交友app嘅萬事屋: 懷疑人生
懷疑人生
2/5/20
其實感情究竟係一樣咩嘢，呢樣野永遠都無一個正確嘅答案，因為每個人對感情都有自己嘅睇法，但係當感情變質嘅時候，係咪代表其中一個人，或者大家都對感情有一個新嘅領悟，定係還是係純粹嘅新鮮感吸引左你而令到你去放棄你嘅另一半？
琴晚都叫做瞓得幾好，不過唔知係咪天氣都開始變慢慢變熱，瞓得有啲唔係好舒服。而家係朝頭早嘅9:00，簡單梳洗之後，就叫我阿媽幫我沖左杯齋啡，提一提神，順便食個麵包當早餐。睇吓30路姐姐有冇上線先：
「早晨呀返緊工啊？」
「係呀搭緊車返工啊」
「啱啱醒咗無耐，沖左杯齋啡飲」
「正，我陣間都去買杯飲先」
「精神啊，你係返去返工定係扮工先⋯」
「都係啦」
「咁好啦唔阻你啦你得閒先再搵我傾啦」
「好啦再講啦」
既然佢要返工咁就唔阻住佢啦，不過係屋企無所事事都唔係辦法，唯有睇吓戲囉，好似好耐冇睇過戲。其實我自己就唔係話特別好鍾意睇西方嘅電影，反而我比較鍾意睇香港舊陣時嘅經典電影，冇計啦邊個叫我份人比較老餅，聽過就係鍾意聽張國榮，陳百強嗰啲。既然係咁就揀番套英雄本色嚟睇，都好耐冇睇過，我始終都係鍾意啲戲，嗰陣時啲對白啊演戲啊都比較真實啲，同埋嗰陣時簡簡單單冇咁多特技，電腦效果。英雄本色一開始，周潤發攞嗰張假美金嚟點着佢支煙，真係好鬼型。發哥果然名不虛傳，佢亦都將阿Mark 呢個角色發揮得淋漓盡致，咁當然哥哥嘅角色傑仔，哥哥都可以將佢演繹得非常出色，而狄龍同張國榮嘅兄弟情更加唔使講，電影嘅其中一句金句「唔好叫我傑仔，叫我阿Sir ，阿Sir我冇做大佬好耐。」簡直就係充分表現出傑仔對佢阿哥咁多年來嘅期望，將佢阿哥當偶像咁拜，但係傑仔自己就做警察，而佢阿哥一直都係做緊大佬仲要係做假銀紙。
睇完套戲，瞓咗一陣晏覺所以冇食到中午果餐，起身沖埋個涼都差唔多時候食晚飯。可惜我都仲係喺家居隔離嘅期間之中，冇得幫阿媽手煮飯，咁就唯有喺度等食。食完晚飯之後，今日難得班friend 搵我打下機，就陪佢哋打咗一陣，不過佢哋都好早落咗線，因為要考DSE 嘅關係所以個個都早瞓，咁我自己玩都冇癮所以我都落咗線，咁我哋去交友app睇吓30號姐姐有冇上線⋯
「Hello，放工未呀？」
「放咗啦，啱啱返咗屋企沖咗個涼。」
「返咗一日工攰唔攰啊？」
「攰就唔多唔少都有嘅，不過我哋公司係做遊客生意所以呢排都唔係好忙，間公司都可能就嚟唔掂都唔知捱得幾耐⋯」
「冇嘢嘅，遲啲疫情好轉嘅時候應該會好啲嘅 不過我哋呢個垃圾政府都唔知佢會點處理⋯」
「都係嘅，希望全世界都快啲好返啊，係呢你點睇最近咁多出軌事件？」
「呢排真係多咗，唔知係咪因為羅志祥嗰單嘢，好似有個連鎖反應喺度」
「哈哈，可能有機會⋯」
「係呢你返工有冇咩遇到啲不順啊，定係有冇啲咩野煩緊你呀，我上嚟都係做吓樹窿希望可以幫到人。」
「我都有好難嘅事係冇講姐⋯」
