我嘅靈魂困咗喺架巴士入面: 03

由於架車只係輕微損毁，所以好快已經修復完成。本應可以復出載客嘅JE1672因為被安排調去荔廠，所以繼續泊咗喺車廠入面等待師傅將架車揸去荔廠。而我都仲係離開唔到架車，所以唯有繼續呆坐喺架車入面。

過咗冇幾耐，就有個師傅上車check下架車仲有冇問題，然後好快就揸咗架車出廠。個師傅差唔多全程都踩到80，我哋喺龍翔道同埋呈祥道逢車過車，好快就已經到咗荔廠。到咗荔廠之後，個師傅又將架車泊喺休息室附近之後好快就執晒啲嘢落車走咗。

冇嘢做嘅我唯有繼續睇嗰個非常無聊嘅電視，好似荔廠啲電視節目仲無聊過九廠。但係我都繼續聚精會神咁望住個電視，睇吓有冇一啲關於我嘅新聞。過晒成個新聞時段都係冇任何關於我嘅新聞，咁我都係上去樓上瞓覺先啦。

第二朝我好早就已經自然醒，應該係因為喺張凳度瞓得唔舒服。我落返樓下，見到有個師傅坐咗喺度睇報紙，我諗住行埋去睇吓份報紙有冇關於我嘅新聞。但係佢突然間抬起頭望住我，問我：「你喺度做乜嘢？」

IG: stitch_stitch_driver