交友app嘅萬事屋: 喂，聽唔聽到啊？
喂，聽唔聽到呀？
5/5/20
究竟當兩個人喺埋一齊一段好長嘅時間，個感情係咪一定會變淡，係咪冇可能一世兩個人都係相處係熱戀期？ 結婚係唔係只係比自己一個藉口，去繼續陪另一半？ 究竟私人空間呢樣嘢，需要幾多先至叫做夠？阿銀佢今日聽到嘅故事，係佢從來都唔會想像到⋯
今日又係平平無奇嘅一日，因為已經過咗強制舉家隔離嘅兩個星期，起身嘅時候阿爸阿媽已經出咗門口。早午餐都係自己搞掂，晏晝又係咁打下機睇吓片，瞓咗一陣覺咁又夜晚啦，完全真係好悶，不過我啲friend全部都考緊DSE，佢哋都唔得閒出街，唔係喎可以問吓Cody條死仔，得唔得閒出街，就咁話而家message佢先：
「喂，死仔，你都應該隔離完㗎啦，幾時得閒出下街食個飯，好鬼悶困喺屋企」
「今個星期五嗎你得唔得，我正想問你出唔出嚟食個飯？」
「就咁話啦今個禮拜五，8/5 」
「可以啊就咁話啦。」
「同埋呢不如出嚟食個飯之餘周圍行吓，我想入去鴨脷洲行吓，好似有啲特色嘅嘢食。」
「好喎就咁話啦，我從來都未去過鴨脷洲。」
「咁好啦星期五見」
（呢個生活小插曲將會係番外篇推出敬請留意）
約實咗Cody之後，我就走左去煮飯，阿爸阿媽放工返嚟就開飯食，之後沖過涼就入返房。玩手機玩到悶，又開過開個app出嚟睇吓。 喺公海搵緊人嘅時候，見到一個寫住「認真長傾 喂～ ？」咁我見佢寫住認真長傾，就撳入去睇吓有咩好傾呀：
「喂，聽唔聽到啊？」
「喂喂」
「有冇啲咩心事想擺低呀？」
「你成日聽人地啲心事㗎？」
「係呀得閑咪上嚟做吓樹窿，聽吓故事，聽吓人呻囉。」
「其實你成日聽人哋啲心事會唔會好大負荷，聽到個人都負晒。」
「都唔會嘅因為聽聽下之後，叫做解決咗，就會吹吓水。」
「都係嘅不過呢度啲人都好少認真，都係搵水吹多。」
「其實係個人以前負面啲，咁俾人開解過之後，而家咪嘗試吓幫下人囉。」
「其實我好少同人講心事，鍾意吹水多」
「話時話，你都算係第一個關心唔會太多負」
「我成日覺得做社工同樹窿都好勁，因為聽得多人訴苦，有時連自己嘅情緒都會影響埋。」
「你咁講都啱嘅，尤其是係如果自己都試過嘅話，更加身同感受。」
「所以都好關心下你地。」
「多謝你呀，你嘅心意收到啦，咁話時話，究竟有冇啲咩野煩住你？定係有冇啲咩心事呀？」
跟住之後就吹左一陣水啊，同佢講18歲嘅時候，冇錯同我諗嘅反應一模一樣，就係話係咩完全唔覺你係18歲喎，你講嘢完全唔似18歲囉，我都知嫁啦因為好多人都係咁講，佢叫兔姐，佢就聲稱自己32歲。講到呢個拍拖嘅話題呢，我就同佢講左話都有成三年冇拍拖，佢就係大約年半前甩拖，不過佢都睇得開嘅，都過咗去放低左，係冇下一段果下先慘，跟住佢就話好似隔得太耐，好似已經唔識拍拖：
「 我上一個男朋友呢，係因為佢覺得淡左同我分手，分手前個兩年，我地由一星期見一兩日，變成一星期食一餐飯，然後我習慣左拍拖都係一個人，同佢一齊個6年 我學識左唔痴身，唔check佢，唔煩佢」
「咁樣係唔得個喎 你冇發現呢個問題，或者你身邊嘅朋友冇發現呢個問題 ？因為六年真係一段好長嘅時間。」
「你問我如果再拍拖嘅話，我諗我唔識點樣去痴身去畀安全感佢⋯」
「嘩睇到你咁寫有啲心痛⋯」
「答返你上面嘅問題先，有啊，個時我d朋友成日笑我偽單身。」
「日日見一開始來講係好事嘅，不過我覺得都要比番啲私人空間大家嘅，但係一個禮拜唔可以見小過兩三次囉。」
「係丫，所以過左熱戀期我地都有大家嘅私人空間，跟住佢嘅私人空間就越黎越多 ，多到分埋手咁囉。」
「唔好咁啦講到好心up⋯」
