交友app嘅萬事屋: 番外篇：阿銀和Cody嘅一日
番外篇：阿銀和Cody嘅一日
8/5/20
今日係5月8號，星期五，我約咗我個老死Cody出嚟食個飯周圍行吓Hea吓。我哋就約早啲諗住可以出嚟玩耐啲，咁我哋就約咗11:30喺油塘等，跟住就一齊搭去利東，諗住入鴨脷洲食下野，因為我哋兩個從來都未去過呢個地方。 咁我識咗條友咁多年都知佢一定會遲到啦，所以我都特登約早少少11:30啦，我呢就搭五就已經去到啦，我去到搵佢嗰陣時，佢夠膽死講我而家先出門口，好彩佢唔係住得遠。咁當佢嚟到嘅時候已經係12:00 好彩我特登預早啲啫，終於見到佢係對面月台施施然咁行過嚟⋯
「喂，而家幾點呀師兄，遲撚咗半粒鐘，頭先打比你夠膽死話啱啱出門口⋯」
「對唔住囉大佬，琴晚夜瞓呀嘛，以為較咗鬧鐘會知醒啊，點知個鬧鐘冇響喎，其實係你打過嚟我先醒啊。」
「仆你個街，晏晝嗰餐走唔甩啦。」
「唉，我哋識咗咁多年，唔係講錢吖嘛⋯⋯唔好咁啦放過我啦大佬。」
「你就想啦，你知唔知我喺度等左半個鐘幾辛苦呀，老規矩啦。」
「唉好啦好啦，今次係我唔着，對唔閪大佬。」
「同我講有閪屎用，同大監製講」
「哈哈哈，冇見咁耐阿銀你都冇唔記得，嗰陣時我地幾鐘意睇暴龍哥。」
「梗係啦，佢係我個偶像嚟㗎。」
「係喎話說我哋陣間食咩？」
「上網睇話鴨脷洲香港仔出名食艇仔粉，講開又講打電話去問吓佢有冇開先。」
咁如是我就打電話過去問啦，點知佢話今日星期五休息，唔開喎真係好鬼黑仔，因為艇仔粉唔係周圍都有得食，咁唯有下次去睇吓佢有冇開。
「點啊你打電話去問，有冇開啊？」
「冇喎咁啱佢今日唔開，冇計啦唯有下次先食，不過我上網睇都仲有好多其他好食，咩陳新記魚皮啊，豬潤腸粉啦，仲有一間買傳統糕點嘅小食舖頭。」
「咁就得啦仲有其他嘢食。」
「啱呀，咪入去食過嘢行吓囉，不過而家都幾早，有冇諗過我哋未必行到咁耐，有冇諗過入完去之後出返嚟去邊？」
「其實都過咗港島，不如上山頂啦，我都有起碼五年以上冇去過，同埋而家疫情關係，仲有係平日應該好少人。」
「就咁話啦，我都好耐冇去過山頂。」
沿路途中我哋傾左唔少以前中學發生過嘅嘢，諗返起嗰陣時仲喺香港讀書，真係好開心冇乜嘢需要顧忌，可能嗰陣時我哋仲係初中生，仲未感受到DSE嘅壓力，嗰陣時真係發生咗好多嘢，我哋兩個都叫做係班上邊搞事嗰啲人，發生咗好多嘢有機會再講下⋯咁話咁快我哋就去到利東站，首先我哋就去咗個熟食市場，去陳新記試吓佢嘅魚皮同埋牛腩粉麵，我就叫咗個牛坑腩麵，而Cody 就叫咗牛坑腩飯。 我自己覺得呢就佢啲牛腩麵就正常水準啦，不過呢佢嘅炸魚皮又真係幾好食，好可惜冇機會試到佢哋招牌嘅九棍魚皮。
食完粉麵之後，我哋就行咗去嗰間買傳統小食舖頭，買咗一個大菜糕同埋西米糕做飯後甜品，跟住我哋就行咗去嗰個海濱公園就望住香港仔避風塘。今日天氣幾好有啲雲，咁就唔會曬住太熱，沿路我都影咗唔少相，又同佢吹左一陣水，我哋喺個海旁hea 到兩點半左右，就諗住去食呢個豬膶布拉腸，點知間餐廳成四點先開，可能係因為平日嘅關係少啲顧客。咁我諗我哋就應該冇乜可能喺度hea 到四點呀，所以我哋決定走，去返中環上山頂。 咁係去中環嘅途中，我哋就喺度諗搭山頂纜車定係巴士上去好⋯
「喂陣間上山頂搭䌫車定巴士上去好？」
「啦我就覺得搭巴士好似好啲，好似平啲喎。」
「Cody，你唔係驚呀嗎，懶得畫上山頂梗係搭纜車啦，我諗你下次上去無個七八年，你都唔會再上去㗎啦」
「痴線梗係唔係驚啦，危險呀個山頂纜車開咗咁多年。」
「你搭巴士咪仲危險，上山頂果條路唔方安全得去邊。」
