交友app嘅萬事屋: 番工麻醉自己
番工麻醉自己
3/5/20
暗戀，係一個人對另一個人心存愛意或好感，但係因為唔同原因，佢啲愛意無法宣之於口或表達出來，而被暗戀的一方可能冇意識到對方對自己的愛戀，又或者沒有明確表達自己的態度。暗戀可以係甜嘅，亦都可以係苦嘅，因為你總唔會知道你愛慕嘅人，佢會做到你做啲咩，佢嗰日對你嘅態度係點，變幻莫測⋯
係今朝嘅時候因為我早左起身所以上咗交友app碌咗一陣，咁又比我遇到一個女仔，C，估唔到佢都有同我同一樣嘅興趣，就係影相，咁順理成章就同佢吹左陣水，講吓啲日常野，影相野，咁之後佢就話佢唔得閒，夜啲先再傾。咁樣就冇乜點做過啲咩特別野，因為又冇得出街，係屋企都係對住部電腦或者手機，通常覺得太悶都會走去瞓個晏覺。當我在起身嘅時候已經係夜晚七點，阿爸阿媽已經為我準備咗晚餐。食完飯無耐我就去咗沖涼，之後玩緊手機嗰陣時就見到C搵我⋯
「Hello阿銀，你今日做過咩嚟？」
「冇呀而家淨係可以留係屋企，又冇得出街做得啲咩啊，咪又係玩吓電腦瞓咗個晏覺咁囉。」
「係咩，咁你都幾頹吓喎，唔使上堂定做功課咩？」
「唔使呀，今日星期日喎上乜鬼嘢堂，功課一早做完啦。」
「係喎今日星期日喎，唔記得咗添」
「是但啦就算唔係星期日，平時都係差唔多咁上下。」
之後我哋就繼續講咗一陣啲日常野啊，講吓時事啊，同埋佢都分享左佢啲攝影作品俾我睇，原來又係隱世高手嚟嘅，佢影菲林真係幾靚，佢又話自己係亂咁影，真係好鬼謙虛。之後我哋講到戀愛經驗呢個話題，佢就話啦⋯
「其實我戀愛經驗就唔多嘅，大概試過一兩次咁啦，不過呢排一起身就諗住佢，你覺得係咩意思？」
「但係呢一個男仔，之前有冇同你拍過，係咪散咗，定係暗戀？」
「未有緣喺埋一齊⋯」
「咁即係暗戀啦我諗，不過有時緣份就唔係一定嘅，有啲機會係自己製造出嚟」
「我有啊，唔知佢feel唔feel到⋯⋯」
「原來係咁，所以你個標題就咁寫啦，等我仲以為係啲咩其他唔好嘅事添⋯」
「傻啦，你唔知女仔係戀愛大過天㗎咩。」
「不過我覺得暗戀一個人無需要麻醉自己嘅，不過你都講得啱女仔係戀愛大過天。」
「但係佢好似對我冇feel，我哋冇再傾，我唔知啊我個心好似囉囉攣咁⋯」
「正常嘅暗戀一個人係咁㗎啦，不過你要明確啲表示你嘅愛意囉，如果唔係佢一直都唔明白你嘅態度，咁樣一直拖着落去都唔係辦法。」
「啱呀，講就咁講姐，但係有時啲嘢都唔話得埋嘅。」
「就係上個禮拜咋嘛，我喺呢度識到第一個女仔，跟住就講咗一兩個鐘頭電話，跟住我就feel到自己沉沉地。」
「咁快就沉，不過其實我都係，會好容易上咗心，但係可能人哋根本就唔當係一回事。」
「竟然係咁，搵到同類人有啲高興添，好sad 咯嗰下人哋完全唔應機。」
「係呀我依家就係，我同你講我真係好蠢，佢呢排覆得好Hea⋯」
「唔知啊可能我心智未夠成熟啦，或者嗰陣時係我第一次上嚟玩，有啲投入過度， 我份人比較認真唔鍾意玩玩吓。」
「不過你又係，齋傾都沉，又太容易了，不過其實呢啲唔關心智事嘅，好睇唔同人，我哋向正面啲嘅方向諗，係佢哋唔識得欣賞我哋姐。」
「啱啊，都唔知點解佢哋要玩玩下。」
「係喎話說呢，我同佢呢不嬲都有傾開計嘅，不過之前好似有啲誤會，我以為自己失戀，跟住我就忍唔住打咗俾佢⋯」
「跟住呢跟住呢？佢係咪鍾意第二個啊？」
「又唔係喎，本身我都以為佢對我冇興趣，因為佢勁Hea覆次次都係我搵話題」
「哦咁都好啲，起碼唔係佢鍾意第二個先啦，即係仲有機會啦」
「跟住我發現原來佢個人就係咁，覆機呢就好少嘢講嘅，但係真人就好好多。」
「咁咪好囉，不過有啲人係唔係好鍾意用手機黎傾偈，係鍾意面對面咁講。」
「冇錯佢就係咁囉，面對面可能一齊去食晏晝嘅時候，又好多嘢講個喎，不過返到去message佢嘅時候，又好似變左另一個人咁⋯」
「咁咪係囉即係冇事啦，咁你加油啦」
「呢一層就當然啦，其實你先得個18歲點解唔出去識下女仔呀？」
「大佬，呀而家呢個咁嘅情況點樣出去啊，就算我家居隔離完都未必成日出街啦。」
「不過你都啱嘅而家都係少出街好啲，為咗人哋又好為咗屋企人又好為咗自己都好，唔好成日出街啦，咁就少啲機會受感染呀嘛。」
「啱呀，所以你返工自己都小心啲，記得戴好口罩同埋用多啲酒精搓手液。」
「大家咁話啦。」
其實暗戀一個人，每一個人都應該試過，無論你最後成唔成功都好，都係一個經驗，呢件事會變成你嘅回憶，阿銀佢自己都唔例外，佢都有唔少次暗戀嘅經驗，無論佢最後有冇表達佢自己嘅心意，佢每一次都會當成一個回憶，無需要去刻意咁忘記佢，咁當然阿銀想成功啦，不過呢啲嘢都好難講嘅，今次阿銀遇到嘅人，同佢非常相似，又係非常容易墮入愛河嘅人，今次嘅故事比較輕鬆，比較貼近正常人會經歷到嘅嘢，而下一次阿銀遇到啲咩人呢，究竟佢又會喺當中學到啲乜嘢呢敬請期待！
作者的話：嚟緊嘅更新時間呢，有機會改成兩日一篇，因為想提升文章嘅質素之外，作者亦都要為其他故事去作準備，敬請原諒。 由呢一篇文章開始，請大家多多支持！