交友app嘅萬事屋: 不平凡的一天
不平凡的一日
11/5/20
今日係5月11號，星期一，係阿銀第一次同網友出街，究竟阿銀同Miki出街會發生啲咩事，同埋究竟阿銀同佢傾咗啲咩？ 下邊嘅內容將會為大家揭曉⋯⋯
做乜鬼咁鬼熱，我係半夢半醒隱約感覺到，好鬼熱啊！我瞓唔番呀，因為琴晚有啲緊張，始終都係第一次同網友出街，又要諗吓着咩好，又驚自己講錯嘢，仲有唔少大小事，我都係諗諗吓先訓着，琴晚又唔記得開冷氣，瞓得唔係咁好。不過橫掂都起咗身啦，起身擦過牙沖個涼先，唔知點解我真係好鍾意朝頭早沖涼，朝頭早沖完之後個人即刻醒晒，煥然一新咁，不過我夜晚瞓覺之前都會沖一次嘅。
我約咗佢1:00喺中環等，講好咗話大家各自食咗晏先過去。出門口之前，我就喺度諗，究竟我應該着長褲定系短褲，着長褲就好似大方得體啲，但係今日又好熱喎，諗咗一輪之後都係決定着長褲，話晒點都係第一次見人，着返視正啲好啲。
話咁快就到到約定嘅時間啦，我12:45已經去到，咁我見早左就企左喺度玩吓手機，過咗冇5分鐘，突然間有人細細力拍我膊頭，一開始我冇為意以為有人撞到我啦，我帶着耳機嘅，但係嗰條友再大力左啲拍我膊頭，咁我就諗住除低耳機擰轉頭問佢做咩㗎啦，擰轉頭一體先知原來係Miki，佢就話啦：
「點解我拍你第一下嗰陣時唔應我？」
「我點知係你姐，你又幾勁喎第一眼就望得出係我嘅。」
「一睇就知係你啦，快啲讚我叻啦！」
「係啦最叻係你啦，不如我哋一路行一路講，唔知嗰間咖啡舖洗唔洗排隊。」
「好啊就咁話啦。」
乜原來佢真係咁勁嘅，第一眼就認得出係我，佢咁講搞到我有少少開心添，唔知佢覺得我點呢，應該冇事嘅都交換左相啦，冷靜啲，唔好咁緊張，都係飲杯咖啡影吓相姐，冇咩特別嘅，總之整間唔好做啲on9野就得啦。
咁我哋喺沿路行緊過去嗰陣時，都係咁以吹吓水呀問吓佢呢幾日做咗啲咩，其實咁樣傾吓計都幾輕鬆幾舒服，最緊要嘅係佢都會開話題，都唔會怕話會deadair ，其實同Miki 相處落都覺得唔錯。咁話咁快我哋就去到Blue bottle，一去到嘅時候我哋都見到有啲人喺度排緊隊，其實都預咗㗎啦，咁我哋就行去龍尾嗰度排，好彩又唔係話好多人，我諗排三四個字左右應該可以買到，因為疫情期間佢而家唔開樓上，所以就冇得堂食，一定要外賣。
「係呢Miki啊，你咪話你都有飲開咖啡嘅，你平時鍾意飲咩㗎？」
「我鍾意飲Latte 呀，我鍾意咖啡味但係唔鍾意太濃，咁你呢？」
「我就喺你嘅相反，我真係好鍾意好濃烈嘅咖啡味，所以我係飲開齋啡。」
「竟然係咁，18歲就飲齋啡勁嘢喎！」
「小事啦，如果你鍾意淡啲咖啡味，我建議你陣間叫latte轉single origin expresso 呢一隻咖啡豆，應該會啱你口味多啲。」
「咦睇嚟有人有做功課喎，我都有上網睇呢間野，我諗你應該會係叫Cold brew ，既然你鍾意飲齋啡嘅話。」
「大家咁話啦，係呀我就係諗住嗌呢一杯。」
原來佢唔係為咗迎合我先去呢間咖啡舖，佢有上網睇過，睇嚟佢真係鍾意飲咖啡，好彩啫，咁就可以肯定佢唔係特登陪我嚟呢間咖啡舖。
我哋總共大約等左四個字左右就入到去，落埋order，等左冇耐就有我哋啲咖啡，果然係精品咖啡啊，個味道係非常好，個價錢亦都比其他咖啡店高。不過都係一分錢一分貨啦，我就覺得還可以，間唔中去飲下都唔錯。
「咖啡就買咗啦，咁而家去邊啊 阿銀？」
「一係行去附近嘅大館睇吓囉，你想影吓相呀嘛，我今日有帶相機出嚟啊」
「好啊就咁話啦，我知啦我仲見到你仲咩埋支腳架岀嚟添。」
大館就係附近，唔使5分鐘就行到過去，不過我哋行入去先知道，現在因為疫情關係好多展覽都關閉咗，直頭冇開咁滯，去到都冇乜景好影，又熱喎。之後我哋就決定行返落去石板街，咁我就幫佢影咗一啲相啦，之後我哋都去咗嘉咸街，係果幅比較出名嘅塗鴉牆幫佢影咗一啲相，咁沿路我哋都講咗唔少野嘅，又有講話佢之前啲男朋友嘅野，又講吓佢第時讀書想讀咩。咁之後我哋行行吓就發現好似唔係好對路，始終中環都冇乜嘢特別地方好影，所以我哋就決定上去嘉頓山，hea 吓，順便睇埋個日落。
其實上去嘉頓山就我提議嘅，唔知佢鍾唔鍾意，都要行幾十級樓梯上去㗎，我諗佢應該唔會覺得攰掛，同埋喺上邊睇日落都幾靚，如果今日冇咁多雲應該可以睇到個鹹蛋黃。
