交友app嘅萬事屋: 啱啱分手
啱啱分手
9/5/20
其實究竟阿銀點解當初會選擇玩交友app？係咪真係因為係屋企太悶冇嘢做而去玩，定係有啲咩其他原因佢先會去玩交友app，而呢個原因即將被揭曉⋯⋯
今日係6/5/20，(即係遇到兔姐嘅同一日)唔知做乜鬼我晨咁早就起咗身，依家先九點，而我嘅習慣就係通常起身，都會賴一陣床先，咁我就喺度玩緊手機啦，玩玩吓又上咗去交友app度，咁當我喺公海碌緊，睇吓有邊個可以撳入去傾嘅時候，突然間個通知就顯示，有個女仔寫住「啱啱分手」，跟住我先醒起，係喎原來我冇轉到標題，不過唔緊要啦橫掂都冇人同我傾緊，就做下佢樹窿左啦。
經過一輪自我介紹之後，佢叫Miki，係一位讀緊中五嘅女仔，咁我就問佢關於個標題嘅事啦，咁佢就話，其實呢佢就拍咗三次拖，第一次呢都有成年㗎啦，之後嗰個呢就半年，今次呢個呢就一個禮拜 ，其實之前嗰兩個都係一啲爭執而散，不過今次呢個有少少唔同，佢係喺ig嗰度識嘅,因為過往嗰兩個都係同佢同年，或者大佢少少嘅啫，不過今次拍咗一個月呢個呢，就都大佢起碼有五年 ，miki一開始就覺得佢比較成熟啲個人識諗啲，會成日都好照顧佢咁，所以喺埋一齊嘅時候好舒服，因為佢唔會需要去照顧另一方。
不過好景不長，男方就開始少咗同佢聯絡，一開始佢就以為可能係個男仔嘅工作需要，因為佢做呢份工成日都要出去應酬，應該係因為工作關係所以先唔得閒搵佢，但係之後就發現越來越唔對路，就開始同佢朋友講啦，因為呢個男仔，其實係Miki嘅朋友介紹，不過佢嘅朋友就話佢都唔清楚，不過佢之後就發現佢越嚟越搵得佢少，有每一日可以傾幾個鐘頭電話，變到差唔多兩三日先搵佢一次，之後Miki有一次就頂唔順就直接問佢，咁佢呢就竟然話，其實你上得交友app唔係以為真係有人同你認真，唔好傻啦我都係同你玩玩下嘅咋，miki 聽到，佢嘅眼淚好唔爭氣咁係佢眼角嗰度流左落嚟，但係Miki都好堅強咁同佢講，咁算啦我哋，無謂再浪費大家時間，之後個男仔就走咗再冇聯絡。
「哇係聽你咁講完，其實交友app真係咩人都有，咁而家你點呀冇嘢啦嘛？」
「冇嘢啦喊咗一晚之後就冇事，其實都明嘅係我自己痴心一片，竟然真係信交友app會有真心」
「咁我相信交友app一定會有人同你講真心嘅，只不過係你暫時未揾到姐，話唔定遠在天邊跟在眼前呀嘛。」
「咁你咁講都係嘅，不過多謝你呀樹窿，同人講出嚟真係會舒服啲。」
「係喎其實你都自我介紹左，我都未同你講叫咩名添，我叫阿銀，係交友app萬事屋嘅老闆。」
「哈哈，你個名咁得意嘅，仲有咩萬事屋，乜嘢嚟㗎？」
「遲啲你就會知㗎啦。」
「唔講咪算囉，晏少少再搵你啦。」
咁如是者我哋呢幾日都keep住有傾偈啦講吓啲無聊野，又發現原來我哋都鍾意貓嘅，咁大概傾左三日之後就交換左ig啦，當我驚有機會佢會開始冷淡嘅時候，擔心緊佢係唔係外協嘅時候，Miki 反而仲搵多咗佢，得閒無聊就send下啲貓仔post俾我睇，其實我自己都知呢個人相處落都唔錯啊起碼佢係真心先啦，唔係真係咁虛偽，不過我覺得有啲嘢急唔嚟，由朋友開始做起都唔錯啊。
時間番返去今日9/5/20，我同Miki都傾左差唔多有三日時間，咁今日晏晝嘅時候，我都一直都喺度同佢傾計，又同佢講下琴日同Cody出去發生咗嘅事：
「阿銀呀，你琴日咪同你老死出去嘅，搞到我自己係屋企，又冇人同我傾計好悶呀，你哋最後去咗邊度？」
「去咗鴨脷洲食咗個中午之後，就上咗去山頂hea 吓，不過當我哋搭山頂纜車上去嘅時候，真係冇諗過原來Cody咁淆底，條友全程卟喺度，可能我上一次上山頂就係好細個嘅時候，所以已經冇晒印象，跟住夜晚就返番落去觀塘打邊爐，跟住去咗觀塘海濱散吓步就返咗屋企囉。」
「嘩去咗咁多地方啊一定好開心啦，你就好啦可以出街，我就要留喺屋企喺度上堂聽佢講書，真係好鬼悶㗎。」
「不過呢我見Cody咁耐佢都仲係咁癲，諗返起呢以前發生過幾件好。搞笑嘅嘢，你想唔想聽下？」
「好啊你講嚟聽吓，有幾搞笑先」
