關上手機，輕輕叫醒阿恩。
「醒喇！」
「嗯。」
「呢度就係東京國立新美術館喇～」學校聘來的那個會說廣東話的日本導遊，正指著前方的那棟水藍色波浪狀結構的建築向我們介紹道。
「哇！」幾位女同學撫起臉，張大嘴巴驚嘆道。
踏入黑色大門，迎面而來的正是美術館的主體，兩旁則是具有時尚設計感覺的翠綠庭園。
陽光從美術館外圍的玻璃窗反射到我的瞳孔內，霎時間才使我把眼前這座，建著玻璃幕牆，呈現波浪型狀的壯麗建築物看清。
走近一看，發現從外面也可以透過玻璃看到裏面...。
「嗱，呢個就係參考左法國羅浮宮博物館嘅少少特色，係咪好特別呢！大家可以影低架，你哋睇吓幾靚！！」
那個導遊怎麼感覺比我們還高興...。
至於美術館的入口處則是做成了圓錐筒的形狀，好不有趣。
「你哋而家見到嘅呢一棟建築物係獲得多項國際榮譽大設計師，黑川紀章嘅作品.......」
「你睇吓嗰邊～～」我聽到阿澄輕聲說。
「哇成個武士鎧甲喺度...有啲型。」呀諾望向阿澄指著裏面的一座等身大武士模型。
「呢度行入去就係展覽室，因為美術館只係負責提供場地嘅啫，所以呢大家今日見到嘅藝術作品將來都未必會再見到㗎喇～」導遊又繼續解釋著。
我和阿恩並肩走入這個設計感十足的展覽室踱步，然後發現原來這剛好是某漫畫家的展覽，館藏正展示出許多這位漫畫家早期的手稿，紙邊角落早已泛黃老舊。
看見阿恩的眼神硬硬的盯看著手稿的一筆一痕，像是想要即席大筆豪揮一樣。
然後又看了看我，再然後又重新細心看著每張展品下的簡介牌。
我也不多作聲，仔細留意著她專注的樣子，認真起來的她，有種別樣的美態。
「覺唔覺得以前啲人環境咁差都仲可以堅持自己嘅初心...真係好犀利呀？」阿恩笑著問。
「我又覺得佢哋正係因為生活所逼而先有呢一番成就。」我答。
「嗯...？」她擺起一個不解的臉。
「嗱...就好似李嘉誠咁！如果唔係當時生活艱難佢都唔會咁努力，亦都唔會有如今嘅地位。」我解釋道。
「哦...！噫！一時之間講到咁鬼遠添！哈哈～」阿恩笑言。
「Errrrr...」我無言。
「呢個漫畫家真係好勁，行啦～」她朝著下一個展覽廳走去。
「係幾勁，欸等埋我啊....。」我呆了一呆然後再跟上了她。
這個展覧室則是一個專門作古畫展的區域。
我和她並肩看著發黃的畫布，嘗試感受一下畫作帶來的感覺。
當中不少畫作都是基於日本古代的傳說而畫的，而多半是百鬼夜行、茨木童子之流。
「安倍晴明呀...」她指著其中一幅畫上的男人說道。
「你又知...乜水嚟？」我抓抓頭。
「好似係古時日本嘅大陰陽師？」她說。
「咩叫陰陽師？陰陽人就聽得多...:o)」我試著搞冷笑話。
「你條友真係冇句好...」她掩臉搖搖頭。
「陰陽師，係專門負責降魔伏妖的使者，亦可以話係九界之間嘅守護者。」一個背著背囊、同樣也是香港人的大姐姐靠了過來。
好像在哪見過她？
「好深..唔明。」我搖頭。
「喂Crystal ，搵成點？」一把聲音傳出。
「唔緊要，我都係講下姐，玩得開心啲！byebye ~」她對我說罷，便匆匆那聲音的方向離開了。
.....