「冇事啦，都過咗去咯，只不過係調整唔番點樣去拍拖先叫合理，難聽啲講，已經唔識拍拖⋯」
「好簡單咁問你，宜家有冇心上人啊？」
「之前有過，但真係完全唔敢煩住佢。」
「咁你會唔會有見到佢就心跳加速個感覺啊？」
「都有嘅，但係知道佢對我有野，我都唔敢煩佢，唔敢主動搵佢，佢就無左下文。」
「你咁樣唔得個喎 你真係想呢一世都自己一個人咩 ⋯」
「我習慣左ex做自己野，會等佢得閒話得知我先搵佢，耐左就好怕搵人，然後知道對方唔得閒。」
「我真係冇乜戀愛經驗，唔知講咩好，不過聽你咁講，係埋咗一齊六年，一定有好多感情同回憶，雖然話就話淡咗，最後散咗姐，不過我諗你都應該唔開心左好耐，唔緊要啦你一定會搵到下一個，下一個一定會更好。」
「咁就一定啦，係唔開心左好耐㗎啦，不過而家咪又係企左係度，話耐又好似唔耐，但係都係埋咗一齊六年啦，一定有唔少嘅感情，而家咪當係一份回憶咁收埋係心入邊囉。」
「Sorry 呀，勾起你啲傷心事，早知我一早就唔問啦，搞到你諗翻起以前啲嘢，不過你講開又講我諗返我對上一個，三年之前係我去英國讀書之前，我哋喺呢個遊學團識，去完之後大家一直有聯絡，又約咗出嚟玩，咁好順理言章就係埋咗一齊啦，嗰陣時真係好開心，不過好景不長，拍咗一年多啲，我就同佢講我會去外國讀書，跟住就開始鬧大交，最後就散咗。」
「無所謂啦，我都好少同朋友講自己野講到好deep，反而同一個唔識嘅人吹吓水，好似仲更加容易講出黎，聽你咁講你都好重視你之前個女朋友，不過都好嘅都叫做有一份好嘅回憶，雖然最後鬧交收場，不過我諗你地都經歷左唔少。」
「都係嘅，不過我去外國嘅第一年成日強迫自己忘記佢，不過最後發現我自己係做唔到，之後我就覺得冇需要去特登忘記，都係一份回憶擺喺心裏面，不過我諗，唔係每個人都係咁，唔係個個都咁容易走出嚟，所以我先會做吓樹窿，聽吓人講，希望佢哋講出黎舒服啲。」
「多謝你呀樹窿，不過做得多都記住要休息呀，同埋希望我哋都快啲搵到真心相愛嘅另一半。」
「當然啦承你貴言，其實我成日都喺度諗，我係交友app見到嘅人呢幾日咋，已經好特別，個個都好有故事，我就嚟可以出書㗎啦。」
「你識寫故㗎？咁叻，快啲寫啦我第一個支持你。」
「 書名我都諗好，叫做「交友app嘅萬事屋」」
「咁得意嘅個名，你出書到時出咗名，係簽書會嘅時候，我會大叫係故事入面嗰個係我嚟㗎。」
「有機會先算啦，可能都係上網寫下小說算啦，同埋我過咗去外國讀書咁耐，好耐冇作過文，都唔知仲記唔記得點寫文。」
「實有機會嘅，你而家返咗嚟咁得閒，咪上網寫下故仔，練下文筆先囉，到時上網本野紅咗啦，咁咪有機會出真書囉。」
「啱呀，不過我諗都冇乜機會紅得起。」
「你未試過又點知呢，同埋你上網寫故嘅期間，咪可以儲多啲故仔囉，咁到時就可以一次過出真書。」
「都係嘅咁好啦我得閒就試吓寫吓啦，傾吓傾吓都成兩點啦，有啲攰瞓先」
「都係我都差唔多啦，聽日仲要返工好啦早唞啦。」
「早唞啦」
今次阿銀又聽咗個幾悲傷既故事，不過兔姐我諗佢份人都算係幾樂觀比較正面，佢都叫做走到出嚟，其實有時啲嘢都好難講，可能佢都對下一段感情感覺陌生。曾經有一個問題，究竟你會揀一個你愛嘅人，定係愛你嘅人？究竟個標準答案係咩啊冇人知道，因為每個人都唔同，阿銀好難想像同一個人喺埋一齊咁耐然之後分手，一定好痛，係下一篇阿銀將會繼續同兔姐傾吓計，不知不覺地阿銀已經成長左唔少，究竟遲啲佢將會經歷到啲乜嘢，令到佢崩潰，要去面對現實呢？ 請各位敬請期待！
記得記得，作者為咗提升文章嘅質素，同埋有多啲時間，而家嘅更新次數會改為一至兩日一篇，敬請原諒。