交友app嘅萬事屋: 想訴苦
想訴苦
4/5/20
究竟係呢個世界上可以用啲咩嚟衡量或者痛苦，係呢一分呢一秒，呢個世界上面有好多人都經歷緊痛苦嘅事情，又或者係咁樣所以先會有樹窿呢樣野嘅存在，樹窿只不過係得閒聽下你呻，傾吓心事，佢唔係一種職業，唔係好似社工咁樣咁專業，或者樹窿們幫唔到啲乜，做唔到啲咩大件事，但係佢哋只不過係義務咁出嚟聽你放負，有時做得多樹窿真係要唞吓。
今日係4/5/20 終於完成維持兩個禮拜嘅強制家居隔離，今日係星期一，阿爸阿媽一早就返咗工，今朝比較早就起咗身，食咗麵包飲咗杯奶，跟住就喺度玩吓手機，喺度頹左半日之後，終於可以落街自己買外賣，順便買埋今晚要煮嘅餸，嘩真係好鬼熱，唔落街都唔知，五月就咁鬼熱，真係傻傻地，全球暖化真係好嚴重。食完飯之後打咗陣機，去到六點左右就開始洗菜煲飯，準備煮飯。洗緊米嘅途中，我上咗去交友app到睇吓佢哋有冇搵我，不過可能30路姐姐，C，啱啱放完假，公司好多嘢做，佢哋兩個係唯一有繼續傾落去，咁既然冇人搵我，咁就繼續專心煮飯。 其實點解我會幫手煮飯，一嚟除咗幫輕下我父母嘅負擔之外，同埋我煮飯就可以唔使洗碗，我真係好討厭洗碗，冇咩特別原因純粹討厭。咁我沖完涼之後就返咗房打咗陣機，之後就上交友app公海，睇吓有冇人需要我嚟個樹窿。碌碌下見到個寫住「想訴苦」咁我就撳咗佢啦，佢即刻就進入左對話，平時都要等一陣。
「Hello」
「Hello」
「我呢度係樹窿，有咩心事即管擺低」
「係呢你幾多歲？」
「18」
「咁細個就上嚟玩交友app，做咩喺度做樹窿，唔去識下女仔？」
「無呀，我曾經有喺度識過女仔嘅，不過都叫做有一個唔好嘅經驗。」
「係咩，個女仔細過你㗎？」
跟住我就一五一十咁同佢講哂Hebe 嘅野，之後佢就話：
「小朋友，你真係好細個，傾一兩個鐘頭電話就沉船，記住呀上得嚟玩交友app嘅十個有八個都係玩玩下，用嚟攝時間嘅咋。」
「你呢一番說話我已經聽至少第二次，所以我依家咪上嚟做吓樹窿囉，講到底咁究竟你有啲咩想訴苦啊？」
「Er⋯⋯⋯」
「有咩就即管講啦，如果你唔介意嘅話」
「我準備做單親媽媽⋯⋯」
「嘩⋯⋯呢一個係我從來都未遇過嘅情況⋯⋯一時三刻我都唔知講咩好」
「都正常嘅，一個18歲嘅少年，應該好少機會會遇到呢啲情況。」
「係呢，我諗你應該有經濟能力負擔到㗎嘛，如果唔係你就可能要搵家教會。」
「多謝你關心先，經濟上我應該暫時冇乜問題⋯⋯
佢就開始同我講點解佢會做單親媽媽：咁話說呢當佢知道自己有咗嘅時候，佢就開始同佢另一半，傾將來嘅嘢，開始傾結婚嘅，因為佢哋都係埋一齊差唔多有五年，所以都係時候談婚論嫁，不過個男方就一直堅持唔想結婚，不過女方就好想嫁，佢所有朋友同埋姊妹都已經結咗婚，有啲仲有埋小朋友，所以女方都好想嫁男方，不過男方嘅睇法都係唔想結婚，佢覺得呢個想法好保守，而家好多人都係講緊呢個不婚主義，所以男方都覺得冇咩問題。佢就係因為咁鬧咗一場大交，女方亦都搬返去同佢屋企人住。之後唔夠一個星期佢就發現自己有咗，不過男方一直都冇搵過佢，一直都冇氹番佢。
差唔多有成個月，佢就覺得唔對路，所以約咗男方出嚟講吓，當男方知道佢有咗嘅時候，男方就應承佢一定會負責任，不過男方就話，其實男方已經對佢冇咗feel，佢亦都表示唔係一時三刻嘅事，冇feel就係冇feel，有啲嘢勉強無幸福。佢哋係呢五年嚟，一直都有唔少嘅爭執，女方成日都會嘈分手，不過幾乎每一次男方都會認錯，都會氹番佢，女方講得多分手，約出嚟見面，佢都有咁講，點知男方今次真係話分手，呢一個情況女方從來都冇聯想到，其實諗返轉頭，男方一直都遷就着佢，乜嘢都就晒佢，就嚟冇咗自己生活，每一次都選擇去體諒佢，主動去認錯，可能男方真係攰啦，當初拍拖乜嘢feel都冇晒，所以今次就選擇離開。
「件事就係咁⋯⋯事到如今，我終於知道自己一直都冇體諒過佢，從來都係佢遷就我，不過我到而家都仲想挽回男方⋯」
「聽你咁講之後，其實我真係唔知講咩好，可能我年紀仲細啊，從來都未經歷過呢啲嘢⋯⋯希望我喺度聽下，你即管呻啦」
「唉，真係好犯賤，我真係好掛住佢⋯⋯」
「加油啦，其實佢都話佢會負責任，希望你哋可以挽回到你哋嘅關係，建立返一個幸福家庭。」
「去到而家我終於明白，究竟佢呢五年嚟，為我付出左幾多，多謝你呀，講完出嚟係舒服啲嘅，承你貴言啦。」
「唔使多謝，我喺低迷嘅時候，都曾經有人伸出援手，咁我諗我做吓樹窿聽人講心事，都係想幫下人姐，我唔敢話可以幫佢分擔，但係有時啲嘢講完出嚟真係會舒服好多。」
「係咩，有機會嘅話你講吓你嘅故事啦不如，不過傾吓傾吓都成兩點啦，早唞啦樹窿小朋友。」
「有機會啦，幾個故事都關乎我上一個女朋友，同埋去英國留學嘅原因，早唞啦，你都要小心身體。」
今次唔可以話係一個咩長篇大論嘅故事，但係始終阿銀都係得18歲，可能睇電視睇電影就聽過單親媽媽，但係真實世界佢從來都冇接觸過，有時做樹窿嘅喺度聽吓人講就足夠，唔需要話下下都要俾意見，今次嘅事相信會令阿銀嘅心境有改變，係一段關係裏邊，最緊要係識得溝通，如果冇良好嘅溝通，呢一段關係係唔會長久，所以係你學識點樣一齊相處之前，你要學識點樣互相遷就同埋溝通先，唔係淨係單方面嘅遷就。 下一次阿銀將會遇到一個戀愛史比較悲傷嘅人，阿銀同佢有好多地方都有相似，而呢位姐姐會係打後嘅故事經常出現，同埋預告，30路姐姐將回歸來，佢將會幫阿銀渡過一個難關。請大家敬請期待！
記得記得，作者為咗提升文章嘅質素，同埋有更多嘅私人時間，所以而家嘅更新次數會改為一至兩日一篇，敬請原諒。