「乜而家啲陌生人嘅搭訕技巧都變到咁高超...？不過個女仔好似好勁咁....。」我說道。
「咁佢睇落都應該有廿幾歲嘅，點都識得多過我地。」阿恩答我道。
「咁又係嘅，好繼續睇～」我說。
「肚餓呀～！」阿恩嚷道。
「我記得呢度係咪有間咩米芝連三星餐廳...」我想了想。
「傻咗咩！我幾時會要你洗咁多錢食呢啲嘢...」阿恩立刻擺手道。
「咁啊...我有繽紛樂，要唔要食住先吖～？」我問。
「好呀～」
我後來才知道那間米芝連法國餐廳真的貴得嚇死人，便拍了拍胸口大喊幸好。
當然這種餐廳也不是主打我們年輕一族的生意。
「大家喺度參觀左成個鐘，應該都睇咗好多野喇係咪呀？」梁Sir將我們全班同學聚集到了大堂中間一起說。
「好唔好睇先？」梁Sir又問道。
「點解咁問？？」我們反問他。
「其實呢...」他欲言又止的。
「講啦屌！」R同學說。
「喂講還講唔好講粗口呀！」他看向那人。
「okok....」R同學點頭回應。
「其實我就同你哋呀Miss Chan打咗個賭，賭下我地一人提議一個地方，睇吓你哋會鐘意邊個地方多啲？」他說。
「所以你就揀咗美術館...？」我們問。
「冇錯喇，正唔正先？」他自信的問。
「Errrrrr....想唔想聽真話先？」呀諾主動問道。
「講。」
「好老餅，仲有啲悶...」
「你哋啲後生仔女唔識欣賞呢啲藝術品！」
「其實都幾好吖，不過Miss Chan諗住安排我哋去邊度先～？」我身邊的阿恩開口道。
「大家唔知識唔識一支劇團，嗱。」
Miss Chan從包中掏出一張Poster，
poster上的....印象中是一個國外享負盛名的日本劇團。
「音樂劇？」我不確定的問。
「係呀～」
「正呀！！」A男高呼。
「好想同Miss Chan瘋狂睇音樂劇！」B男悄道。
梁Sir沒好氣的瞇起眼搖了搖頭，仿佛找到了自己的敗北之處— 因為Miss chan是美女。
「咁幾點睇？」
「今晚七點半酒店大堂度集合！而家...係大家嘅自由時間！」Miss Chan說。
「OK!!!!」
一說自由時間，同學們便四散而去了。
「去邊呀咁我哋？」我問阿恩。
「不如順便去埋國立博物館？」
「又好喎。」
一八七二年開館的古老建築...比我阿公的阿公還老，當然值得一看。
「咁你哋去唔去？」我向阿澄和呀諾招手道。
「唔喇，我哋有自己節目～」
「好吧。」
一時之間感覺上好像被朋友拋棄了，哈哈。
「咁我哋兩個去～！」我說。
「嗯。」
不過二人世界豈不美哉？
我們也再一次是沿著山手線探索，在上野車站落下，前往附近的上野公園。
而佔上野公園一大部份面積的就正是這座日本歷史最為悠久的東京國立博物館。
「你知唔知點解呢個世界..有東京、南京、北京...但係冇西京？」我問。
「嗄？點解？」
「因為西經比人取咗hahahahaha...」
「呃...傻仔掦。」她說。
「嘻嘻，入去啦。」我說。
國立博物館裏頭其實還有細分著幾個不同的別館區域。
分別是本館、東洋館、表慶館、平成館和法隆寺寶物館，還有後方一個絕美的庭園。
甫進入博物館的本館前地，面前就是一個波平如鏡的水池，清池的綠池倒映著博物館和空中的藍天白雲。
正值初夏，館外叢中的野花更是顯得璀璨美麗，比起明治神宮，這裏的是另一種景象。
那裏恬靜怡人，這裏則是熱鬧燦爛。
「喂，我哋好似個目的唔係為咗入嚟睇風景架喎....！」我拉了拉阿恩。
「好似又係喎，哈哈...咁就由呢度本館開始行。」
我們就這樣順序由本館開始行，之後再行過一旁東洋館，然後再走別館收看館藏。
有古畫、有武士刀等等...都教人目不暇給，大開眼界。
之後還行到了座落在本館後方的日式庭園，幸好開放期還未完結，碧水河山，令人心曠神怡，感到寫意悠然。
「&@;(&@:/&&6;5$/?$7？」一個操日文的男人在我們遊覽結束走出大門之前，叫停了我們，並且拿著一張地圖在上方指指劃劃的。
「嗄？」我下意識的回了一句。
然後我又再將阿恩當成翻譯年糕那般的一臉疑惑看著她，祈求她為我解釋那個人到底是在向我們說了些什麼。
「佢話...佢係呢度嘅職員，見我哋係游客，就諗住介紹我哋去呢個動物園。」阿恩指著剛剛那個人指著的位置說道。
地圖上顯示，這個動物園只是在我們所在的國立博物館一街之隔的恩賜公園裏。
「咁近咪去囉。」我點頭。
「It’s very good！you will be love it！」那人見我點頭，便繼續用着他那不太標準的英語水平硬生生的向我力薦。
