交友app嘅萬事屋: 輕輕鬆鬆

輕輕鬆鬆
3/5/20

究竟呢個世界上係咪充滿着歪理，點解偷食或者有咗伴侶之後出去搵SP大家都好似接受到？應該話點解我哋會去接受呢樣嘢，係咪因為大家都係咁做所以就要隨波逐流，本身有問題嘅嘢都變咗冇問題咁。

經過琴晚同30路姐姐傾完計之後，因為我自己從來都冇經歷過，所以我都唔知道另一半偷食係咩嘅感覺，不過琴晚同佢傾完之後，好似多多少少都叫做了解多咗，我淨係知道呢樣嘢係錯嘅，男人係咪真係咁貪新鮮感，不過我相信自己唔會做出呢啲咁嘅嘢，至少起碼而家喺。 今朝好早就自然醒咗，我已經好耐冇試過咁早醒，依家係朝頭早嘅九點，我出去梳洗嗰陣時可能今日係星期日所以阿爸阿媽都未起身。咁我就決定梳洗完之後灘返係張床度Hea下，不過我睇社交媒體都睇到悶嘅時候，決定上一上個交友app，唔知今早有冇人上線呢，當我喺公海搵緊一個適合嘅標題撳入去嘅時候，竟然有人搵我，佢個標題寫着「番工麻醉自己」 咁我就接受咗佢個邀請，然後同佢展開對話⋯⋯

「早晨」

「早晨」





「係呢點解你撳我嘅，係咪有啲咩心事想擺低？」

「有就有嘅不過，晨早流流都係唔講心事啦，費事影響咗我呢一日嘅心情⋯」

「都係嘅咁你想傾啲咩啊，吹吓水都無所謂。」

「你今年幾多歲呀？」

「我今年18，通常呢我一講自己係18歲呢，就有兩種情況嘅，一係呢就問係咪考緊DSE一係呢就即刻走，究竟你係邊一種呢？」





「你今年DSE？，真係開口中喎，呢度好多姐姐咩？」

「唔多唔少啦，當你做得樹窿多呢就會見到好多呢啲人，話說我已經冇喺香港讀書好耐。」

咁之後都係例牌講埋啲日常野啦，仲有同佢講下係英國生活嘅嘢啦，咁話說呢頭先咪交換年齡啊，咁我問佢幾多歲啦佢又唔肯講喎，佢又叫我估吓啦咁我就估佢大概24歲啦，點知呢佢就話咁啱調返轉其實係42歲呀，跟住我就話唔信啦佢又答我你歧視阿嬸啊，跟住我就話點敢呀，佢就答返我講吓笑啫呃下你呀其實我22歲呀，叫 C 就咁一個C。跟住講到興趣呢個話題嘅時候，竟然發現我哋有其中一個興趣係一樣，就係影相，咁佢就問我⋯

「你平時影咩相㗎？」

「都影下咁囉不過多數都係影建築物多，咁我自己又冇乜朋友，又冇人肯做我Model咁咪唯有影死物囉，咁你呢？」





「我有叫做玩吓菲林囉，不過都係唔係好勁，影得普通嘅咋。」

「菲林我嫌佢麻煩，影完又要晒相，我自己都係偏向鍾意數碼相機影出嚟嘅相。」

「唔係有啲平平哋嘅咩，我純粹係覺得好靚，不過冇咩特別技巧唔係好識影」

「我有朋友有玩開菲林嘅，不過如果你想特別玩啲特登曝光嘅，咁就需要一門技巧囉。」

「係咩真係見識甚少，我都係普普通通買部平平哋去旅行嗰陣時影下，但係我唔識影得靚，不過我鍾意菲林，就係唔知自己影成點，咁先好玩吖嘛。」

「本身呢我就諗住話不如教下你啦，但係我哋先識咗個一兩個鐘咁樣講好似有啲奇怪，一係我哋交換tg 你send你啲相俾我睇吓簡單評價下囉」

「都可以啊，話時話點解你會鍾意影相嘅？」





「冇啊因為我以前係學校有讀開 photography ，跟住一接觸左就返唔到轉頭，我平時都有用埋photoshop 執相。」

「係咪即係P圖？ 我阿妹都有玩，但係要俾錢㗎喎。」

「係呀不過我係學校先有得用，學校俾錢，買咗我哋咪可以用囉」

「係呢你係獨生仔嚟㗎？」

「係呀其實有時都真係會幾悶，不過如果我有兄弟姊妹，就冇機會去外國讀書嫁啦。」

「又係嘅，咁你咪好寂寞囉呢排返嚟，你仲要等到暑假之後先返去喎」

「係㗎唔多唔少都寂寞，先會上嚟呢度咋嘛，咁咪喺度遇到你囉」

「痴線，人仔細細就咁識講嘢⋯好啦今晚再講啦，去食啲嘢跟住之後有嘢做，bye bye ~」





「好啦咁再講啦，bye bye～」

夜啲嘅時候，阿銀會同C 繼續傾偈，而家阿銀將會搵到佢嘅同類人，佢哋對感情都係好單純，同我哋付出左真心嘅時候，其實係咪人哋都會付出真心呢，究竟我哋認真，係咪先係傻嗰個，當你玩緊我哋嘅時候，係咪就可以就咁人間蒸發，阿銀將會繼續成長落去，慢慢咁改變⋯⋯

作者的話：星期五將會停更，今次係為咗番外篇去作準備，敬請期待！