「唉，算啦懶得上去就搭纜車啦。」
「咁咪好囉」
你估我唔知Cody佢真係驚咩，以前試過同成班frd連埋佢一齊去主題樂園玩，一直都唔敢玩機動遊戲，咁有一次我哋夾硬夾佢上去玩過山車，點知條友話肚痛，唔掂跟住就一枝箭跑左去廁所，不過我諗山頂纜車應該都唔係好危險嘅啫，又唔會開得快嘅應該唔會好刺激嘅。
咁如是者我哋就去咗個山頂纜車總站，然後就搭一班纜車上去啦，一開始呢㗎纜車上車嘅時候呢都唔係話好斜，但係點知呢行唔夠3分鐘呢，個斜度好似玩緊過山車上斜咁斜，我完全冇諗過原來係咁，跟住我望一望坐係我隔離嘅Cody，全程卟低完全唔敢望下周圍，直至到個纜車到站。 之後我哋去到山頂望住個景，買咗杯咖啡坐喺度嘆吓，呢個景色就係香港被稱為「東方明珠」嘅其中一個原因，日頭嚟睇已經覺得好靚，其實咁樣得閒出嚟行吓Hea吓，都真係幾舒服。 可能我哋真係好耐冇見，好似係英國讀書嗰陣時又冇乜聯絡，可以約出嚟嘅時候特別多嘢講，特別多水吹，我每一次都好珍惜呢啲機會，可以同一個老朋友冇任何顧忌講乜都得，其實真係好開心。
跟住我哋又周圍行吓，本身我都有諗過喺度食埋晚餐先走，不過呢以兩個學生嘅零用錢呢，應該係唔足夠支付係山頂食晚餐，所以我哋最後都係落返去，去咗觀塘食呢個任食打邊爐。 可能因為我哋今日全日行咗好多路，大家都有啲攰同埋好肚餓，一坐低就係咁叫肉係咁食，我哋食咗個半鐘頭差唔多冇停過，不過話時話依家啲任食火鍋時限得咁短，好似逼你一定要食得好快，趕你走咁。我哋食完差唔多九點半，我哋見時間都仲早，就行咗去觀塘海濱，當食飽飯散吓步，跟住佢就問我交友app啲野啦：
「係喎上次你唔係話你上交友app識咗個女仔嘅咩，叫咩Hebe呀嘛。」
「哦佢呀唔係啦，冇料到啦，講咗嗰一次電話之後，跟住佢就人間蒸發咁，無再搵過我，我都唔知自己做錯啲咩」
「你哋係咪交換左ig 可能佢係外協呢，你都唔係唔知你個樣唔係好掂㗎啦。」
「屌你咩，使唔使咁樣踩我呀，可能真係關個樣事其實。」
「咁你之後冇識到其他女仔咩？」
「有就有嘅，不過同我啱傾嗰啲都係三十幾歲，廿幾歲。」
「竟然係咁估唔到喎，鍾意識姐姐」
「屌唔係你咁諗呀，純粹傾吓計做吓樹窿姐。」
「咁你聽到啲咩返嚟啊講嚟聽吓」
如是者我就將我喺交友app嘅所見所聞同佢講晒，咁佢聽完之後呢，就完全唔知講咩好，其實都正常嘅我哋兩個18歲嘅學生，根本就冇乜人生經歷，跟住佢就話：
「其實你講嗰啲全部都好慘，我哋都真係幾幸福，除咗嗰啲姐姐之外仲有冇識其他女仔呀？」
「都有嘅啱啱同緊呢個細我哋一年嘅女仔傾吓，都傾左一兩日啦其實呢個都算啱傾，咩都可以講吓笑下。」
「咦，呢個有冇機會先，嗱如果你識到阿嫂一定要帶佢出嚟見我呀，一定講晒你啲衰嘢俾佢聽。」
「屌你啦，算啦我都唔敢擺唔擺希望落去，咁容易在沉咩，得啦有機會先算啦一定會帶佢出嚟見你嘅。」
「哇屌行吓行吓等左一陣計都成十二點呀，喂走啦。」
「咁好啦下次再約啦，得閒就吹吓水啦。」
「得啦，不過你而家玩交友app嘅咁忙，點會得閒理我呀」
「你都傻嘅再忙都會搵你啦，係咁啦，得閒飲茶啦。」
之後就散水各自返屋企，今日差唔多可以話我返嚟香港之後，最充實嘅一日，差唔多全日都冇玩過手機，全程吹吓水望吓周圍，其實過下呢啲生活都唔錯啊，成日都屈係屋企玩手機，玩電腦都真係唔係好掂。
下一篇文將會回歸返正篇，而今次嘅女主角將會係喺上面提及過嘅女仔，但係點解佢會令阿銀崩潰，逼佢面對現實呢，敬請期待！
記得記得，作者為咗提升文章嘅質素，同埋有多啲時間，而家嘅更新次數會改為一至兩日一篇，敬請原諒。