「你唔介意咪講出嚟聽吓囉」
咁佢就開始講佢啲自己野， 其實呢佢份人好簡單嘅，佢亦都知道上交友app嘅人唔會同你講心㗎啦，除咗傾偈之外，佢喺呢度都遇過好多形形色色嘅人，其實最緊要都係睇吓大家有冇呢個心先，好似佢咁佢都咁大年紀囉成30幾歲人，佢唔會諗網上有真愛啦，咁呢樣野好正路嘅，但係亦都唔會代表佢唔會沉船嘅。
不過都唔知係好事定係壞事，佢30幾歲人先來甩拖，壞事黎睇可能佢冇以前後生咁多本錢，去搵一個好嘅伴侶，但係好事嚟睇，其實佢之前嘅另一半未必真係可以同佢一齊行落去，好過夾硬結婚然後離婚收場，佢亦都話佢唔會專登走去忘記佢個ex，就算ex 唔同佢結婚，佢都會多謝個ex，曾經係佢生命之中出現過，雖然佢哋喺埋左一齊12年，但係有啲嘢唔啱就係唔啱唔係一時三刻可以改。
我喺度諗12年喎，多過我喺呢個世界生存嘅時間嘅一半，12年時間其實話短唔係好短話長亦都唔係好長，不過我覺得都唔係一件壞事，起碼佢最後都睇得清佢嘅另一半，有啲嘢唔啱就係唔啱，不過可能佢真係講得啱，話就話可能佢仲有50年命，但係佢已經冇以前咁多本錢，佢亦都唔係後生，聽到呢度我都真係好似第一次覺得時間過得好快，話咁快我就就嚟18歲生日，係我去英國留學嘅三年期間好似眨吓眼就過，時間從來都係唔會夠用，所以我哋要識得去珍惜，無論係係你身邊嘅人定係發生緊嘅事，都要好好把握時間。
聽佢講完佢以前嘅故事，我哋又講返偷食呢一個問題 30路姐姐佢話：
「男人係咪真係貪新鮮，其實我真係唔明，我最近喺呢個app度識到個男，佢有女朋友嘅仲要住埋一齊⋯⋯但係都仲要出去搵sp，你話佢貪咩？」
「其實我覺得唔多唔少男人都係鍾意新鮮感，不過我哋都會想定落嚟，只不過係幾時啫⋯呢個男人一係就佢女朋友性冷感，一係就仲想玩。」
「究竟佢點解要咁做，如果你鍾意自己女朋友你就唔好再搞其他女人啦⋯⋯」
「冇錯呀真係講得啱，如果比着我，我真心鍾意嗰個人，我就會對佢專一，會為佢付出，我唔敢擔保我之後都係咁諗，但係至少我依家係。」
之後佢就開始講佢最近遇到嘅一件事，最近呢佢遇到個男人就係咁，佢對個男人有好感㗎不過佢冇比到個男知，因為佢想搵一個全心對佢嘅男人多啲，就係因為呢一個男人係人哋男朋友，雖然30路姐姐，一方面佢好憎呢種人，但佢又黐埋去，不過佢唯一堅持做到嘅樣嘢，就係從來都唔會主動搵嗰個男人。佢曾經試過被過佢一次嘅其實，delete 曬所有同佢溝通嘅社交媒體，不過個男人係有佢電話，個男人就WhatsApp 問姐姐係咪唔諗住搵佢，不過姐姐又心軟，有繼續傾來往，但係都叫做傾啲日常野。因為姐姐佢知道佢嘅出發點真係傾偈， 係對方有問題，佢有女朋友都仲要出嚟識女仔，不過姐姐控制自己唔好沉船呢啲嘢就絕對冇問題，但係有時都難，不過唔好咁快，最起碼識咗人哋一段時間先，夠了解先。