話咁快去我哋就行到上去，行樓梯上去嗰陣時，其實都好攰出左唔少汗，不過都唔係話好焗好熱嘅，起碼都有啲風吹埋嚟幾舒服，不過我見到佢行上嚟又唔係好辛苦，我諗應該冇揀錯地方。之後我哋就搵咗個位坐低，我就擺咗部相機係後邊影呢個縮時影片，之後我哋都傾左唔少野，都唔知點解可以有咁多嘢講，又可以唔重複個喎，當我地講到出軌呢個話題嘅時候，佢就話啦：
「係呢阿銀，其實你點睇啲人出軌？」
「我好唔鍾意人出軌，就算係搵SP都好，出軌就係出軌，明明你都已經有另一半啦，點解你仲要搵其他人，唔通就係因為嗰個新鮮感？乜個新鮮感嘅誘惑真係咁大咩？ 如果你唔鍾意另一半就唔好拖住佢啦，咁樣對大家都無謂。」
「我都係咁諗，我由細到大都好唔鍾意人哋出軌，好慶幸地我之前嗰幾個男朋友都冇出過軌，我之所以咁討厭人哋出軌，係因為我老竇試過，不過佢都過咗身⋯」
Miki 佢係屋企係排中間，有一個大過去差唔多10年嘅家姐，同埋有一個細佢七年嘅細佬，咁佢家姐一直都同屋企人關係唔好，咁Miki佢都好少同佢家姐溝通，咁之後呢有一日，佢阿媽就發現佢老竇出軌，個出軌對象仲要係一個靚妹，咁一開始都算佢老竇都肯認低威，都認錯，但係點知有一次佢老竇話加班，但係就咁啱喺條街度撞到正一正，見到佢自己老竇拖住另一個女人⋯⋯
「嘩唔係啩，幾十歲人先嚟出軌，仲要係已經有屋企人，有仔女，真係痴線」
「算啦呢度都唔係最慘你聽埋落去先」
「唔係哇咁樣嘅經歷都唔夠慘，如果你唔想講唔使勉強喎。」
「唔緊要啦都講開咗啦」
但係天意弄人，竟然突然間佢老竇出車禍，其中一隻腳廢左，咁佢阿媽都打消左離婚呢一個念頭，都唔知係責任定係愛，不過好景不長，佢老竇就突然間走咗，佢哋成家都變得好消沉，不過反而係呢個時候Miki 就同佢家姐又多咗溝通，因為有一次Miki 半夜扎醒左，喺度喊，佢又驚嘈醒同房嘅細佬，就唯有自己出廳喺度喊，咁啱佢家姐就起身去廁所，就見到佢喺度喊，佢家姐就粒聲唔出走咗去攬住佢，之後佢哋嘅關係就慢慢變好，多番好多唔同話題講下。
「呢一個就係我嘅故事，亦都係我好討厭人哋出軌嘅原因，雖然我知道唔係樣樣野都咁巧合，不過一直認為就係因為我老竇出軌，所以先會搞成咁。」
「你冇嘢吖嘛，其實本身出軌就係唔啱，不過係因為呢個社會扭曲，好似就將出軌 揾sp 呢一樣嘢合理化左⋯」
「我冇嘢，始終諗返起以前啲嘢有少少感觸啫，你講得啱呢個社會變咗。」
之後我哋再傾多一陣，大概6:30左右我哋就落返去，因為都影唔到啲咩，今日又多雲，之後我哋就各自返屋企。係返去嘅期間，我仲喺度不停咁回味緊今日發生嘅事，我諗我呢個第一印象應該都唔係好差姐，究竟係咪真係有機會發展落去，其實都係未知之數，算啦都係唔好諗咁多啦，快啲返屋企沖個涼先，今日咁鬼熱都出左唔少汗。返到去之後我哋都有喺軟件度傾多左一陣，跟住今日影過嘅相，亦都幫佢執埋，Send番俾佢，我諗佢應該都幾滿意嘅，因為佢IG即刻轉左其中一幅我幫佢影嘅相。咁之後傾多一陣就去咗瞓覺，尋日今日都行咗好多路好攰。
咁我一教訓天光啦，今日係12/5/20 ，當我開一開手機諗住喺交友app 同Miki講句早晨嘅時候，我竟然發現佢delete咗我，其他所有WhatsApp ig 佢都全部封鎖左我，一開始我以為我手機壞咗啊，明明琴日都好地地，點解突然間會揾唔到嘅，我試過重開我嘅手機，都係搵唔到，一直都冇辦法相信呢一個係事實。究竟我做咗啲咩，係咪我影啲相其實唔啱佢心水？定係我一直都同佢講嘢覺得好煩？定係佢根本就唔想講佢屋企人嘅嘢？究竟我做錯啲咩啊，我唔明白啊，點解佢突然間delete晒我同佢嘅contact，我完全無法理解，我都好震驚，並琴晚返到嚟都好地地，點解會咁，我都問咗佢介唔介意講佢屋企啲嘢啦，佢都話唔介意㗎，點解呀，點解呀，點解呀，點解又係咁呀，點解同樣嘅事要發生係我身上三次⋯⋯
究竟係咩原因會令到阿銀咁崩潰，係真係因為一個識咗唔夠兩個星期嘅女仔，搞到佢心態崩潰？點解今晚會無端端玩交友app？真係因為佢太得閒？定係究竟有啲咩原因啊，而點解30路姐姐會返嚟呢，喺嚟緊嘅文章裏邊就會知道一切嘅開端⋯⋯
記得記得，作者為咗提升文章嘅質素，同埋有多啲時間，而家嘅更新次數會改為一至兩日一篇，敬請原諒。