交友app嘅萬事屋: 付出
付出
6/5/20
「說了再見，才發現再也見不到，能不能就這樣忍著痛淚不掉⋯⋯」搞乜鬼呀，邊鬼個晨早流流喺度播歌，當我繼續嘗試去瞓返嘅時候，「 說好陪我到老，永恆往哪裡找，再次擁抱一分一秒都好⋯⋯」點解會仲係要繼續播嘅，跟住我先醒起原來琴晚我瞓覺之前一直喺度聽緊歌，咁啱就聽到周杰倫嘅「說了再見」，係呀我唔淨止會聽啲經典金曲，周杰倫嗰啲我都會聽吓㗎。
今日係星期三，都係咁啦起身沖杯齋啡飲吓，打陣機玩吓手機咁樣晏晝，食個飯買埋餸，跟住晏少少再煮埋飯，等佢哋返嚟食完飯，沖埋個涼咁又一日。唔知點解，我個人鍾意夜晚先上去交友app度睇吓，當我喺公海度浮緊嘅時候，見到阿兔姐搵我：
「喂～ 今日搞咩嚟呀？」
「冇啊咪又係嗰啲，食飯，煮飯，打下機囉，你呢又扮咗一日公啊？」
「一半一半啦，今日公司都有啲嘢做，唔可以全日扮工。」
「好忙啊，係呢咁你食咗飯未呀？」
「啱啱食完啦，沖咗個涼，依家灘左係度」
「食完飯沖完涼，就即刻攤係張床到唔得個喎，對個消化系統唔好。」
「唔理得咁多啦，我同你講啦到我沉船啦喂～」
（係之前已經同咗兔姐講過Hebe嘅野）
「做乜鬼啊，又係呢個app識？」
「不過我諗我同你又有啲唔同，我哋係互相都OK，係呀又係喺個app識。」
「咁都唔叫沉船嘅，如果大家都OK嘅話，我又覺得冇乜嘢。」
「個問題係後邊，跟住我哋傾左幾日都幾好，又講電話，FaceTime 。」
「咁咪幾好，又講吓電話，又FaceTime，咁其實個問題係咩啫？」
「咁我唔想呃佢啦，我就同咗佢講其實我食煙⋯」
「係，咁佢好大反應咩？」
「咁又唔係，可能咁啱瞓覺時間定係唔知我諗多咗啊，我覺得佢好介意，佢好似唔多想理我咁。」
「其實呢啲嘢好難講嘅，如果佢真係鍾意你，佢又點會介意你食煙呢。」
「因為我呢就唔係食得好勁，唔係冇咗in就死嗰啲人，只不過係同朋友出去飲吓嘢食一兩支，因為我唔想呃佢所以同佢講左。」
「其實你唔講都講咗啦，同埋佢知道都係遲早嘅事，咁不如你早啲同佢講。」
「跟住佢就話呢一開始都有啲介意嘅，跟住我就話我唔食都得，然後應承佢，佢話好」
「咁總共傾咗幾多日呀？」
「一個禮拜多少少啦，仲有呀佢同你一樣都話自己delete咗個app。」
「咁我覺得呢，一開始咗玩呢個app呢，就冇咁容易抽身㗎啦。」
「我份人好容易就信人，同埋我都唔鍾意呃人，所以寧願講咗先，唔想自己後悔。」
「咁咪得囉，頭先我都話啦如果佢真係鍾意你嘅話，佢唔會介意你食少少煙而去討厭你囉。」
「希望係咁樣啦，搞到今日冇心機做嘢⋯」
「咁其實你覺得佢點啊，你驚唔驚佢會好似你之前嗰個咁⋯」
「驚㗎點會唔驚啊，但係佢成日都會同我報到，佢又話會過嚟接我收工，同我一齊搭車返屋企⋯而且冇試過有人好似佢對我咁好，覺得有少少感動，同埋我份人冇乜安全感，聽到佢咁講真係唔多唔少都會心動。」
「咁咪幾好囉，聽佢咁講應該都唔錯嘅我諗，佢應該唔會介意你食煙嘅。」
「我而家同佢講咗，都係唔想第時俾佢發現，覺得我呃佢咁，所以我寧願先小人後君子⋯」
突然之間佢就落咗線，本身我諗住不如瞓覺啦，點知上次早差唔多半個鐘頭都未瞓着，最後都係坐返喺度睇吓YouTube。 大約一個鐘頭之後兔姐又再搵我：
「阿銀，你講得啱我太易信人，我對呢個世界好失望，我好攰啊，我真心以為會有人對我好，原來唔係⋯⋯」
「吓佢搞咩啊，頭先唔係仲好地地嘅咩，不過你講得啱，呢個世界唔值得你有期望，因為呢個世界充滿着太多歪理。」
「我真係太容易信人，點解做咗咁多年人都係咁蠢⋯」
「唔好咁啦，你都係想搵另一半姐，你唔係蠢只不過係人哋問題。」
「佢呃我delete 左 app 但又唔覆我，然後我喺app見到佢仲同佢傾緊⋯」
「我都話㗎啦，但係點解佢會唔轉標題咁蠢 」
「我以為當你真心，人地就會真心，我終於開始明白，當我付出緊真心嘅時候人哋未必係，次次都係咁，好攰」
「其實我自己都係咁諗，你睇到我咁易沉船就知啦，但係呢個世界話俾我地聽，唔係咁㗎，呢啲只不過係我哋一廂情願。」
「我前世做錯左乜，我都係想拍過拖啫，點解我成日都要俾人玩⋯」
「算啦呢啲人唔值得你留戀，走啦，最好唔好係個app度再識人啦，咁樣你只會傷得更深。」
「我知啦，我想一個人靜下飲罐啤酒，攰你就瞓先喇。」
「咁好啦你唔好食咁多支，你都唔好咁夜，早唞啦。」
究竟係一段感情裏邊你付出左真心就一定會有回報？ 事實話俾我哋聽唔係，就係呢一個情況先會引發到上一篇章最尾段嘅問題，當一個人經歷左咁多嘅嘢之後，佢以後係咪淨係會揀愛佢嘅人？ 喺下一篇阿銀遇到嘅人會同阿銀有前所未有嘅互動，但係點解會令到阿銀崩潰，逼佢面對現實。請各位拭目以待！
記得記得，作者為咗提升文章嘅質素，同埋有多啲時間，而家嘅更新次數會改為一至兩日一篇，敬請原諒。