聽完佢咁講其實佢講得一啲都冇錯，偷食，出去搵SP，呢啲人其實究竟係抱住一個咩心態，我真係唔明白，如果你話你單身其實真係完全唔同，仲有沉船呢樣嘢更加唔使講，我之前自己先體會完，只怪我太年輕入世未深，咁容易就比一個15歲嘅女仔吸引到，好聽啲嘅咪純真囉，難聽啲嘅咪戇鳩，明知道大家上得來玩最多都係吹吓水，傾吓計。
之後我哋都係傾吓啲日常野，跟住講到呢個武漢肺炎嘅話題：
「我間公司呢主力呢就做遊客生意，而家冇遊客呢就嚟玩完，一個肺炎就KO全球經濟，都唔知點算⋯」
「其實真係，呢個肺炎真係唔係講笑，都唔明點解啲外國人一直都冇當佢係眼中，而家燒到埋身先知咩事⋯」
「所以話做人要及時行樂，今日又唔知聽日會點，我自己呢係比較我行我素嘅人，想點就點，或者我冇人哋咁有錢，但係咁又點我過得比人哋快樂。」
「我行我素好啊，唔使遷就住人哋，我都好怕呢啲嘢，我好唔鍾意睇人面色，有個句就講果句，而因為咁樣都得罪唔少人，所以我好佩服你可以做到呢一份工，對住啲遊客真係唔係人咁品。」
「都係嘅，不過每一個人都會有唔同嘅職業，咁先形成到呢個社會，如果每一個人都係同一個工種，咁呢個社會就會唔平衡。」
「啱呀冇錯」
「高層人士又好，低層人士都好啦，其實最緊要都係過得開心，唔好比較咁多，人就會開心㗎啦，我思想係咪好正面呢！」
「絕對認同，你下下都做比較，個人生活落嚟都唔會咁開心啦，不如唔好比較咁多過得開心咪算囉。」
「好似我咁呀 成30歲先甩拖，唔通我要生要死咩，不過中女喺香港都會有啲難搵另一半，而家都覺得唔會有人對自己咁真心，你估個個男仔都係鍾意我咩，佢都係想同我上床姐，我會唔知咩，所以我都話我睇得好清。」
「都係嘅，咁你咁講我都冇得反駁啦」
「直頭冇啦，不過算啦我姐，只要屋企人同埋自己過得開心就得啦，而戀愛呢啲嘢就隨緣啦，冇得勉強。」
「啱呀最緊要你咁諗咋嘛。」
「好啦時間都唔早啦我聽日仲要返工有機會再講啦～」
「好啊你早啲休息啦早唞啦」
「早唞」
其實佢真係睇得好開，佢講嘅嘢一啲都冇錯，點解人要比較咁多野，成日都要攞啲嘢去做對比，其實咁樣你淨係會令到自己個人更加攰，咁不如唔好理咁多自己覺得開心咪算囉，如果本身你自己個人係過得開心嘅係過得快樂嘅，就算你遇到啲咩問題我諗都會容易啲解決先，或者你將個問題放低一下過一陣可能就會冇咗㗎啦。
經過呢兩日同30號姐姐傾左咁多嘅話題，阿銀佢自己都明白，點解做人要比較咁多呢，其實你自己開心咪算囉，下下去遷就別人，係人哋可能覺得你係一個好好人乜嘢都可以就佢哋，但係你唔記得咗自己，你自己都有自己個套㗎，我哋唔係一定要就人哋㗎，最緊要都係自己過得開心啫。嚟緊嘅阿銀，佢將會遇到好多唔同嘅人，會着到嘅一個人佢通常都會係佢哋身上學到一啲野，而佢亦都會慢慢咁成長落去⋯
今日 06/05/20 係三十路姐姐生日，係到同你講聲生日快樂！
作者的話：星期五將會停更，今次係為咗番外篇去作準備，敬請期待！