上野動物園和上野國立博物館一樣，都是日本最老的先祖輩產物。
之後我們便花了幾分鐘步程前往動物園，然後買票進了東園入面。
「咦....有啲臭。」阿恩捏了捏鼻。
我隨即吸了一口氣....咳咳..咳！
「動物園大陣屎臭味是常識吧！」我說道。
「係㗎咩..？」
「你估隻隻動物都好似海洋公園啲熊貓咁淨係識得瞓，連屎都唔屙咩？[sosad] 」
「啲熊貓食緊竹呀！」阿恩指住我的後方。
我轉頭一看，果然見到一隻熊貓正在玻璃幕之後啃食著竹子葉。
果然是「說熊貓，熊貓到」啊。
前方還有赤臉彌猴、駱馬等的動物，牠們倒也膽子不少，還會主動跟圍觀牠們的遊客「打交道」，哄得遊客津津樂道，沒跟牠們拍過十張八張Selfie也不願意離開。
之後我們再乘搭園內連接東西園區的纜車前去西邊的園區。
這裏的山羊比起剛剛東園的大型動物更顯得親切友善，滿地奔走。
小山羊們像小貓小狗一樣，個子不大不怕生，一見到我們就竄到了我們的懷中。
「哇好得意吖～！」阿恩摟著小山羊的身體。
「好彩我冇羊毛敏感啫～」我也摸了摸小山羊白色的皮毛。
「我要再宣佈！山羊取代貓仔成為最可愛嘅動物！」阿恩舉起手高呼。
「咁我都要宣佈！」我說。
「宣佈啲咩呀？」阿恩望了望我。
「我要宣佈！夏天恩先係最可愛嘅～」
「嘻嘻！」阿恩偷笑了起來。
山羊對著阿恩笑，阿恩又對著我笑。
甜美得快要把人融化的笑。
眼前的景象，又令我想起了我和阿恩起初相識時的情景。
我最一開始....會喜歡這個女生，是因為在我皮膚敏感時她死命要拖著我去看醫生。
那是一種透徹心扉的關懷...。
當時的我對愛情的觸覺也不太敏銳..。
「諗咩呀？」阿恩問我。
「諗返起一開始嘅我哋啫。」我答。
「喔？」她應了一聲。
「吖！頂而家都成五點添！快啲去食嘢然後返酒店同佢哋集合喇。」我被園內的電子時鐘嚇到。
「嗯。」
上野這個地方不愁美食，我們去了一間販售吉列牛排的食肆用膳，然後就趕緊回到酒店。
之後便是跟住Miss Chan的帶領，去到一個我也不記得在哪區的演奏廳。
其實就跟舞台劇有點相似，不過相比起來，自然是這種大劇團的聲音燈光控制、和舞台效果都做得比較好，而且音樂劇是以歌唱為主題的。
至於劇的內容我則沒太留意，只知道其實梁Sir和Miss Chan所挑選的活動的沉悶程度根本就不相上下，半斤八兩。。。
那麼我也不再多下筆墨在這種細節之上了。
「其實咁樣比佢倆個搞一搞好似變相冇咗好多時間....。」我在酒店回房間的走廊上向阿恩說道。
「都係嘅。」阿恩點點頭。
「咁難得嚟一次東京，咁就剩返一日半多啲，時間真係過得好快，可以長居喺度就好。」我呼嘆。
「....」
「恩？」我看向她。
「喔...係呀，長居都幾好。」她回過神來，笑著向我說。
但這個笑容，卻像是生硬的擠出來似的。
「早抖啦。」我在她的房間門口看著她走進去。
然後再轉身朝自己的房間方向走去。
「喂～頭先我係咪聽到有人講我壞話先？」
我認得出來，這是Miss Chan的聲音。
「Errrr邊有。」我故作四處張望。
「音樂劇好唔好睇都唔重要啦，最重要係珍惜仲有得享受嘅時間。」她說。
「嗄？唔get....。」我一臉不解的看著她。
「係咪當我係家姐先？」
「Errrr，當囉。」
「咁就聽我講啦。」
話說其實早兩晚我都有在whatsapp上跟「家姐」Miss Chan訴說著我和阿恩的事。
雖然她從不干涉其中，亦不會八卦中間的細節，但是都會給我很多的「人生建議」。
「好。」
那怕其實我不明白她在說什麼。
我轉身之際，她又叫著了我。
「係喎，聽晚會有個初夏祭典呀，你哋可以就去下啦，趁最後一晚。」她說，然後向我遞出了活動簡介的單張。
「喔....好。」我接過單張便回到房間。
我躲在房間裏，吃著某出名品牌的「日式九洲豬骨濃湯杯麪」，喝著在樓下便利商店買來的「夏季限定黑加侖子味果酒」，細閱著剛剛Miss Chan交給我的單張。
看了一會，我看著上面的平假名片假名，才想起自己不懂日語是要看個屁？
於是我便在WhatsApp send 了給阿恩看。
我：「睇唔明！」
阿恩：「邊度拎返嚟架？不過好似幾正咁。」
我：「所以地點嗰啲係咩...。」
阿恩：「唔話你知，等你心思思！」
我：「搞錯！我覺得你應該要教我日文！」
阿恩：「有機會先啦。」
我：「冇機會咩？」
阿恩：「Good night~」
....