「咁我講其中一樣啦，咁話說有一次呢我哋就食飽飯然後去行咗一陣街啦，咁之後呢我哋就去咗尖沙咀新開嗰個Donki 行吓啦，跟住呢唔知係咪佢食飯嗰陣時飲得多茶呢，佢就話佢好急尿，咁我哋就喺度搵廁所啦，點知呢就搵極都搵唔到，最後我哋問咗職員先知原來喺附近，咁我哋就盡量行快啲去廁所啦，因為實在太多人，所以我哋唔可以跑」
「咁跟住呢咁佢又好急咁點算呀？」
「咁去到行入廁所之前呢，咁咁啱我就企喺佢前面，咁可能佢就以為我特登阻住佢啦，玩鳩佢唔俾佢去廁所，所以佢就推開我就即刻入咗第一格廁所，點知呢佢入咗去之後我先望到原來第一格係女廁嚟嘅，咁啱佢入去嗰陣時裏面有冇人，咁佢有冇即刻行返出嚟啦，我就係咁喺出邊嗰度笑等緊佢出嚟，突然間呢就有個阿嬸行咗入嚟然後入咗女廁，跟住個阿嬸就嗌喂，跟住我就聽到Cody講咗句仆街，跟住就跑咗出嚟入返男廁。嗰陣時我真係笑到碌地」
「痴線咁搞笑嘅，乜佢入咗去之後唔覺奇怪嘅咩都冇尿兜，咁佢又喺嗰度去咗廁所喎。」
「係呀佢出嚟嗰陣時我都問過佢呢個問題，佢就話佢太急忍唔住，所以就唔理得咁多去咗先。」
「痴線你個friend真係癲㗎喎，咁勁嘅佢」
希望佢聽完之後真係覺得好笑啦，有時都唔知啲人真係覆定係Hea覆，唉唔知呀，可能係我太認真啦我都係想識個朋友真心傾吓計姐。
咁之後我哋就繼續喺度傾偈啦，其實我覺得都幾啱傾嘅，佢又係嗰啲有果句講果句嗰啲人唔會隱瞞，我好鍾意同呢啲人相處因為唔使猜測，咁之後我哋就講到Long d呢個話題啦：
「Miki，其實呢你點睇Long d㗎？ 係咪女仔都唔鍾意Long d 因為冇安全感？」
「其實都係㗎，因為佢唔係你隔離，根本其實你都唔會知道佢做緊啲咩，一來擔心之餘同埋自己都會驚」
「但係如果個男仔成日同你報道跟住又日日都會FaceTime⋯」
「呢啲就基本野啦，一定要做嘅，如果呢啲都做唔到，就一定唔使考慮」
「咁當然啦，做男朋友嘅都要比佢另一半一定嘅安全感㗎嘛。」
「同埋我覺得有陣時就唔只安全感嘅，可能有時都要見下佢真人嘅，所以我情願唔拍啦，搞到自己咁辛苦。」
「咁你咁講都係嘅，唔係個個都接受到Long d 。」
點算呀，聽佢咁講完好似佢完全接受唔到Long d，不過究竟我真係諗乜嘢，人哋上嚟都係訴苦識下朋友姐，唔通個個都好似我咁，咁傻真係諗住搵個認真可以發展嘅咩，算啦，我都係同佢繼續傾吓計做住朋友先，有機會先再講啦，我諗有時都係唔好諗咁多好。
之後我哋就完咗呢個話題，就講吓其他嘢啦，咁跟住呢我就問佢，因為佢ig 啲相呢好多都係嗰啲打卡熱點嚟嘅⋯⋯
「係呢Miki，你係咪好鍾意影相㗎，我見到你ig裏面都po左一啲打卡熱點 」
「係呀，其實有邊個女仔唔鍾意影相呀，同埋有啲都係同Dfriend咁啱去開咪順便打個卡囉。」
「係呀幾好啊，係呢唔知你有冇聽過中環新開左一間好出名嘅咖啡舖叫做「Blue bottle 」 」
「咦乜原來你都鍾意飲咖啡嘅咩，我知啊嗰間野好出名㗎，好似仲攞過獎添，有機會都想去試吓，不過我啲friend全部都唔飲咖啡嘅」
原來佢都鍾意飲咖啡㗎，點好呢其實不如約佢出去一齊去試吓，但係咁樣會唔會太快啊，我哋先傾得個都唔知有冇一個禮拜，點算好啊有啲緊張添，其實我緊張啲咩我鍾意佢咩，冇可能㗎經過上次Hebe之後，應該冇咁容易沉，我諗可能係識咗個新朋友姐，可能自己本身冇乜女仔friend有啲興奮添。我諗都係唔好主動約佢住好似有啲太快
「係咩，其實之前嗰幾日我已經想去㗎喇不過之前咁啱放假好多人排隊，所以我先冇去到咋嘛」
「咁呀不如下個禮拜一一齊去啊你有冇嘢做啊，去試吓嗰度啲咖啡順便打卡囉你識影相㗎嘛」
「可以啊，仲可以順便去埋隔離嘅大館啊嗰啲影吓相都可以」
「好啊就咁話啦，嘩而家都唔早啦我瞓先啦，早唞啦阿銀」
「咁好啦早唞啦」
竟然係咁，竟然係佢主動約我，咁點算呀究竟係代表啲咩啊，死啦我咁樣衰，會唔會出去之後佢就唔理我㗎啦唔同我講嘢㗎，冇理由㗎佢都睇過我IG啦，應該冇事嘅，睇來我太耐冇單獨同女仔出過街，搞到好鬼興奮。
今次將會係阿銀第一次約網友出去見面，究竟呢件事會發生成點呢，佢哋出去嘅期間有啲插曲呢？ 請大家敬請期待！
記得記得，作者為咗提升文章嘅質素，同埋有多啲時間，而家嘅更新次數會改為一至兩日一篇，敬請原諒。